ABRAHAM LINCOLN (KUMPI HOIH PA)TANGTHU LEH AKAMMAL THUPI TE

Spread the love

May 30, 2022

Thumasa: Abraham Lincoln Tangthu i theisa hi aa,athupitna zong tampi i theisa ahihi.A hi zongin thupi ka sak na tawmleh amah thu tawm hong gelh nuam ing.Theina ki bat kei leh Ieh sim laibu te ki banglo hi ding hi.

Abraham Lincoln pen Thomas Lincoln leh Nancy Hanks Lincoln sungpanin 12/2/1809 kumin Hodgenvile, Kentucky USA ah hong suak hi. Ahaksa Inn kuan panin hong khang khia mi khat ahihi. Lincoln in sanggam numei Sarah leh sanggam pasal Thomas nei hi. 5/10/1818 kumin nawinat na tawh Anu in hong sih san hi. Tua lai takin Abraham Lincoln kum9 pha pan hi. Anu sih zawh Kum khat khit ciangin apa in ta thumnei meigong nupï Sarah Bush Johnston tawh ki teng hi. Abraham Lincoln te Inn Kuan 1817 Kum ciangin thu tuamtuam om na hangin Kentucky panin Perry County IIIinois ah peem uh hi.

Abraham Lincoln pen amah leh amah in Pilna nakpi in ahanciam mahmah khat ahihi. Laisim pen uk mahmah in laisim bek tawh ahun abeisak mi khat zong ahihi. Alaisim tampi lak ah aki gen deuh teng King James Bible, Aespo’s Fables, John Bunyan’s The Pilgrim’s Progress, Daniel Defoe’s Robinson Crusoe leh The Autobiography of Benjamin Franklin cih te ahihi. Kum sawm kiim aphak in Inn kuansung nuntakna vaipuak neito pah ahihi. Lincoln pen a tunsangin thahat mahmah mi khat ahih ban ah heizat pen siam mahmah ki ci hi. Amah pen aneu panin auk mahmah pen nabanki lai ahihi. Auk mah bangin zong sin toto hi. Kum21 aphak in Country wrestling Championship khat hong suak hi.”The Clary’s Grove Boys” ci in mitampi in thei a minthang mahmah hi. Tua ahih manin atha hatsemsem in ki muanna zong hong nei mahmah hi.

1830 March kha in Nawinat hong om kik aa, a Inn kuanin Macon County ah hong peem kik uh hi. 1831 ciangin Thomas te Inn kuan Coles Country ah ah peem kik ding ngaihsun uh a New Salem ah Inn hong bawl uh aa tua lai ah hong teng uh hi.

Zihneina leh Tate

Abraham Lincoln ii lawmnu pen Ann Rutledge hi a, Amau pen New Salem ah apeem lai un aki theisa ahihi.1835 kumin aki theisa ahih hangin ki khamkholna cihte nei lo in lawm ki ngai mawkmawk uh hi lel hi.Tua bangkawm kal ah August /25/1834 in alawm ngaih Ann pen trphoid fever tawh anuntakna bei hiau hi. Amau ki itna pen hong tatta hi.1830 Kum kipat lam in aki muh pih ngei Mary Owens tawh ki mu kik hi .Ahi zongin amau ngel itna pen Inn kuan ding zahin lemlo ahih manin ki khen uh hi.1839 kumin Lincoln in Springfield, IIIinois à Mary Todd tawh ki mu in kumkhat khit ciangin kikhamna bawl uh hi.Alawmnu pen Kentucky aa Robert Smith Todd ii tanu ahihi.Mi haumahmah te ahi uh hi. 4/11/1842 in kitenna hong nei thei uh hi. 1844 kumin Inn khat lei uh a 1843 ciangin Tapa khat Robert Todd Lincoln hong neih uh hi.1846 Kum ciangin Edward Baker Lincoln (Eddie)hong neih uh aa,1850 kumin TB natna tawh hong si hi. 21/12/1850 Kum sung mahin atathumna Willie Lincoln hong suak hi ,ahi zongin February 20/1862 in White House ah cisanatna tawh hong si leuleu hi.

Gamvai hong lutna

1834 kumin Lincoln pen State Legislature dingin kitelna ah hong zo hi.1836/1838-1840 in khat vei kitelna ah hong zo kik hi.Amah hun lai in, Gamvai ah (Politicians)aki zahtak mahmah nih om aa,Henry Clay leh Daniel Webster ahihi .1840 Kum ciangin, William Henry Harrison tawh meesuai in hong pai uh hi.
State Legislature alivei bang asep khitciang in Lincoln pen 1841 in hong khawl hi. Ahi zongin 1846 kum ciangin hong lut kik hi. 1856 ciangin Republican Party ah hong lut hi.Hih Party te ii apai zia pen aman thupi sa mahmah hi. Adiak in hih Pary in Sila cih limlim abei na dingin ahanciam ahihi.Kanass-Nebraska hih thukhun pen phiat in mailam ah Sila cih limlim omnawnlo ding cih ahihi . 1856 June kha in Republican National Convention ah Vice President dingin kitelna ah hong ngah hi. John C.Fremont leh William Dayton te IIIinois Lincoln adeihna sign thuhhi.

9-10/5/1960 in IIIinois Republican State Convention pen Decatur ah hong ki bawl hi. Lincoln nungzui David Davis ,Norman Judd, Leonard Swett leh Jesse DuBois te hi in amau mahin makai in Organized a Campaign Team hong phuankhia uh aa,Tua mun ah Lincoln pen amasa pen in adeihna gen uh hi. Lincoln adeih peuh mah in “The Rail Candidate”kiciamtehna pen deih ciat uh hi .1860 kumin Lincoln amah leh amah kigenna hong nei aa,”Ka tun sanna Piguklehletmatli(Six feet,four inches)in,gawmpian khingkheng pounds 180, ci in amah hih na te Genna nei hi.Micheal Martinez in agen thute lai in ciamteh hi .Thutampi tak gen in mithupi mahmah ahihna pen mipi in thei in diksa mahmah uh hi.
18/May kha in Chicago Khuapi ah athumveina meezonna ah Gualzawhna ngah hi .Maine Pyine ah Vice President dingin amin ki hel hi. Lincoln ii Gualzawhna akideihna pen agam uh aa sila beisak ding leh Gamkhantohna dingin nakpi in vaihawm ding cih tawh mipi in amah deih mahmah hi.
Lincoln aki deih semsem na ding leh saktawh khang tawh amah thupitna aki thei semsem na dingin Wide Awakes Kipawlna khat ki bawl hi Tua takciangin saktawh khangtawh Lincoln pen ki thei khia mahmah ta aa, Lincoln adeih khempeuh amunmun ah lom om zihziah uh hi.
4/3/1861 kumin Kumpi hong sem hi.American kumpi 16 na ah om beklo in,Kumpi hoihpa cih pen tuni dongin American ten na ciamteh ngiat uh hi.1/1/1863 in aman adeih ngiatlo amunmun ah sila omna pen beisak ding cih gen khia aa,tua mah bangin suahtakna laidal gelh khia takpi hi.
Gamsung zong daisak zo mahmah khat hi aa,Sila cih limlim zong aman na phiat siangzo hi.Amah na sepna thupi tampi om aa,avekin kim takin gelh pakna dingin huntampi bei ding hi.

Asihna thu

Athat pa kua hiam ?

Abraham Lincoln athat pa pen John Wilkes Booth hi aa amah pen 10/May /1838 in Maryland ah suak hi .Anu leh apa ahih le Junius Brutus Booth leh Mary Ann Holmes hi aa British Actor ahihi .Anu leh apa nung mah zui in Actor mah hi aa,1855 Kum in Shakespeare’s Richard III ah ki hel hi .Tua hun lai tak in John Wilkes Booth pen Gamvai ah lut mahmah in amah pen Know Nothing Party ah ki hel hi.Alawm te Samuel Arnold leh Michael O’Laughlen te tawh Kumpi Lincoln that ding cih pen ngelna nei uh hi . Kumpi pa pen Henry Rathbone leh Clara Hanrris te tawh pawi ah hong pai uh hi.Tua sung ah Booth in Kumpi pa pen A.41 calibre Deringer Pistol tawh alu pan na kap hi.Tua Lian takciang in Rathbone in zong thakhat in man ding ci in alente aliang temta tawh na dawtsak hi..Hi bang Buaina teng tawh amah pen taikhia man hi .David Harold le Booth pen zong khia pah uh aa,Booth ii khe atan lai in abawl siavuanpa zong sih masiah thong kia dongin thukhen pah uh hi.

John Wilkes Booth ki man

Union Troopa te in 26/April Booth leh Herold bukna Inn um cih uh a tualai ahman uh hi.Herold in thaute khia pah in, Booth in khia nuam tuanlo hi. Bang ci lai zen hiam cih le paikhia in do ding ut ing ci in gen lai zen hi.Tua takciangin Kumpi pa abawl bang lianin galkap ten alu kap in silo lailai aa tua takciangin tawm vei kem in ,anu nung kammal pen “Useless”Useless”cih kampau in si hi…

Abraham Lincoln si ta
Lincoln kikap khit ciangin Charles min nei ,Khangno mahmah lai Doctor khat in va delh pah aa, Galkap tampi in zong Kumpi pa aman lang pen in zato lam ah paipih in ahi zongin Kumpi nuntakna Bawlzo nawnlo in anuntakna hong bei hi… Abraham Lincoln 15/April/1865 7:22am in si ci in gen khiatna hong nei ta uh hi….

Kammal thupi te

Bangbang na hi zongin mihoih hihsawmin

Pasian in eite lam hong omlo ding lung hi mawh keng,Ka lung hi mawh khat in Pasian lam ah ka om tawntung ding bek hi. Bang hang hiam cih leh Pasian pen atawntungin thuman hi.

Ahoih sem leng ahoih ngah ding ahoihlo ka sep ciang ka lunggim.

Mite ii suahtakna alaksak mi khat pen kei tawh ki tuaklo hi.

Damtakin lam ka pai hangin,Cikmah hunin nung kik keng …

Asia lam bekbek miten zong ding cih bel theisa hi.

Gualzo den ning ci ngam keng ahi zongin thumaan tawh na sem ding,ka hihna tungah citak ding..

Na khe atallo na dingin amuan huai in ding den in..

Na mailam ding gelna nei inla ahoih pen dingin bawl pha in..

Tuni na pelh hangin zingciang na sep ding ki pelh theilo hi.

Khemna tawh Gualzawhna in akicing Pilna hi thei ngeilo hi

Gualzawhna dingin nang mah ii khentatna pen thupi pen aa, na dangte sangin thupi zaw ahih na phawk den in..

Singphuk na dingin nai6 hunla in,na hei tat hiam masa in…

Gamlehlei adingin na sem khat pen cik mah hunin Leitung panin ki phiat khiatheilo hi.

Ahoihlo thukhun ii phiat thei na dingin,aki sampenpen khat in khauhtakin ahoihlona ii lah khiat ding ahihi..

Ei te i thahatna Maan hi cih pen i up ngam ding thupi hi.Tua upna tawh ei ten i tavuan telin atawp dong in hangsan takin i sep ding ahihi…

Thuman ah tangtakin ii din ngam mah bangin,sep khialh na khat ii neih ciangin zong tanttakin ii dinpih ngam ding thupi hi..

Mitampi in alungsim ah ngaihsun in nuam sa mahmah uh hi.

Tuni aa na sep zawh ding ahih nakle zingciang sep dingin sitnei sese ken ..

Hong ki thah leh khat vei bek aki si ding hi lel aa ,ahi zongin khangkizomin alauhuai thu in amau pen si kikkik ding ..

Mee tangin thautang sangin thahat zaw hi ..

Atawntungin ki ging den ing, ni khatni teitei ciangin kei hun hong tung ding hi ..

Ka sep zawh zahin sem ing, atawp dong sep dingin ngaih sunin hanciam ing…

Thukhen dingin na om ma in,nang tungah na thukhen ding thu te hong tung ding in ngaih sun in la tua khitteh thukhen in…

Mi te deihsak in na hoih sem na kisak mahmah hangin,hong langpang hong deihlo mi mah om veve ding hi. Adiakin amau angsung akhual mite in langpang den ding cih pen phawk den ding thu ahihi…..

Mi kim deihna ka tangtun pih zawhloh hangin ,ka kamciamna tangtung sak ka hih manin,ka lungdam mahmah hi. Ka sepzawh nak leh mitampi deihna te sem toto lai ding hi ing ….

Kumpi khatin na khempeuh vai hawm thei hi lo a ,avai hawm khempeuh mipi ading hi zaw cih zong phawk ding ahihi.

Na gualzawh nop leh langpanna,mite zahkohna haksatna cih te thuak dikdek phot in.

Kumpi hoih in,gam leh lei mipi leh minam it hi,Tua ahih manin khangno ten zong nakpi in mai lam ah hih kumpipa lungsim bang vom in na ii sep ding thupi kasa hi. Asim mimal in phattuamna ngah leh kisam i sak aom leh anuai ah comment ciat ni. Ahunhun in mithupi, milawhcingte tangthu ki koih den ding ahih manin tha ki pia ni,LIKE<SHARE <FOLLOW

lungdam : Laigelh Theophilus Khual

SIMNA MUN LEH LAKNA MUN <Wikipedia…Abraham Lincoln Histort and Biography