A KITAM TUIBUNG
Thang Biak Mung
Nidangin khamtung gam khatah amah bekin a khuasa nupi khat om hi. Nisimin a omna mualtung panin kumsukin, a tuibung nihte la a, mual tawlamah tui tawi dingin kuankhia hi. A tuibung nihte lakah a khatpen a taw kitam hi.
Inn a tun ciangin a tuibung khatpen sungah tui a dimin om napi, a kitam pen sungah a kimkhat ciangbek tui om hi. Hih bangin kum nih sung bang tui a tawi khit ciangin, tuibung hoihzaw pen in a khat pen simmawh et hi. Ama hangin tui kingah a ci hileh kilawm khatin kiphasak a, a hihtheihna hangin hoih kisa mahmah hi. Ahi zongin a kitam tuibung pen ahihleh maizumin, a hoihlohna hangin a tha nem hi.
Ni khat innlam zuanin a ciah laitakun tuibung kitam pen in a pi kiangah, “Ka hoihlohna hangin ka maizum a, nang adingin phattuamna nei zo taktak lo ka hih manin hong maisak in,” ci-in gen hi. Hih thu a zak ciangin a pi in, “Bang hanga tua hong gen na hi hiam?” ci-in a dong hi. Tua ciangin amah in, “Ka kitap manin tu kum nih sung tui na ngah dingzah kong piazo kei a, na ngah dingin a kilawm hong nialsak ka suak hi,” ci-in a dawngkik hi.
Tua ciangin nupi nu in tua tuibung kitam pen kiangah, “Tuni inn i ciahkik ciangin nangma lam lamdungte ah a kigual to dimdiam, a paak hoih mahmah paakte na en dih in,” ci-in a gen hi. Tua bang mahin aman zong en a, paak hoihte a mu takpi hi. Ahi zongin a deihna telzo lo hi.
Nupi nu in inn a tunkuan ding ciangun tuibung kitam pen kiangah, “Nang’ lam bekah paak om ahih lamtak na thei hiam? Ke’n na kitapna kong theih manin tua mah ka meetbawl pah a, na tot lampi dung tengah paak tang ka vawh hi. Tui i tawi ciangin i ciah simin na kitapna panin a taakkhia tuite in tuate tui a pia niloh ahi hi. Tu-in nangma tuipiak tawh a khangkhia hih paakte zangin ka inn sung zeemin a etlawmsak ding ka hi hi. Kitam lo hi leteh hih bangin ka hihkha hetkei ding hi,” ci-in a hilh hi.
Nuntakna ah kimanna nei lo hi ing, a ci ki-om tham hi. I vekpi-in hoihlohna a kineitek ahih manin tuibung kitam vive mah ihi hi. Ahi zongin i ginatlohna meetbawl siam lehang i ginatlohna in na hoih semin a manpha i hihna ding panin hong dal zo lo ding hi. Sawltak Paul in ka ginatlona, ka zawngkhalna ah Jesu vangliatna kilang semsem hi, a cih bangin i ginatlohna khempeuh Topa’ tungah aap lehang aman tua mah zangin a vangliatna hong musak ding hi. I guallelhna mun santakah gualzawhna hong ngahsak thei Pasian hi a, tua mah ama siam lamtak na hi sese lai hi.
Pasian adingin a kimang thei lo om kiuhkeuh lo hi. Mival om lo hi. Deihna om loin a kibawl om lo hi. Na manphatna tel nai loin, kimanna nei kei ing, a ci mi khat na hihleh nangma tot lampi lama kigual diudeu paak hoih mahmahte a mu nai lo na hikha ding hi.
