Laisiangtho Pasian Humuap

Laisiangtho: Pasian’ Humuap

(The Bible: Inspired of God)

Lai gelh mite Pasian mahmah in a makaihna tawh a humuap laibu cih theih ding Laisiangtho bek mah om hi. Pasian in Laisiangtho a humuam hi, i cih ciangin Laisiangtho gelh mite’ mimal lungsim puak ahi a, a laigelh zia tuamtuamte uh ahi zongin, ahih kei leh tua mite’ thupisak deuh thute mahmah ahi zongin susia lo-a Pasian in mite’ adinga a ngaihsut thute a kimin kizom paisuaka a kikhumna thu a gen nuam i hi hi. Laisiangtho a kigelhna ah Pasian in mihingte zang mah hi; ahi zongin tua mite in Pasian’ makaihna khut nuai ah amau mahmah in zong a gelh thute uh a tel khit loh phial uh hangin a thu mahmah thu khat-in luanga a kigelh laite mahmah ah Khasiangtho’ lamlahna a kilang ngiitngeet den bu 66 a pha Laisiangtho na gelh uh hi.

Tua ahih mahbangin, mihingte’ laikung-a kigelh ahih hangin Laisiangtho pen mihingte in mihing dangte’ kianga a gen thu hi lo a, Pasian in mihingte’ tunga hong gen thu ahi hi. Pasian mahmah in a malmal-a a gelhsak kammalte ahi a, tanglai thu kiciamtehte kitei kik ahi zongin, a gelh mihingte’ zonkhiat thute mahmah ahi a, a gelh mipa’ ngaihsutna, lunggulhna, leh lunghihmawhnate ahi phial zongin, a neng a tawnga a kigelhkhiatna ah Pasian in makaih-a Pasian in a gelhsak nop thute tektek mah kigelh ahih manin  Laisiangtho pen Pasian’ kammal taktak ahi hi. Lasiangtho mun khat leh mun khat a pianzia a kilamdan mahmah hun a om hangin Laisiangtho sunga kammal khempeuh a kikim liana Pasian’ humuap ahi hi.

Laisiangtho Pasian’ humuap hi cih thu pen leitung pianngei khenga piang thu khat ahih manin mihingte in tel haksa-in buaipih uh hi. Bangci bangin laigelh mihing khat in ama’ ngaihsutna leh theihnate  a gelh hi napi-in Pasian in a gelhsak nop thute a gelh hi thei mawk ding ahi hiam? Hih bang dotnate hangin, Pasian in laigelh mihingte bangzah in uk-in makaih hiam cih thu tawh kisai-in ngaihsutna tuamtuam om hi. Tuate “theories of inspiration” (Laisiangtho Pasian’ humuapna tawh kisai ngaihsutnate) kici a, Laisiangtho sima a khiatna a kan mi peuhmah in tuate lakah ah khat teiiteii zui hamtang hi. Laisiangtho khiatna kici peuhmah Pasian’ muapna tawh kisai ngaihsutna a kibulphuh ahih manin ngaihsutna maan i neih ding thupi mahmah hi.

A. Ngaihsutna Tuantuamte(Theories of Inspiration)

1. Verbal, plenary inspiration (A malmal-in a buppi-a Pasian’ humuap hi cih ngaihsutna). Pawlpi tangthu ah upna maan ci-a kiciamteh den pen Laisiangtho i cih a malmal-in a buppi-a Pasian’ humuap hi, cih upna ahi hi. A malmal-a humuapna i cih ciangin Laisiangtho a kigelh cil lai-in kammal zat ding a kitelna nangawn ah Pasian’ Khasiangtho in makaih hi, cih upna ahi hi. Tua kawmkal mah ah Laisiangtho i sim ciangin mihingte’ gelh a hihna lah kilang veve hi. Laisiangtho sunga laibu tampite ah a gelh mite’ laigelh zia leh kammal zatte tungtawnin a mimal pianzia uh kilang mahmah a, a ngaihsutna uh, a san ziate uh, a thungetnate uh, leh a lunghihmawhnate uh tungtawnin a mimal hihnate uh kilang mahmah hi. Ahih hangin, Laisiangtho sungah mihingte’ khutma a kilat mahmah zenzen hangin Pasian’ makaihna tawh kigelh ahih manin a kigelh kammal khempeuh a kikim lianin Pasian in humuam kim hi, cih thu mah kimu thei hi. Tua pen “a buppi-a” (plenary) cih kammal in kilangsaka, a khiatna taktak pen “a cinga humuapna” (full inspiration) cihna hi-in Laisiangtho a kim a lang bek Pasian in humuam hi, cih upnate tawh kilehbulh lian hi.

Orthodox upna maan bang hiam cih a kigenna ah a kitel dingin kammal tuamtuam zong kizang lai hi. Laisaingtho maan den hi cih thu a kigenna ah “infallible” cih kammal kizang hi. Laisiangtho sunga kigen thute peuhmah a kigelhna ah khialhna mal khat zong kihel lo hi, cih thu a kigenna ah “inerrant” cih kammal kizang leuleu hi. Laisiangtho sungah khatveivei mihingte’ thugen maan lopi khawng leh Piancilna 3:4 sunga i muh bangin Satan’ thugen zuauthu peuh zong om kha dinga, tua mihingte’ kammal ahi a Satan’ kammal ahi zongin a kikhumna ah ahi bang lianin kigelh a, ahi zongin Pasian in tua zuauthute kipsak hi, cih thu hi lo hi. Laisiangtho pen a malmal-in a buppi-a Pasian’ humuap hi a, a gen nop thumaan thutakte a kigelhna ah khialhna leh khum khialhna peuhmah kihel lo hi, i cih ciangin Pasian mahmah in leitung pianngei khengin cingtaka a makaihna tungtawnin Laisiangtho sunga kammal khempeuh Pasian’ thumaan thutak kigenna maan taktak bangin kimuang thei ding hi, cihna ahi hi.

Laisiangtho Pasian’ humuap a hihna i gen ciangin Laisiangtho a kigelh cilna bek a gen i hi a, a kiteisawnna, a kilehkhiatna tuamtuamte a gen i hi kei hi. Tuhun ciangin a kigelh cilnate (original manuscript) khat beek om nawn lo ahih manin mipilte in tu-a i neih Laisiangthote bangzah-in maan hiam cih bulkan mahmah uh hi. Tu-a i neih Laisiangthote pen Pasian’ thumaan thutak i theih theih nadinga a kigelh cilna panin maan taka kiteisawnte hi, kici thei hi. Kilamdanna neu nono a om tei hangin, Laisiangtho thupaipi peuhmah sukha ngei lo a, tanglai-a kigelh laite a kimuh beh semsem ciangin tu-a i neih Laisiangthote a maanna kilang semsem hi.

Hebrew kama kigelh Thuciam Lui leh Greek kama kigelh Thuciam Thakte Pasian’ Kammal taktak bangin san ding hi a, mihingte’ tunga Pasian’ gen nop thute a maan taka  a kigenna ahi hi.

2. Mechanical or dictation theory (Pasian in a malmal-a gelhsak hi, cih ngaihsutna). Pasian’ makaihna nuai ah mihingte’ pianzia leh mihingte’ laigelhnate mah kizang hi, cih Pasian humuapna tawh kisai upna maan tawh kilehbulh-in mi pawlkhat in Laisiangtho i cih pen Pasian in a malmal-a a gelhsak hi a, mihing laigelh i cihte mahmah zong khutlam tomkaih-a laigelh “stenographer” bang hi lel hi, ci uh hi. Pasian in tua banga a malmal-a a gelhsak takpi hi mawk leh lai kigelh zia leh kammal kizangte mahmah zong Laisiangtho buppi a kibatsuak hiau kul ding hi. Laisiangtho sung mun tampi ah a gelh mite in amau’ lunghihmawhna leh a lungsim-wa om bangbang, ahih kei leh Pasian in a hotkhiat nadinga a thungetnate uh kimu a, Pasian’ thumaan thutak a kikhumna kawmkal ah amau’ mimal hihna na thun zel uh hi, kici thei hi. Pasian in a malmal-a a sawl banga kigelh hi mawk leh Romans 9:1-3 sunga Paul in lungsim takpi-a a a thungetna bang in khiatna nei het lo ding hi.

Tua mah tawh kizui-in, Pasian’ humuapna in Laisiangtho kammal khempeuh a huam kim khit hangin, laigelh mihingte’ mimal hihna, laigelh zia, leh mimal lunglutnate nawlkhin tuan het lo hi. Laisiangtho sungah mihing’ gelh ahihna a kimuh theih mahbangin Pasian’ gelh ahihna zong kimu thei hi. Pasian in mihingte a makaihna tawh maan takin gelhsaka, a malmal-a gelhsakna mechanical process of dictation bel hi het lo hi. Laisiangtho sunga mun pawlkhatte bel Pasian in a gen bang liana kigelh hi a, ahih hangin a tamzaw-in a malmal-a genna tawh hi lo-in mihing laigelhte’ gelh ahihna kilang mahmah hi.

3. Concept theory (Ngaihsutna bek hu kimuam hi, cih ngaihsutna). Pawlkhatte leuleu in Laisiangtho Pasian’ humuap ahihna neu-gen gawpin Pasian in a kammalte hi lo-in a ngaihsutna bek uh humuam hi, ci-in mihingte’ nasep ahihna ung-gen uh hi. Ahi zongin hih bang ngaihsutna ah a buai huai thu tampi om hi; mihing laigelhte in Pasian in amaute’ tunga a pulaak thute tel khin lo ding uh a, amau’ kammal bek tawh a gelh uh ciangin khialhna pawlkkhat guang kha ding uh hi.

Pasian in mihing laigelhte  ngaihsutna bek pia hi, cih thu pen Laisiangtho tawh a kilehbulh ngaihsutna ahi hi. Laisiangtho kammalte mahmah ngiat Pasian’ humuap ahihna tamveipi tak kinakgen mahmah hi. A kammal mahmah a thupina ki gen pahpah hi (Paikhiatna 20:1; John 6:63; 17:8; I Cor. 2:13). Thuciam Lui sung a kilakikte zong John 10:34-35; Galatians 3:16 a i muh bangin a kammalte mahmah Pasian’ humuap banga a kingaihsutna kimu a, Ephesians 6:17; James 1:21-23; leh I Peter 2:2 sunga a gen bangin Laisiangtho pen Pasian’ kammal ahihna na kigen mun mahmah hi. Pasian’ kammal a lakhiate’ tungah hamsiatna a tun nading na kigen hi (Kilaakna 22:18-19). Hih “concept theory” bel Laisiangtho mahmah in a gen Pasian’ humuap ahihna ciang tung zo lo mawk hi.

4. Partial inspiration (Khen pawlkhat bek Pasian’ humuap hi, cih ngaihsutna). Laisiangtho sunga khen pawlkhat bek Pasian’ humuap hi, cih ngaihsutna tuamtuam zong om hi. Gentehna-in, mi pawlkhatte in Pasian’ thumaan thutak tawh kisai deuh Pasian’ pulaak thute a kigelhna munte hu kimuam hi a, tangthu, gamthu, leh nate’ thu kigelhna munte tua banga san theih ding hi lo hi, ci uh hi. Hih bang upna tawh kopkhawmin Laisiangtho mun pawlkhatte a mun dangte sangin humuap hizaw hi, cih ngaihsutna zong om lai a, tua ahih manin thumaan  leh a khial cih pen a phaciangtan khat-in khen uh hi. Hih ngaihsutna pen khatveivei, “mystical inspiration” a kici Pasian in laigelh mihingte a panpihna kikim khin lo a, a panpih hangin khialhna kihel lo dingin a gelh theih nading zah un panpih lo hi, cih ngaihsutna ahi hi. Hih bang ngaihsutna kici khempeuh ah a lai simte thukhen hi pahpah a, tua thu mah tawh kizui-in, Laisiangtho thuneihna pen Lasiangtho a sim mite’ thuneihna hong suaka, khat leh khat bang in thumaan hi a, bang pen thumaan hi lo hiam, cih thu ah kithutuahna om thei peuhmah lo hi.

5. Neoorthodox view of inspiration (Neoorthodox ngaihsutna). Kum zalom 20 a kipan Karl Barth makai-in Pasian’ kilaakna tawh kisai ngaihsutna thak khat hong pianga, neoorthodox upna kici hi. Laisiangtho kigelhna ah leitung pianngei khenga nasepna kihel hi, cih thu nial khin lo napi-in, hih upna in Laisiangtho sungah khialhna kihel a, tua ahih manin Laisiangtho pen a hi bangin kisang thei lo ding hi, ci uh hi. Neoorthodoxy upna ah, Pasian in Laisiangtho tungtawnin hong hopih mah a, eite’ tungah thumaan thutak hong gen nadingin Laisiangtho zang hi, ci-in ki-um hi. Tua thu tawh kizui-in, pakpalh hoih lihleh khatpeuh, nitum kuan etlawm mahmah khatpeuh in Pasian pen na khempeuh a piangsak Pa ahihna hong lah bangin Laisiangtho zong Pasian’ kilaakna hong luanna khat hi, ci uh hi. Hih bang upna ah Laisiangtho a sim mi khatpeuh in a sim thu tel-a, thumaan thutak a muh theih ciang bekin Laisiangtho a maan hi pan hi, ci-in um uh hi. Hih upna tangthu i et ciangin Laisiangtho in bang hong hilh takpi hiam cih thu ah mi khat leh a dang khat a san zia uh kibang lian cih om ngei lo a, “partial inspiration” ngaihsutna bangmah-in, bang pen a maan hi a, bang pen a khial ahi hiam, cih thu tawh kisai-in Laisiangtho a sim mite thuneipente suak hi.

6. Naturalistic inspiration (Laisiangtho pen laibu mawkmawk khat hi, ci a ngaihsutna). Uplohna lakah a uangpen hi a, Laisianngtho i cih laibu dang mawkmawk khat bang hi lel hi, ci a ngaihsutna ahi hi. Pasian in laigelh mite’ tungah a ngaihsutnate a genkhiat theih nadingin siamna tuam pia kha mah dinga, ahi zongin Laisiangtho i cih bel leitung pianngei khenga kigelh peuhmah ahi lo mihingte’ gelh laibu khat hi lel hi, ci uh hi. Hih bang ngaihsutna nuai ah Laisiangtho pen biakna thu kigelhna laibu dang khat suaka, a beisa huna mite in khathu-a a tuahkhak uh thute a kigenna tanglai ngaihsutnate a kikhumna laibu suak hi. Hih ngaihsutna in Laisiangtho Pasian’ thuneihna kici khempeuh beisaka, Laisiangtho a maanna lamdangte peuhmah gentel thei lo hi.

A tawpna ah, Laisiangtho sim mi peuhmah in a teel ding uh ahi hi. Laisiangtho i cih amah leh amah a kigen bangmah-in hu kimuam Pasian’ kammal, mihing laigelh kihel lo-a kigelh bang phial-a Pasian mahmah in a gelh a muanhuai lai bu maw, ahih kei leh a sunga kigen bang hi lo a, Pasian’ kammal a hi se lo maw, cih a teel ding ahi hi. Laisiangtho Pasian’ humuap ahihna a kipsak na tampi a omna kawmkal ah, a Laisiangtho amah leh amah a kigen bangin hi pah hi, cih thu mah a kilangpen thu ahi hi. A kammal leh a kamciamte a muang mi awn tampite’ nuntakna a khelna ah Laisiangtho a vangliatna kilang khin zo hi.

B. Zeisu Khazih’ Teci(The Testimony of Christ)

Laisiangtho Pasian’ kammal taktak hi, cih thu pen a Laisiangtho sung mahmah ah a kilatna tampite in hong laka, tua banah mite’ nuntakna zo-in a khel zawhna vangliatna mahmah in zong hong lak hi. Tuate khempeuh sangin Zeisu Khazih’ teci ngiat pen Laisiangtho Pasian’ humuap ahihna a kilatna thupipen ahi hi. Zeisu Khazih in Laisiangtho a gen simin – zong gen mun mahmah a – a thuneihna leh Khasiasngtho’ humuapna tungtawna hong pai ahihna tawh gen den hi. Matthew 5:18 sung bangah Zeisu Khazih in thukham sunga lai mal neupen nangawn tangtung lo cih bang om lo ding hi, ci-in gen hi. Tua bang a gen ciangin Hebrew lai-a mal neupen “jot” ahi a, laimal khat a khiatna a kilamdangsak thei a mal neupen “tittle” khat nangawn ahi zongin tangtung lo cih bang om lo ding hi, a cihna ahi hi. Tua bangin Pasian’ kammal a maan taktakna leh humuap ahihna pen a laimalte nangawn tawh kisai ahih teh Zeisu Khazih in Thucuam Lui buppi Pasian’ humuap ahihna a kipsak ahih lam kitel mahmah hi.

John 10:35 ah Khazih in “Laisiangtho kipelh thei lo” ahihna na gen hi. Thuciam Thak sungah Thuciam Lui a tangtunna kimu mun mahmah a, Matthew 1:22,23 bang i muh theih ding hi pah hi (Matt. 4:14; 8:17; 12:17; 15:7-8; 21:4-5,42; 22:29; 26:31,56; 27:9-10,35 te tawh enkaak in). Hih Matthew sunga i muhte mahbangin Thuciam Thak buppi ah zong kimu thei hi. Hun khat kikhel cih bang, ahih kei leh mihingte a ki-uk zia khat kilaih cih bangin a om zongin Laisiangtho thuneihna leh humuapna peuhmah kikhel ngei lo hi (Matt.19:7-12).

Topa Zeisu in Thuciam Lui sung pana a lakna munte i et ciangin Laisiangtho um lo liberal-te in a up loh uh Thuhilhkikna, Jonah, leh Daniel bute sungpan la mun deuh lai hi, cih kimu hi  (Thuhilhkikna 6:16 – cf. Matt.12:40; Dan.9:27; 12:11 – cf. Matt.24:15). Topa Zeisu a muan huaina leh a maanna i san leh Thuciam Lui humuap ahihna i san kul hi. Hih thu hang mah-in Pasian’ humuap thu a nial peuhmah in mihinga hong piang Pasian’ Thu nial pah uh hi.

Zeisu Khazih in Thuciam Lui humuap ahihna leh a khialh ngeih lohna kipsak bek lo-in, Thuciam Thak kigelh ding hi, cih zong genkhol lai hi. John 16:12-13 sungah, Zeisu Khazih van ah a kahtoh khit ciangin nungzuite in Khasiangtho’ tung panin thumaan thutak ngah ding uh hi, ci-in na hilhkhol hi. Zeisu in nungzuite pen thumaan thutak teci hi ding uh hi, ci-in genkhol hi (Matt.28:19; Luke 10:22-23; John 15:27; Sawltak. 1:8). Thumaan thutak a genna vuah a nungzuite Zeisu in thuneihna pia hi (Luke 10:16; John 13:19; John 17:14,18; Heb. 2:3-4).

Thuciam Thak a kigelh taktak ciangin zong a gelh mite in Pasian’ Khasiangtho in a makaih lamtak phawk gige uh a, a Lui mah bangin a kikimin hu kimuam hi, ci-in gen uh hi. David in Khasiangtho tungtawnin na gelh-a (Matt.23:43) Late laphuakpa hu a kimuap mahbangin (Heb. 3:7-11 cf. Late 95:7-11), Thuciam Thak zong hu a kimuapna amah leh amah na kipulaak hi. I Timothy 5:18 ah, Thuhilhkikna 25: 4 leh Luke 10:7 te hu a kimuapna a kibang lian ahihna kigen hi. 2 Peter 3:15-16 ah, Laisiangtho dangte bangmah-in Paul’ laigelhte zong Pasian’ kammal banga san ding ahihna kimu hi. Thuciam Lui bangmah-a humuap ahihna thu Thuciam Thak amah leh amah a kigenna kilang mahmah hi.

C. Humuapna Tawh Kisai Laisiangtho Mun Thupite(Important Passages on Inspiration)

          Laisiangtho Pasian’ humuap ahihna thu a kigennate’ laka a laigilpen mun bel IITimothy 3:16 hi a, tua lai ah, “Laisiangtho khempeuh Pasian’ humuapna tawh hong kipia hi a, thuhilh nading, tai nading, bawlphat nading, thumaan-a pattah nadingin manpha hi” ci-in na kigen hi. Hih lai ah Sawltakpa in “Laisiangtho” a cih ciangin IITimothy 3:15 a “Laisiangtho” a cih pen mah a gen nuam hi a, Thuciam Lui leh Thuciam Thak tegel huam hi. “Pasian’ humuapna” a cih kammal pen Thuciam Thak kigelhna Greek ah kammal khat bek hi a, “Pasian in hu muam” (God-breathed) a cihna theopneostos ahi hi. Hih bang a cih ciangin Laisiangtho pen Pasian’ tung pana hong paikhia hi a, Pasian mahbangin kicinna khempeuh nei hi, cihna ahi hi. Pasian peuhmah khialhna a piankhiatna hi thei ngiat lo ding hi. Humuapna i cih ciangin a laigelh mite a gen hi lo zaw-a a gelh uh Pasian’ kammal ngiat a gen nuam hizaw hi. Laigelh mite bel khial thei lua mahmah uh a, amau’ tungtawnin Pasian in a khial ngei lo Ama’ kammal piakhia a, Pasian’ vangliatna leh makaihna tungtawnin amaute’ gelhkhiat kammalte Pasian’ kammal taktak ahi hi, cihna ahi hi. Pasian’ kammal ahih manin thuhilh nading, tai nading, bawlphat nading, thumaan-a pattah nading in manpha hi.

A kidong mun mahmah dotna khat om-a, “Mite’ hihna bangbang mang kawminmite’ khut tawh gelhsak napi-in khialhna kihel kilkel lo Pasian’ kammal  a pian theih nadingin  bangci bangin Pasian in humuam thei ahi hiam?” cih dotna ahi hi. Leitung pianngei khenga Pasian’ nasepte bel kuama’ sittel theih ding hi kei na ve’n, ahi ta zongin, Laisiangtho sunga genkholhnate tawh kisai a gen kawmin 2 Peter 1:21 in i tel theih dingin hong hilh a, “Genkholhna peuhmah tanglai-a kipanin mihing’ deihna pana hong pai hi lo a, Khasiangtho thuzawhna bangbangin misiangthote in thugen uh hi” ci-in hong hilh hi. Hih lai mun a “thuzawh” cih kammal pen van khatpeuh i puakna thu a kigenna-a kizang kammal ahi hi. Gunkuang in a sunga tuang mite a tupna uh a tun nadinga a puak mahbangin Laisiangtho gelh mite zong Pasian’ tupna mun a tun dongun kipua hi. Gunkuanga tuang mite in suahtakna bangtan hiam khat nei-in gunkuang sungah a vak suk a vak toh theih uh hangin tua gunkuang in a tupna mun tun teiiteii ding hi.

Humuapna taktak pen mihingte’ tel zawh ding leh gentel theih ding hi lo ahih manin hih banga i genna kicing lo kha dinga, ahi zongin laigelh mihingte in amau’ thu-a a gelh uh hi lo a, amau’ hatna guak suang lo uh hi, cih bel kilang hi. Pasian in amau’ tungtawnin nasem-a, a kammalte humuamkhia hi. Laisiangtho mun pawlkhatte Pasian ngiat in a malmal-a a gen ngelhngelh zong om a, gentehna in Paikhiatna 20:1-17 sunga thukham a piakna bangte pawl ahi hi. Thuciam Lui in tamveipi tak, “Pasian in ci hi” (Piancil. 1:3) ci pahpah hi. A kimu mun mahmah kammal khat bel kamsangte khatpeuh’ tungah, “TOPA’ kammal hong tunga” cih ahi hi(cf. Jer.1:2; Hos.1:1; Jonah 1:1; Mic. 1:1; Zeph. 1:1; Hag. 1:1; Zech. 1:1). Khatveivei leh Pasian in mangmuhna leh mangmatna tungtawn peuh-in zong thugen thei a (Dan.2:1), khatvei leh mangmuhna tungtawnin kilang thei hi (Dan. 7:1). Pasian’ kilaak zia leh a kiim a paam-a thute a kilamdan kiukiu hangin, a kilaakna khempeuh ah thuneihna tawh thugen den-a, maantakin kilaakin khialhna kihel ngei lo hi. Tua mah tawh kizui-in, Pasian’ kammal in Pasian bangmah-in thumaanna a cingin nei hi.

D. Ngaihsut Ding Pawlkhat(Qualifying Considerations)

          Laisiangtho pen maan khin dena Pasian’ humuap hi, i cih ciangin, Piancil 3:4 sunga Satan’ zuau genna bangmah-in zuauthute zuauthu bangin kikhum hi, cih thu i  phawk den ding thupi hi. Job leh Thuhilhsia sunga i muh bangin mihingte’ tuahkhakthute leh ngaihsutnate ahi bangbangin kikhum hi, cih thu zong i phawk ding kisam hi. Hih bang munte ah Laisiangtho in a ngaihsut bangbang uh, ahih kei leh a gen bangbangua a khumte Laisiangtho mun danga thumaan thutakte tawh saikaak-a etkaak ding ahi hi. Hih thu tawh kituakin Job’ lawmte’ thugente pawlkhat a khialhna uh kimu pah a, Thuhilhsia sunga thuthuk kigente zong mihingte’ pilna tawh kigen ahihna zong kimu thei hi. Ahih hangin Laisiangtho sunga kigen thute peuhmah, Pasian’ hihna tawh kisai kilaakna ahi a, Ama’ sianthona kicing ahi zongin, mailam thu ding a genkholhna ahi a, tangthu, gamthu, nate’ thu ahi zongin a gen bangin a maan ahi hi. Pasian’ kammal a maanna teci lamdang mahmah khat bang bel, Laisiangtho gelh mite in tuhun-a nate’ thu a kimu thakthakte theikhol het lo leh tuate kigenna kammalte nangawn zong zang het lo napi-in mihingte in maan taktak hi ci-a a muhkhiat uh thute tawh a kitukalh khat beek a om nai lohna ahi hi.

Laisiangtho a maan mah ahi hiam ci-a dot theih nading thuhaksa pawlkhat zong om takpi mah hi. Khatveivei a thu a la a cinga a kigen loh manin, Jericho khua geia mittawte kidamsakna ah mun khat ah mittaw khat ci sek, mun khat ah mi nih a cih sekna (Matt. 20:30; Mark 10:46; Luke 18:35) leh Jericho khua sungah a lut laitak uh ci zel na pi-a (Luke 18:35) mun khat ah a pai khiat laitak uh a cih zelnate (Mark 10:46; Luke 19:1) bangin Laisiangtho amah leh amah a kitukalh ding tawh a kibat hun om thei mah hi. Hih bang munte lungduai taka ettel ding hi a, a thu a la a cingin kithei leh buai nading om nawn lo pah ding hi. Gentehna-in, Jericho kici khuapi khat bek om lo a, tanglai khuapi leh tua hun lai-a a khuapi ci-in khuapi nih na om hi. Khuapi khat panin Zeisu Khazih a pusuah laitakin a khat pen ah lut thei lua mahmah hi. Laisiangtho sunga khialhna kicite tampi tanglai thu a kante’ (archaeologists) muhkhiat thute in siangsak den hi.

Laisiangtho’ hong hilhnate tawh kitukalh cih ding zah-in kuamah peuhmah in leitung kipiansakna ahih kei leh mihing kibawlna, ahih kei leh tangthute khat peuhpeuh a bul balin a cinga thei a ki-om lo hizaw hi. Hoihtakin kitel hi leh Laisiangtho bel Pasian’ thumaan thutak mualsuang banga ding giugeu hi a, Laisiangtho a sim mi mal khat ciat’ tungah Pasian mahmah in a hopih banglian-a muan theih ding ahi hi. Laisiangtho neubawl ding leh suksiat ding a kihanciam den hangin, Pasian tawh kisai thumaan thutak a zong mite’ adingin khialhna kihel lo-a thuneihna kicing a nei Pasian’ kilaakna a kimuh theihna mun pen Laisiangtho mah hi den hi.

Dotnate

1. Laisiangtho Pasian’ humuap hi, i cih ciangin bang gen nuam i hi hiam?

2. Laisiagtho humuapna in bang ciang huam ahi hiam?

3. Verbal, plenary thumuapna i cih bang ahi hiam?

4. Laisiangtho bang ciangin khial ngei lo-in (infallible), khialhna kihel lo-a (inerrant), hih kammalte bang kigenna ahi hiam?

5. Laisiangtho sunga mihingte’ gen zuauthute tawh kisai bangci gentel ding na hi hiam?

6. Laisiangtho a kiteisawnte leh a kiletsawnte tungah humuapna bang ciangin om ding ahi hiam?

7. Mechanical/dictation humuapna a cih bang hiam cih gen inla hih ngaihsutna a kicin zawh lohna gen in.

8. Concept theory  tawh kisai a buai huaina pawlkhat gen in.

9. Partial inspiration ngaihsutna-a buaina pawlkhat gen in.

10. Humuapna tawh kisai-in neoorthodox upna leh a dangte a kilamdanna gen in.

11. Bang hangin naturalistic inspiration ngaihsutna nial huai ahi hiam?

12. Laisiangtho humuapna tawh kisai Zeisu Khazih in bangci hilh ahi hiam?

13. Thuciam Lui sunga thute a kigenkikna in bangci bangin Laisiangtho humuapna kipsak ahi hiam?

14. Pasian’ humuap ahih vevena Thuciam Thak sungah bangci bangin kigen ahi hiam?

15. 2 Timothy 3:16 in hong hilh thute cngtakin gen in.

16. Humuap zia tawh kisai-in 2 Peter 1:21 in bangci bangin hong gentel ahi hiam?

17. Laisiangtho amah leh amah humuap ahihna bangtanin kigen ahi hiam?

18. Job leh Thuhilhsia bute sunga i muh bangin mihingte’ tuahkhak thute leh ngaihsutnate a kigelhnate leh humuapna bangci bangin kizom ahi hiam?

19. Laisiangtho sunga a kitukalh ding tawh a kibang thute bang cih ding i hi hiam?

20. Laisiangtho Pasian humuap hi, cih thu a buppi-a a ngaihsun hi lehang, a thupina bang ahi hiam?

Laigelh : Rev.Dr. Zam Khat Kham