TUP KIBANG GEN KIDANG
( The same Goal with different Expressions)
Biakna dangdang te mah bang in Khristian biakna i tupna ( Goal) in gupkhiatna ngah na ding mah abulpi pen a hi hi. Ahizong in i Lai Siangtho in tua tupna bulpi pen kammal khat bek tawh na gen lo in amun a gam zui in kammal tuamtuam in na gen thong hi. Tua a hihman in hih tup kibang gen kidang Gup khiatna thu i tel na ding in Thu Ciam Thak (NT) siksan in
Gupkhiatna thu i en ding hi.
Topa Jesuh thu a ki ciamteh na Lungdamnathu (Gospel) bu li sung ah Topa Jesuh in Gupkhiatna cih kammal na tam zat ngiat lo hi. Gupkhiatna cih kammal taang a, a na zat kammal om hi. Lungdamna thubu bu li sung a, a bu masa bel a hi, Matthai pen Judah mite a ding phadiak a, a ki gelh a hi hi. Judah mite in Pasian min pen zaangkhai tak in na zang mengmeng ngam lo uh a, tua taang in Vantung gam ci- in Mualtung Thuhilhna bang ah na kizang zaw hi. (Matt. 5 :3)
Maka leh Luka ahih leh Judah mi a hi lo, Gentail mite ading phadiak a kigelh hi a, amau in Pasian minlawh leuhleuh ding pen tuazah pi in lipkhap ngaihsut veva lualo uh ahihman in Zanglei thuhilhna bang ah Pasian ukna mah na na ci geugeu lel hi. (Luka 6:20, Marka 1:15)
Lungdamna Johan leh adang Johan gelh bu li te, (Johan Masa, Johan Nihna, Johan Thumna leh Mangmuhna) te- in zong Gupkhiatna cih kammal na zang het lo- in Nuntakna, Nuntak tawntung na ( life/ eternal life) na na zang hi. ( Johan 3:16, Johan Masa 5:1-5, 13, Johan Nihna 5-6, Maangmuhna 2 :10, 22 :19)
Ci phapha le hang, Johan gelh hih bu nga ( the five Johannine Epistles) te sung ah Gupkhiatna cih kammal kihel kilkel lo- in “Nuntak” ( nuntakna/ nuntak tawntungna) ci- a, a kizat na pen ahang om gige hi. Laigelh pa Johan in Cyprus tuikulh tung ah singkung nam khat mu a, tua singkung pen gah masa pulh khin leh gah thak kipan in tua te a pulh ciang in gah thak ding kipan kik ta leuleu hi. Kum ki benglet in a gah denden a hihi. Johan in hih kumkhua a, a gah singkung a muh ciang in, Aw, Aw, Pasian tawh a kizom a kipeh kha, gupna ngah mite nuntakna pen gah denden nuntakna hi ding hi, ci- in ” gahden nuntakna” ( eternal life John 3:16) a na ci ngiat a hi hi. Gupna ngah i cih te pen hing maimai ( just exist) bek lo- in gah a gah ding ( fruitful and productive life) a hih ding kisam a hi hi.
GUP KHIATNA cih kammal a na zang pen Judah biakna pan a Judah mi a hi lo, Gentile mite tung ah Lungdamna thu a puakkhia masa bel Paul kammal zat a hihi. Amah’n bel Judah mi a hi lo, Gentile mite tel theih theih ding in a kuamkuam, a ciangciang pan in na na zang a, tuate khempeuh pen, Gentile mite in Gupkhiatna a tel theih theih na ding un a zat a hi hi. Tuate pawl khat en le hang,
1) Gup khiatna (Salvation Rom 1:9-11,) Cidam na bulphuh in a na zat hi- a, dam sakna ( soteria- healing) a hihi. Gupkhiatna ngah te pen cina na in zawng khalkhal lo- in cidam in thahat in gahgah mai ding hi, a cinuam a hi hi.
2) Tatkhiatna (Redemption)
Gal kisim na ah sal kiman te tatman pia a kitat khiatna pan a, a lak a hi hi.(Rom. 8: 23) Mi mawh khempeuh pen atuung in Pasian neihsa kimlai mawhna hangin a galpa a hi, Dawimangpa neihsa suak mikmek in tua Dawimangpa khutsung pan tatman ( ransom) ding in Jesuh in Kalvari sing khuam tung ah tatman in hong ki pumpiak hi, a ci nuam a hi hi.
3) Diktanna ( Justification)
Thukhenna zum pan a, angah kammal a hi hi.Thu khen zum a Thukhen mangpi pa in a thukhen na ah mimawh khat, ” Nang mawh kei ciai” ci- a dik a tan sak ( justified) nak leh a mawh lo hi pah a kuamah in mawh sak thei nawn lo hi. Tua bangmah in Khristian upna ah zong mimawh pen khat nangawn in Jesuh a up nak leh tua Jesuh nasepna (tat khiatna) hang bekbek tawh Pasian in, “Nang mawh kei ciai” ci- in dik hong tangsak a, kuamah in mawh hong tang sak thei nawn lo hi, a ci ngiat a hi hi.( Rom 3: 24 -26)
4) Ta za ngahna (Adoption) Hih pen innkuan nuntak na pan a, a lak a hi hi.
Mawhna sung a, a nungta mi khat Pasian um in Jesuh nasepna te a san ciang in amaute a kipia khol Kha Siangtho hang in tapa za, tanu za, innluah za ( Adoption) ngah a hi.( Gal. 4:5, Rom. 8 :14, 23)
5) Kilem kikna
(Reconciliation) Hi zong Paul in lawmta kikholh na pan ( social relationship) pan a, a lak ki lemkik na lim a hi hi. Lawmta nih ki it kilem kimlai, hong kitel khial in gal hong suah uh ciang in lemzu dawn khawm in lawmta hong suak in hong kilem kik uh hi. Mihing te zong Pasian tate kimlai, mawhna
hang in Pasian tawh i ki gal hi. Tualai tak mah in Jesuh hong buak sisan a hi (lem zu) hang in Pasian tawh kilem kik ( reconciled) in lawmta i suak kik hi. ( II Cor.5:19)
Khristian te tup bulpi ahi, Gupkhiatna pen kammal khat bek tawh kitel ziau thei lo hi. Kammal tuamtuam pan in leh kiu tuamtuam pan in et kul hi. Tua pen Pasian leh Ama’ thu i a thukna leh a sanna hang a hi hi. Tua hi a, Pasian thu pen theih khit pah ziaizuai cih om lo- in, khanglui upa ten Zo ci gei peh, acih bang un, kammal khat peuh bulkan im damdam damdam in ( bit by bit) i kan toh toh, i tel tohtoh ding a hi hi. Pasian in Ama’ thu a telnuam, akan nuam mite a tel zaw semsem ding in hong kiphuang hong kilaak sem sem tahen ci-in thu kong nget sak hi.
Lailakna : Rev. Dr. Simon Pau Khan En Facebook pan
