BANG HANGIN BIAKINN KA PAI KUUL HIAM?
Thang Biak Mung
Tuhun leh mailam hunah Khristian pawlpite in i (a) tuah pelmawh ding thu khat ahi “biakinn pelhna” vai pen thu lianpi khat hikhin hi. “Churchless Christians” zong a kici “Nones” kici pawlte in biakinn pelh ding thu ah paulap bawlin dik kitangsak uh hi. Pew Research in biakinn a kipelhna hang lianpen khat, “keima’ lawpna bangin biakpiakna kibawl lo hi,” cih zong na gen uh hi. I theih ding ah:
• Eima’ nopsakna dingin biakinn a kizuan hi masa lo hi
• I lawp manin a kizuan zong hi masa lo hi
A kisapna thugil tel loin biakinn a awlmawh lo Khristian hong tam semsem leh Khristiante’ maban limci het lo ding a, leitung bangin mi bulphuh (people-centric) kipawlna khat lel hong suak thei mawk ahih manin, a awlmawhhuai mahmah thu khat himawk mah hi. Tua hi a, bang hangin biakinn ka pai kuul hiam? cih thu i etkik ding hoih hi, cihna tawh a nuaia thute kong luikhia nuam hi.
1. Mawhna hangin i lungsim a khauh lohna dingin (Heb. 3:12-13)
2. Topa’n hong sawl hi (Heb. 10:25)
3. Hanthot ding na kisam a, midang na hanthot ding zong kisam hi. Kihanthawn ciat dingin tha hong kipia hi (Heb. 10:25)
4. A vanglian Pasian’ kammal kipulakte na zak ding kisam hi (Heb. 4:12)
5. Kihiamsak ding leh midangte hiamsak dingin (Pau. 27:17)
6. Hehpihna hanga Pasian in hong piakkhong siamnate zatkhiat theihna dingin (Rom. 12:6)
7. A phatuam dinga Topa’n hong zat theihna ding (1 Kor. 12:7)
8. Khris pumpi nate khat na hih manin (Rom 12:5)
9. Lungdamna Thu tangkona ah kihelna khat ahi hi (Fil. 1:5)
10. Midangte lam lakin lamlahna mah i ngahkikna ding (Titu 2:2-6)
11. Lampi man ah tate tonpihna ahi hi (Pau. 22:6)
12. Khat leh khat tungah itna kilahkhiatna ahi hi (Gal. 6:10)
13. Leitung mite tungah Jesu hong itna pulakna ahi hi (Jn. 13:35)
14. Khat leh khat’ vangik puakhawmin kihuhtuah theihna ding (Gal. 6:2)
15. Ki-itna tawh khat leh khat na hoih sepna ah kihanthawnin om theihna ding (Heb. 10:24)
16. Topa’ Ankuang sawkkhawm dingin (Matt. 26:26-28)
17. Khat leh khat kilemin omkhop theihna ding (1 Kor. 12:25)
18. A thuakkhawm dingin (1 Kor. 12:16)
19. A lungdamkhawm dingin (1 Kor. 12:16)
20. Jesu pumpi a khantohna dingin (Efe. 4:15-16)
21. Pumpi nate a vekpi-in kisam hi (1 Kor. 12:21-22)
22. Hong kibawlna hang i phawkkik theihna ding (Efe. 2:10)
23. Hong neipa na phawk tawntung theihna ding (1 Pet 2:10)
24. Pasian hong sapna sem dinga kipattah dingin (Efe. 4:11-12)
25. A tawntungin kipumkhatin Pasian tawh a omkhawm ding ihih manin (Mang. 21:3)
Mahatma Gandhi bangin, “Na Khris uh ka deih a, na Khristian biakna uh ka deihkei hi,” a cih bang pianin eima’ khensatna tawh biakinn a pelhkha i hihkhak ding lauhuai hi. Khris itin, Khris in a it mite a mudah i hihkhak ding zong lauhuai zawkan hi.
“Inn ah zong sinsak theih hi,” ci-in a tate sang a kahsak lo kua om hiam?
** Hang tampi om thei lai hi. Ahi zongin a tunga teng tawh zong biakinn pai ding a kisapna kicingkhin zo hi.
Cf.: Tim Arndt, Allendale Baptist Church
