Thu masa : Ih nuntakna sungah gualzo leh lawhcingin i nuntak ding pen mikim in i lunggulh mahmah thukhat ahihi. Tua ahih manin i gualzawh theina dingin i nuntakna ah bang teng ki sam a, bangci kalsuan leng lawhcingna ngah thei ding i hihiam cih pen mikim in i lungngaih zelzel thukhat ahihi. Na nuntakna sungah bangtanvei guallel in na om hiam? Na nuntakna sungah lawhsapna tawh bangtanvei na om hiam? Na tup nasawmna tangtung zo kei ning ci-in thanem na om kha hiam? Tuni-in hih lai na sim inla mite kalsuanzia mite lawhcingna leh gualzawhna koici dan hiam cih na lungngai inla khatvei na nuntakna thak patkik lel in ci-in thumasa in hong gen nuam ing…
Jack Ma i cih kua hiam? 1964 September 10 in Hangzhou,Zhejiang khua ah Ma Laifa leh Cui Wencai sung panin hong piangkhia hi. Mi zawng inn kuan sung panin hongkhang khia hi. A neu panin mangpau pen hong uk mahmah ahih manin Kum12 aphak in Radio khat hong lei a mangkangte pauna radio pan in zong hahkat takin hong ngai zelzel hi. A amu inn tawh 27km(17 mile) bang aki gamna la na Hangzhou International Hotel kiim ah gam dang mite mu dingin setbing tawh hong pai zelzel hi. Mangpau siam nuamlua ahih manin khualzin mite tungah hong kisin zelzel hi. A tom in gen leng 1980 kum in Ausitiria pan in khualzin inn kuan ahi Ken Morley te tawh hong ki mu hi. Jack Ma leh Ken Morley ta David hong kilawmta mahmah uh a inn kuan un Segam panin aciah khit nungah zong hoih takin ki zopna hong neilai uh hi. 1982 kum in Jack Ma kum18 hong cingkum in Nation-wide Chinese College ah entrance exam laihongphi a Maths(tinchia) mark 1 tak hong ngah hi. Pilna lam ah zong akhuak hatlua vangvanglo cihna ahihi. Ansai munkhat ah na sep hong siau in “gawnglua,tomlua” ahih manin tua ansai ah nasep hong ngahlo hi. 1983 ciangin College kah nuamlua ahih manin anihveina hong siau leuleu a, amasa sangin amat hong tamzaw a mark 19 hong ngah in anihveina sang hong luttheilo hong suak hi.1894 kum in hong sinkik leuleu anihveina sangin amat hong tamto zaw a, mark 89 hong ngah hi.
Hangzhou Normal University ah sangkah ding min hong ap khit ciangin lungkia lo in pilna ka ngah theina’ng ahih le ci-in deih takin hong hanciam to a,maths asiamlo hangin amah tua mun panin mangpausiam pen pahtawina zong hong ngah hi.Tua sang ah amah pen sangnaupang bup makai dingin telna zong hong ngah hi.1988 ciangin Hangzhou Normal Universty panin Bachelor of Art (BA) lukhu nelkai gualzo takin hong ngah hi. Tua sangpanin hong man ciang’ Hangzhou Dianzi University ah manglai leh gamdangmi tawh ki zopna lam ah sem hi. Tua kawmin alunglut mahmahna leh aminthang mahmah Harvard Business School ah 10vei bang hong siau(try) a ahizongin ngahzolo hi. A nuntakna dingin lampi tuamtuam tawh na sep hong zong kawikawi in 31vei bang nialna hong ngah hi.KFC sai ah na sep siau mi 24 lutkhawm in 23 ki telkhia a amahbek in ngahlo hi.
Lungkia ding hi leh lungkiatna ding vive a neupanin aphuto ciatciat ahihi. A tom in en suk leng 1994 kum in Jack Ma in Internet tawhna sep ding hong ngaihsun a, Hangzhou Haibo Translation Agency cih hong phuankhia hi.1995 kum in American hong zin a Segam tawh ki sai thu internet tungah mukisalo ahih manin lamdang hongsa mahmah a,alwmte tawh ki pawl in website khat hong bawlkhia a “ugly” min hong vaawh hi. 1995 April kha in Yibing min Chinna Pages cih bawl leuleu a, 1995 may 10 US te tawh chinnapage.com cih domain hong lei hi. Hih bangin na hong sem toto a kum3 sungin USA dollar 800,000 hong ngah hi.
China Pages hong gualzawh ciangin Jack Ma in aki banglo Sengam sungah wesite panin min tuamtuam tawh na hong sem toto a , 1998-1999 China International Electronic Commerce Center panin aki bawl IT company pen alian pen ahihi. 1999 kum in a nasep panin hong khawl a alawmte 18 tawh “Alibaba ” Company hong phuankhia hi. 1999 Octomber kha panin 2000 january kha ciang sumlut pen USA dollar 25million bang hong ngah hi. Tua khit ciangin Taobao Marketplace Alipay Ali Mama leh Lynx cih te hong phuan to ziahziah in eBay company te in Toabao leiding hong gel uh a ahi zong Jack Ma in phallo hi. Yahoo aphuankhia Jerry Yang tawh Taobao pen 1Billion ding in ki ho pah uh hi. 2014 September kha ciangin Alibaba pen New Tork Stock Exchange IPQ dollar 25 billion bang hongkah ahih manin leitungtah athupi pen compant khat in alibaba company ki ngaihsut hi.2015 ciangin Jack Ma in Hupan School hong phuankhia hi. March 31/2024 in China Kumpi tungah asum neih teng alahna ah sensum 941.17 Billions hia USA dollar in hile 130.35 Billion hi dingin ki ciam teh hi.
Bang hang hih thu teng hong gelh masa ka hiam cih leh Jack Ma danin i nuntakna ah haksatna lungkiatna leh lamet bei in a om khangno tampi tak Zomi sungah ki tam mahmah. Jack Ma zong eite bangin nawlkhinna langpangna tampi na thuak to mahmah hi. A ahi zongin aman agengen thukhat ahih leh “Lungkia ngei kei in, munkhat pan in alem kei le mun khat ah hanciam zaw den in” ci hi. Tua ahih manin tulaitak na nuntakna sungah na sep neilo, neihsunsun kha sum tamlo, kapute nuamlo,ka na seppih te nuamlo ci-in paulap khawng i zong den keei leh hong lemkhin hetlo ding hi. A hih theilai teng na sep na bawlna ah hanciam teta inla thasan veve in tulai takin leitungah minuamsa company golpipi nei in nasem tampipi anei i cihte zong eite bangin aki pan ciauciau te mah uh ahihi. Haksatna zong eite sangin athuakzaw tampi om hi, ahizongin lungkialo in ahanciam te gualzo ahihi.
Haksatna pen bang ci bangin kantan zoding cih hamphatna na ngah ding hi. Na sepnop pen mah sem khading na hih manin nasep nuam na sa pah ding hi. Khasum sangin tuahkhak pilna (experience) bulphuh zaw in.
Sia hoih (mentor) zong in. kum 30 ka phakma-in bang zumah sem kha ding, bang company gol pipi-ah sem khading cih na ngaihsut sangin kua khutnuai-ah, kua sia hoih nuai-ah sem kha cih thupi zaw ding hi. Sia hoih tawh na kimuh leh sin khak/tuahkhak pilna (learning& experience) tampi ngah ding. Na pilna khang mahmah pah ding cihna hi. (Seek knowledge).
A Kammal pawl khat tungtawn panin thala ni: Cikmah in lungkia ken! Tuni hong haksa ding a,zingciang hong haksa zaw lai ding hi,ahi zongin athai ciang khuavak hongsuak ding hi. Nang ading gualzawhna ni hong tang dongin lungkialo in na hanciam nak leh gualzo ding cihna ahihi. Amen.
A thupi mahmah khat in Lungduaina ahihi. Jack Ma dinmun ah kei om hileng ka lungduaizolo mahmah dingin ka ngaihsun hi. Amah tuahhaksatna tuakkha hileng bangciang ka tung zen tam maw ka cici hi.Ahi zongin sum haupa mite zahtakpa asuak ma in, mite nawlkhinpa dinmun ah om a,tua lai takin aman lungduai takin ngak ahih manin agualzo ahihi.
Na sepna khat peuh ah paulap na hauhluat leh siatna lam amanawh na hihi. Khatveivei teh ei pen paulap vive tawh kikalsuan thei hi. Nasep thadah pian leh cina ki nei zeu, laisim thadah leh lutangna ki neih ect..hite in theilo kalin i nuntakna asusia lungno khat ahihi.
Tulai Zomi khangno te kawlgam buaina hangin Malaysia, Thailand,Singapore,Oman leh India ect cihte ah ki om meimai a, pawlkhat te na sep ding senpilo hang tawh lungkia thanem zong tampi ki om hi.Tuni in lungkia kei ni, ken bang sem thei ding Ansai ah na sep ngahzolo ka hih le kei ka zat phone tawh bangci na sem thei ding cih ngaihsut huai hi,banghang hiamcih le nuamtakin internet te ki zang ziahziah thei ahih manin i pilna tampi takte leh i theilo tampite kan hi leng zong sep ding tawmlo hi. Jack Ma hiciang atungna dingin amuhna pan in ki pan hi. Tua hih manin a omlo khat lah athupi mahmah khat ahih manin hanciam toto agualzo hilel hi.
Tuni in nang sungah pilna tampi om ahihna phawk inla asem thei agualzo thei na hihna te mangngilh ngei kei in. Duhhoplo ding tampi ametding ngaihsun masalo ding tua thupi mahmah hi. Ei pen na sem veve i hih le khasum tamna bek ut pah, na sep zong a olnono sep theina mun bek ki en den hi. Tun a na sep na bawl in tuzawh kum bang zah ciangin na inn kuan leh namailam adingin thupi ding hiam cih pen thupi zaw hi. sum ngah ding bek ciangin na sep sawmlo in pilna ngah lawhna dingin i sep ding, i sep sunsun siam sawm leng milak ah ki vallo ding hi.
Thukhupna: Hih thute i et ciangin nang zong na lungkiat kei aleh gualzawhna tawh aton khawmna hihi,na hanciam nak leh lawhcingna na khut sungah om ahihi. Mite muhna sangin nang leh nang na kimuhna nahanciamna thupi zaw hi cih pen na lungtang sungah vom tinten inla thathak hong la in Zomite Billioner ding na hihi.Topa zong masa inla na hun na vai khemepuh amah ap kawmsa in nong kalsuan nak leh gualzo takpi ding hi teh ci-in tha ala khawm hi hang lungdam.
Laigelh : Theophilus Khual
Laibu simkak te : “How Alibaba Jack Ma Building a Truly Global Retail Empire.2017
-Jack Ma Outlines Bold Vision For His Philanthropy Foundation. 2019.
Alibaba’s Jack Ma, China’s richest man, to retire from company he co-founded”. The Economic Times. 8 September 2018. Archived from the original on 25 December 2018. Retrieved 8 September 2018.
9.^ Choudhury, Saheli. “Alibaba announces Jack Ma succession plan: CEO Daniel Zhang to take over as chairman in a year”. CNBC. Retrieved 9 September 2018.
“Jack Ma”. Forbes. Retrieved 24 June 2022.”How billionaire Jack Ma fell to earth and took Ant’s mega IPO with him”. Reuters. 5 November 2020. Retrieved 23 November 2022.
thupi mahmah hi