Jackie Chan ii cih ciangin,ih mitkha ah,amah khui(Movie)om pah ziahziah in,muhnop ii sak mahmah khat ahihi. Kei bang ka neulai in,Nitak sangtuak ciang,video en thei zel in, Jackie Chan khui bang muhnop ka sak mahmah ,siamna lam leh ciamnuihna lam pa in,tha ka ngah mahmah khat ahih manin,amah tangthu pen athei nuam limlim ka hihi.
Jackie Chan pen Charles Chan leh Lee-lee Chan te sungpanin,7/4/1954 in Hong Kong ah suak aa,Ahaksa mahmah Inn kuan sungpan in hong khang khia ahihi.Nah-Wah Sangah tanlang hong kah in,Kum khat khit ciangin sang hong khawl aa,1960 Kum Jackie Chan Kumguk aphak in,A Inn Kuan un China nuntakna haksa lua ahih manin, Australia gam, Canberra khuapi ah hong peem uh hi. Australia gam hong tun ciangin,Anülehpå in Jingxi Pilna sin dingin HongKong ah kha kik aa Boar ah koih uh hi. Kum7 panin Kum 17 ciang acrobatics,singing,martial arts,cih te hong sintoto in sangnau pang khempeuh lak ah siampen,pilpen siate muan thei pen ding khat in hong om hi. 1976 Kum ciangin a Inn Kuan te omna Australia gam Canberra ah hong ciah in,Anuleh pa tawh hong om khawm aa,Dickson College ah sang hong zom in,sangkah kawmin,Inn bawlna lam ah na hong sem hi .
1/12/1982 in Joan Lin tawh hong ki teng uh a,ta nih nei uh hi .Atate min Jaycee Chan leh Etta Ng Chok Lam ahi uh hi.
1990 Kum bei lam in Chan in apa ii amin Fang ahih manin,Senmin tawh amaa min hong laih aa Fang Shilong hong ci hi .
1962-1975 Film ah aki helna
1962 Chan Kum8 aphak in Big and little Wong Tin Bar ah ki hel aa,1963 ciangin,The love Eterne ah hong ki hel aa,1966 in Come Drink with Me ah ki hel ,1971 Kum in “A Touch of Zen” ahuh in ki hel aa,tua khit teh Chu Mu’s Great Earth Flim Company te tawh bawl dingin singed hong thuh hi.
Chan in Bruce Lee film First of Futry (1972) Japanese Villain Hiroshi Suzuki te tawh ki thuahin,tua Bruce Lee film ah ahuh in om hi.Hih Film pen Ei Zomi ten’zong nak et mahmah hi hang … 1974 Kum in,John Woo’s The Young Dragon hih film ah taisia in hong zaih hi..
1978 ciangin Chan in She Xing Diao Shou (Snake in the Eangle’s Shadow) cih tawh amasa pen gualzawhna hong ngah hi..
1980 in Jackie Chan in , Hollywood ah azaih film ahih leh The Big Brawl ahihi.Tua film tawh Leitung ah hong minthang lua in$100miilions hong ngah hi .1981 tak ciangin “The Cannonball Run ” film ah ki hel kik hi. Kei bang muhnop kasak mahmah pen The Fearless Hyena hi aa,Ei Zomi sungah zong amulo tamlo dingin um ing…
1985 American nusia in,Sengam hong ciah kik aa,Chan ii movie pen Asia gam sung ah nakpi in ki zel lua mahmah ahih manin, Jackie Chan pen Sengam adingin, Film lam ah Aksi pi khat hong suak hi .Chan in asang kahpih alawm te nih tawh 1983 Kum in “Project A ” cih film hong bawl uh aa,Tua film tawh Hong Kong Film Award hong ngah uh hi..1985 kumciangin Police Story tangthu hong gelhin,film hoih mahmah khat hong suah khia a, 1985 ciangin Hong Kong Film Award hong ngah leuleu uh hi.
1988-1998 Hih hun sungin Fim tawh Hollywood ah mi in atheina leh agual zawhna te
1988 kumin,Chanin Drangons Forever film adingin,Anu nungpen in,Sammo Hung leh Yuen Biao hong zaih uh hi ..
1980 abeikuan lam leh 1990 Kum ki patlam in J.Chan in, Project A,Part 2 leh Polic Story 2 hong bawl kik uh aa,1989 in Hong Kong Film Award ngah uh hi . Tua khit ciangin,Armor of God II ; Operation Condor leh Police Story 3;Super Cop hi teng pen 1993 kumin,Golden Horse ah ahoih pen film ah ki hel hi.
1990 in Asia,Europe J.Chan ii film te ki nak deih lua mahmah(minthang mahmah) hi .1995 Kum, January kha ciang bang asum lut HK$500million (US$70miilion,¥39billion) bang ngah hi .Tua ban ah,1995 in Rumble in the Bronx cih film zaih in tua zong nakpi in gualzo hi .1996 kumin Rumble in the Bronx film panin asum ngah pen US$16,270,600 ngah hi.
1999-2007 Azaih khempeuh aneng atawngun gelh kei ni.A film zaih pen khawllo in nakzop mahmah aa, asum neihsa Palo ,1999 pan 2007 sung asum lut pen US$255 miilion ahihi .24/8/2007 in Jet Li tawh “The forbidden Kingdom” film zaih uh aa,2008 April kha in hong hawmkhia uh hi .
2010 in The Karate Kid Film hongzaih uh aa,Tua film tawh 2011 in Nickelodeon Kid’s Choice Award leh Favourite Buttkicker Award hong ngah lawh hi.Hih khui pen muhnop mahmah mivom Naupangpa tawh azaih pen ahihi. 2018 kumin,J Chan ii khuite Leitung ah aki deih penpen teng khensia aa tua lak ah film48 ki teelsak aa,Box Office panin,US$5 Billion ngah hi .
La lam tawh Gualzawhna
J.Chan pen Aneu panin,Lasiam aa,asangkahna ah zong lalam auk mahmah khat ahihi.1980 in Studio hong lut aa,HongKong leh Asia gam sungah amin thang mahmah khat zong ahihi .Leitungin atheina pen 2008 kumin, Olympic ah lasa in”We Are Ready”cih la tawh minthang leuleu hi .Kei bang Alasak ka thei na “Hard to say Goodbye”cihla asakna hi.
Pilna lam
1996 kumin,Hong Kong Baptist University panin Doctorate of Social Science tawh Gualzawhna hong ngah aa,2009 in University of Combodia panin,Honorary Doctorate ngah leuleu hi .2008 in Savannah College of Arts and Design in Hong Kong panin Honorary Professorship ngah hi.
Leitung in aphtawina (Awards) tam ngah lua ahih manin,ii gelh nawn kei ding aa,amah kammal manpha te tawh ii thu ii khup nuam hi.
Ka hai hangin,gilo hetlo hi ing..J.C
Khat veivei ciangin,mi khat nuntakna aki khel na dingin hehpihna ,khualna ki Sam hi
Ka na sepna hangin,mite alungdam ding bek ka ut hi.
Asiapen ding in,ka kigin khol mah bangin,ahoih pen ding zong lam en den ing
Hun ki khel ding ngakngak in om kenla,nang na ki khel ding hanciam in..
Na nuntakna pen nang mahin ,Asia in na bawl thei aa,Asia in zong na bawl thei hi.
Gualzawh lianpi ii ngah theina dingin,tupna lianpi ii neih kul hi..
Ka lung akiat ciangin, Bruce Lee film te in,amah Tung panin Pilna tampi sin ing…
Ka khialna kithei lopi in,hong kisap ciang ka nuam mahmah aa,ka ngaih sutna banglo..
Na khat peuhpeuh ka sep ciangin,atawp dongin,buai pih den ing,ka na sep peuhpeuh thupi takin, koih den ing..
Sumlehpaai te pen,thupi masalo aa,nahanciamna,nasep na bawl na ah na cih tak ding thupi masa hi ..
Ka kiim ah mipi te aom manin,ka hanciam na zah sangin,hanciam nopna tha hong Guan aa,ahoih pen dingin tha hong pia den hi.
Nuntakna pen haksa mahmah a,ahi zongin ii nungkik lohna dingin en ii tel thei hi..
Gualzawhna nungah aom haksatna te thupi mahmah hi .Agualzo mi khat ii anuntakna pen lungduaina,hehpihna,cihtakna,lungkiat theilo na cih te tawh aki dim ciang,Gualzawhna lianpi ngah pan hi .
Leitung khelsawm ken la ,na pumpi khelsawm in,.
Nuntakna ah athupi pen in,ngaih sutsiamna leh muna hoih nei na ahihi.Na ngaih sutna in,hong lawpsak ding aa,na muhna in hong tawsawn ding hi.
Thuakna tamsemsem leh ki muanna khang semsem hi.
Supngamna,sepngamna omlo in, suah takna om ngei lo ding hi.
Koikoi ah na om zongin,na pianna gam leh na minasa te na Sisan sungah koih den in,
Thukhupna leh Asim minal tha piakna
Jackie Chan ii cih pen atangthu ii sim ciangin,mi lawh cing mahmah khat ahihna ii tel ta hi.A hi zongin,amah nuntakna taktak pen nopsana,taih inn motor tawh hong ki pan peuh mahlo in,gallak sa lak ah,NUNTAK hamsa mahmah in,Mi gam mi lei ah sangkah kawmin nasem den khat ahihi.Hih tangthu tungpanin ii tha lak dingin,hi zahin Leitung ah migualzopa,milawh cingpa pen,ei mah bangin,nuntakna haksatna tawh hong kipan khiapa ahihi . Ahi zongin,asepna abawlna peuhpeuh ah cihtakna hong nei toto aa,hanciamna hong neitak ciangin,a enhuai mahmah khat suak hi. Nang leh kei zong migam milei ah nuntakna haksatna tawh tung kha mahni,J Chan te zong tua mah bang hi lel uh hi.Lungkia lo in,hanciamin,ii uk khat sem ni,tua ahih nakleh ei zong gualna mah ii ngah ding aa,mite adingin Aksi khat mah bangin ii tangveve ding hi. Australia ah aom lai un,hi ciang dinmun ah tung dingin ki lam en ngeilo ahihna bang J.Chan in Interview khat ah gen hi . Tua ahih manin tuni in, ih lungsim te sangsakin,ii muhna te zaihsak hi leng ei zong Gualzawhna pen aki ngah lua ding ahihi . Lungkiat hun bel tamsim tham ee ahi zongin kapa te ka nute hanciamna in,ka lungsim khauhsak kik hi cih pen Aman gen mun mahmah hi . NulehPa cihtakna hangin tate lungkia lo ahihna leh tate tha khauhsak ahih na zong NulehPa in phawk ciatni .
Nuntakna ii cih pen Sehnel gam keuna ah tui duh dangtakin,tuiphual azuan sakhi taltawh ki bang hi. Ih zon ding ,ii kan ding,ii manawh ding tampi om hi. Gualzawhna dingin bang lampi tawn leng hoih ding cih ngaih sutna ii neih ding ahihi. Ka tha ngah mahmah khat pen Anduh ciang bekin ,na sem ding Hilo in,nuntakna ding in na ii sep ding ahihi cih pen tha ngah penpen ing ei.
Asim mimal in tha lakna in nei ciatni..
Laigelh : Theophilus Khual
