Laisiangtho: A Gen Thu leh A Tupna
(The Bible: Its Subject and Purpose)
A. A Thu Bulphuhpi Zeisu Khazih
Laisiangtho sunga thu bulphuhpi pen Topa Zeisu Khazih ahi hi. Ahi zongin, Laisiangtho i sim ciangin Zeisu Khazih’ mimal leh a nasepna kicinnate lampi tuamtuam-a a kigenna kimu thei hi.
1. Piansakna Pa Zeisu Khazih. Piancilna Laisiangtho bul lam i et ciangin leitung kipiansakna khempeuh ah elohim cih min kizang Pa Pasian, Tapa Pasian, leh Khasiangtho Pasian kihel Pasian’ nasep ahihna kimu hi. Thuciam Thak i tun mateng na khempeuh Zeisu Khazih in a piansak ahihna teltaka a kigenna om nai lo hi (John 1:3). Colossians 1:16-17 ah, “Ahang in, na khempeuh ama piansak hi a: vantung le leitunga om nate, muh theih leh muh theih lohte, kumpi tokhomte ahi zongin, vangliatna ahi zongin, ukte ahi zongin, thuneite ahi zongin, na khempeuh amah in ama adingin a piansak ahi hi. Na khempeuh a om ma-in amah om a, ama sungah na khempeuh a kizom khawm hi” (ZIV) ci-in kigen hi. Tua bang a cih ciangin piansakna ah Pa Pasian leh Khasiangtho Pasiante kihel lo hi, a cihna hi lo a, ahi zongin piansakna ah Zeisu Khazih a pangpi ahihna a genna hi bek hi. Tua thu mah tawh kizui-in leitung vantung kicinna khempeuh in Ama’ khutma hong lak hi.
2. Leitung Ukpa Zeisu Khazih. Leitung vantung a piangsakpa Zeisu Khazih ahih mahbangin ukna zong nei pah hi. Laisiangtho sungah thuneihna lianpen Pa Pasian a kipiak hangin, Zeisu Khazih in leitung a uk ding Ama’ deihna hi, cih kimu hi (Late 2:8-9). Leii khempeuh in Khazih Topa ahihna pulaaka, khuk khempeuh Ama’ mai-a a khuk din ding Pasian’ deihna ahi hi (Isa. 45:23; Rom. 14:11; Phil. 2:9-11). Mihingte’ tangthu i et ciangin Pasian lehdona vive ahih ngiitngeet hangin (Late 2:1-2), ni khat ni ciangin Khazih thuneihna in leitung buppi a uk ni ding ngak gige hi cih zong kimu hi (Late 110:1). Zeisu Khazih na khempeuhte’ Topa ahih ni, mawhna thu a kikhen ni, Khazih thuneihna a kilat ni hong om ding hi (Kilaakna 19:15-16).
Ama’ deihna a tun nadingin Pasian in leitung kumpite a tokhom uh tawlkhat sung luahsak phot hi. Egypt, Babylon, Medo-Persia, Greece, Rome-a kipan kumpi gam tuamtuam khangin bei kik zel-a, ahih hangin kumpi gam nunungpen Khazih a maanna vantung pana kiphut ding kumpi gam hi ding hi (Dan. 7:13-14).
Minam khempeuhte’ tungah Zeisu Khazih kumpi a hih bek hi lo-in David’ Tapa ahihna tawh David’ kumpi tokhom tungah tu dinga, a diakdiakin Israel mite’ Kumpi hi deuh ding hi (Luke 1:31-33). Kum tul maang dingin hong hong pai kik ciangin hih thu hong kilang dinga, Israel gama kipan leitung buppi uk ding hi.
A thuneihna a kilatna mun khat bel pawlpi tawh a kizopna-a a lutang ahihna ahi hi (Eph.1:22-23). Leitung buppi, Israel , leh pawlpi tunga thuneipipa ahihna tawh (Eph. 1:20-21), mi khempeuh thukhenpa zong Khazih mah ahi hi (John 5:27; cf. Isa. 9: 6-7; Late 72: 1-2, 8,11).
3. Mihinga piang Thu ahi Zeisu Khazih. A diakdiakin Thuciam Thak sungah Zeisu Khazih pen mihinga piang Thu, Pasian’ hihnate pumpi-a kilang, Pasian’ pianzia leh a hihnate a kilaakna ahi hi. Khazih sungah Pasian’ tuampianna khempeuh, a diakdiakin a pilna, a vangliatna, a sianthona, leh a itnate kilaakkhia hi. Zeisu Khazih pen Thu hi a (John 1:1), Pasian bang hiam cih a kilaakkhiatna ahi hi. Pasian’ kilaakna dang tuamtuamte sangin Zeisu Khazih tungtawnin mihingte in Pasian a tel a khawkin thei thei zaw hi. Hebews 1:3 ah, Khazih in “Pasian hihna taktak a kilatkhiatna leh a minthanna taankhiatna hi-a, ama kammal vangliatna tawh na khempeuh a lenkip hi. Mawhnate siansak nading a bawl khit ciangin vantung Thupina taklam ah tu hi” ci-in hong hilh hi. A bawlsa mite’ tungah Zeisu Khazih tungtawna kilaak ding Pasian’ geelna bulpi khat ahi hi.
4. Honpa ahi Zeisu Khazih. Mihingte a kipiansakna leh a pukna uh tawh kipana van thak leh lei thak tawh a kikhum mihingte’ tangthu ah Honpa ahihna tawh Zeisu Khazih’ nasepna pen Laisiangtho thu laigilpi ahi hi. Zeisu Khazih pen Satan a zogawp dinga kikamciam numei’ suan ahi hi (Piancil. 3:15). Thuciam Lui sungah leitung mawhna a puakhia ding Jehovah Nasempa bangin na kigen hi (Isa. 53:4-6; cf. John 1:29). Mawhna kithoih nadingin singlamteh tungah si-in leitung buppi mawhna hangin thukhenna thuaka a sihna zong na kigen hi (1 Cor. 15:3-4; 2Cor. 5:19-21; 1 Peter 1:18-19; 1 John 2:2; Kilaakna 1:5). Honpa ahihna tawh mawhna kithoihna ahih bek tham lo-in eite’ Siampi Lianpa zong ahi hi (Heb. 7:25-27).
A mangthang mite’ ading Zeisu Khazih tungtawna hotkhiatna a piak ding pen Laisiangtho sunga i muh Pasian’ deihna laigilpi khat ahi hi. Tua mah tawh kizui-in Piancilna panin Kilaakna dong, Zeisu Khazih bek Honpa ahihna kimu thei hi (Sawltak. 4:12).
B. Laisiangtho Sunga Mihingte’ Tangthu
Laisiangtho’ tupna bulpi pen Pasian’ minthanna a kilat nading ahih mahbangin, tua tupna tawh kizui-in mihingte’ tangthu zong na kikhum hi. Piancilna bul lama piansakna thu mahmah zong Adam leh Eve-te a kipiansakna tawh na kikhum hi. Laisiangtho buppi in mihingte’ adinga Pasian’ ngimna leh tupnate hong lak hi.
Tua nunglam -a mihingte’ tangthu ah leitung minamte’ adinga Pasian’ tupnate thupi takin kilaak hi. Noah hun ciangin Adam leh Evete’ suan leh khakte tuiciin tawh kiphiat hi. Piancilna 10 ah leitung minam lian thum a katkhiatna Noah’ tapa thumte’ suan le khakte thu kikhum leuleu hi. Tua khit ciangin, Noah’ suan leh khakte zong na gina lo-in Babel Tausang ah thu na kikhena, Israel mite’ tungtawna a kilaak nading Pasian’ tupna a tangtungsak dingin Abraham na teel leuleu hi. Piancialna 12 pana kipanin Laisiangtho sunga thu paipi khat pen Israel mite a piankhiatna leh tua mite’ tangthu ahi hi. Thuciam Lui sung buppi phial pen Gentile mi tampite tawh teh nadinga a neu mahmah hih minamte’ thu vive ahi hi. Pasian’ geelna ah, ama’ suan leh khak tungtawna leitunga minam khempeuh in thupha a ngah nadinga Abraham’ tungah a kamciam khempeuh Zeisu Khazih in tangtungsak hi.
Thuciam Thak sungah, mihing kikhena lianpi khat hong khangkhia leuleu a, tua pen, Zeisu Khazih Honpa-a sang Jew-te leh Gentile-te kigawmkhopna Khazih Pumpi ahi pawlpi ahi hi. Tua ahih manin Thuciam Thak, a diakdiakin Sawltakte’ Tangthu leh laikhakte sungah Pasian leh pawlpi kizopna thu bekbek kigelh hi. Kilaakna bu bel hih thu khempeuh a kikhupna ahi hi. Kumpi gam lianpipite kizom-a a om toto – Egypt leh Assyria tawh kipana Babylon, Medo-Persia, Greece, leh Rome-a kizomsuak – pen Khazih a nihveina hong paikik ciangin vantung pana hong pai ding kumpi gam tawh kikhum ding hi. Tua kum tul maanna kumpi gam sungah Israel mite leh Gentile-te a kibangin om uh a, Messiah Kumpipa’ khutnuai ah Israel in a kikamciam bangin leitang nei takpi dinga, leitung minamte in kum tul maanna kumpi gam thuphate ngah ding hi.
Laisiangtho in a gen thu pen Zeisu Khazih hi a, ama’ minthan nading tupna leh leitung tangthu a genkhop hangin, Pasian’ tatna leh heekna bulpite bel minamte’ tunga a thuneihna a lahna, Israel mite’ tunga a muanhuaina a lahna, leh pawlpi tunga a hehpihna a lahnate ah kimu thei deuh hi. Hihte khempeuh a kikhupna bel tangthu khempeuh bei-a tawntung hun a kipatna van thak leh lei thak, leh Jerusalem khua thak ah kimu ding hi.
C. Laisiangtho’ Tupna
A kigelh Pasian’ kammal tawh kizui-in, leitung kipiansak cil huna kipan a gamlapen tawntung hun donga Pasian in a sepsa leh a sep lai dingte khempeuh in tupna khat nei hi. Tua tupna lian pen bel Pasian’ minthanna a kilat nading ahi hi. Hih tupna tawh vantungmite kibawl-a, tua minthanna a kilangsak dingin muh theih vantung leitung kibawl-in, Pasian’ lim leh meel sunin mihing zong kipiangsak hi. A kisittel thei lo Pasian’ pilna sungah mawhna nangawn na kiphal a, hih tupna lianpi a tangtun nading geelna tawh tatkhiatna hong kipia hi.
Pasian in a minthanna a lahkhiat ding pen ciangtan om lo ama’ kicinna tawh kituak mahmah hi. Mihing i cih kicing cih om lo den ahih manin mi khatpeuh in amah leh amah a kiminthansak ciangin zahpihhuai den hi. Pasian’ ading leuleu-in, a minthanna a lahkhiat ciangin a piansak mite’ ading ciangtan om lo thupha a om thumaan thutak a pulaakna leh a lahkhiatna ahi hi. A hihna ah Pasian kiciangtan lo a, a kicinna ah cingkim ahih manin, ciangtan om lo minthanna tawh kilawma, a piansak nate in ama’ a ahi pahtawina leh minthanna a cinga a lahkhiat kei leh bangmah tawh a kiteh thei lo thutan lohna hi pahlian ding hi. A minthanna a lahkhiatna ah Pasian amah leh amah a kipahtawi hi lo a, a bawlsa nate’ hamphat nadinga a minthanna a lakkhia hi bek hi. A piansak mite’ tunga a kilaakna hangin mite in a it taak a biak taak Pasian thei thei uh a, upna leh lungsim nop nading kingakna neisak-in, tuhun mahmah ading ahi a, tawntung hun ading ahi zongin hotkhiatna khamuanna pia hi. Mihingte in Pasian’ minthanna thei semsem le uh a ngah uh thupha lian semsem hi.
Laisiangtho i cih mihingte’ tunga Pasian’ thupuak ahih manin, Laisiangtho’ tupna lian pen Pasian’ tupna lian hi pah a, tua pen, a minthan nading ahi hi. Laisiangtho sungah:
1. Na khempeuh “ama piansak hi a: vantung le leitunga om nate, muh theih leh muh theih lohte, kumpi tokhomte ahi zongin, vanliatna ahi zongin, ukte ahi zongin, thuneite ahi zongin, na khempeuh amah in ama adingin a piansak ahi hi (ama’ minthan nadingin, Col. 1:16). Vantungmi leh mihing, muh theih leitung vantung leh nuntakna nei khempeuh, na khempeuh ama’ minthan nadinga kipiangsak ahi hi. “Vante in Pasian’ minthanna pulaak hi” (Late 19:1).
2. Israel minamte zong Pasian’ minthan nading mah ahi hi ( Isa. 43:7,21,25; 60:1,3,21; 62:3; Jer. 13:11).
3. Hotkhiatna mahmah zong Pasian’ minthan nading ahi hi (Rom.9:23). Pasian’ hehpihna a kilhatkhiatna hi dinga (Eph. 2:7), tu mahmah-in Pasian’ pilna a kilatkhiatna ahi hi (Eph. 3:10).
4. Nasepna kici khempeuh Pasian’ minthan nading a hih kul hi (Matt. 5:16; John 15:8; 1 Cor. 10:31; 1 Pet. 2:12; 4:11,14). Laisiangtho pahphot ngiat zong nasep nadinga Pasian’ mipa a kigenkholhsakna-a Pasian vanzat ahi hi (2 Tim.3:16-17).
5. Christian-te’ lungsimpuak thak mahmah zong Pasian a kiminthansak nading mah ahi hi (Rom. 5:2).
6. Thu-ummite’ sihna nangawn hih thu mah a tangtun nading ahi hi (John 21:19; Phil.1:20).
7. Hotkhiatna ngah mi peuhmah Pasian’ minthanna a luah khawm dingin hong kikoih hi (John 17:22; Col. 3:4).
A huampi-in en lehang, Laisiangtho pen leitunga laibu dangte khatpeuh tawh i etkaak ciangin a gen thu leh a tupna ah kilamdang liinlian hi. Mihingte’ dinmun leh hotkhiatna a ngah theih nadinguh hamphatna, amah bek Honpa ahihna tawh Zeisu Khazih pianzia leh nasep thupite, Pasian mahmah in a neih a ciangtan om lo minthannate a them a nengin gena, bangmah tawh kiteh thei lo-a a thupina kimu thei hi. A piansak mite’ tungah a Piangsakpa pulaakin, kicing het lo pi mah-in mihingte Pasian tawh kilemkikin a tawntunga a kipawlkhop theih nadinga a gelnate a laakkhia Laisiangtho bek mah om hi.
Dotna
1. Piansakna ah Khazih a kihelna bangci bangin kimu thei hiam?
2. Bangci lam danin Khazih pen leitung ukpipa hi a, Laisiangtho sungah bangci bangin kigen ahi hiam?
3. Bangci bangin Khazih pen Pasian’ kilaakna lianpen ahi hiam cih gen in.
4. Khazih Honpa ahihna a kigenna Laisiangtho munte gual-et inla, Thuciam Thak zong hel in.
5. Piancilna 1-11 sungah mihingte’ tangthu Laisiangtho in bangci bangin gen ahi hiam?
6. Bang deihna tawh Pasian in Abraham tel ahi hiam?
7. Bangci bangin Israel mite’ tangthu Khazih ah kikhum ahi hiam?
8. Thuciam Thak sungah bang tupna thak ki pulaak ahi hiam?
9. Tangthu sunga minam lianpite kuate ahi hiam?
10. Minamte, Israel, leh pawlpi tawh kisai Pasian’ tupnate khen sinsen inla gen in.
11. A minthanna a kilat nading Pasian’ tupna lianpen ahihna Laisiangtho in bangci gen ahi hiam?
Laigelh : Rev.Dr. Zam Khat Kham
