Laisiangtho: Pasian’ Kammal
(The Bible: The Word of God)
Laisiangtho a sim denkeii khol lo mi khat nangawn in Laisiangtho a sim ciangin laibu tuampianpi khat a sim ahih lam kiphawk pah hi. Mihingte’ tangthu kum tul tampi huama, a gelh mihing sawm li val bang a hih hangin, Laisiangtho pen lai kigelhsa pawlkhat a kikaikhawm pongmawk bang hi lo-in, a thu luan khata luang laibu khat ahi hi. Laisiangtho i cih Mangkamin “Bible” kici a, Greek kammal biblos pana piangkhia hi a, “laibu” cihna ahi hi. A tuampianna bulpi bel laigelh mihingte’ gelh ahih hangin Pasian’ kammal taktak ahihna hang ahi hi.
Laisiangtho Pasian’ kammal taktak hi cih thu a kilang mahmah thu nih tawh kigen thei hi: (1) a sunga kilang thu (internal evidence), Laisiangtho sung mahmah a thute leh Laisiangtho mahmah in Pasian’ kammal a hihna amah leh amah a kigenna; (2) a pualama kilang thu (external evidence), Laisiangtho sunga kigen thute in leitung pianngei kheng pianzia a neih lam hong lahna, cihte ahi hi.
A. A Sunga Kilang Thu(Internal Evidence)
Laisiangtho mun za tampi ah Laisiangtho Pasian’ kammal ahihna kipulaak, ahih kei leh Pasian’ kammal banga ngaihsutsa-in nei-in kigen hi (Thuhilhkikna 6:6-9,17-18; Josh. 1:8; 8:32-35; II Sam. 22:31; Late 1:2; 12:6; 19:7-11; 93:5; 119:9,11,18, 89-93,97-100, 104-105, 130; Paunak 30:5-6; Isa. 55:10-11; Jer. 15:16; 23:29; Dan. 10:21; Matt. 5:17-19; 22:29; Mark 13:31; Luke 16:17; John 2:22; 5:24; 10:35; Sawltak. 17:11; Rom. 10:17; I Cor. 2:13; Col. 3:16; I Thess. 2:13; II Tim. 2:15; 3:15-17; I Pet. 1:23-15; II Pet. 3:15-16; Kilaakna 1:2; 22:18). Laisiangtho ngiat in amah leh amah Pasian’ kammal ahihna lam tampi tawh na kipulaaka, mikim’ tel dingin na kigen hi. Thuciam Lui a gelh mite, Thuciam Thak a gelh mite, leh Zeisu Khazih mahmah in Laisiangtho pen Pasian’ kammal-a a ngaihsut ngiatna uh kilang mahmah hi. Gentehna-in, Late 19:7-11 in Laisiangtho pen Topa’ kammal ahih luatna leh a kicinna nam guk tawh kituakin mihingte’ nuntakna a khel theihna nam guk mah na khilsuk ngekngek hi. Zeisu Khazih mahmah in thukham peuhmah tangtung pelmawh ding hi, ci-in na pulaak hi (Matt.5:17-18). Hebrews 1:1-2 in Thuciam Lui hun lai-in Pasian in kamsangte zangin Pasian’ kammal a na gen bek hi lo-in Thuciam Thak hun ciangin Ama’ Tapa mahmah zangin thu gen hi, ci-in hong hilh hi. Laisiangtho Pasian’ kammal ahihna a nialte Laisiangtho ngiat a nialte hi pah uh hi.
B. A Pualam-a Kilang Thu(External Evidence)
Laisiangtho in amah leh amah Pasian’ kammal ahihna a kipulaak bek hi lo-in Laisiangtho a um lopente nangawn in a lungsim a khel zawh nadingin Pasian’ kammal ahihna thu tampi-in kilang hi.
1. Laisiangtho thu a kizop paisuakna. Laisiangtho tawh kisai a lamdangpen thu khat bel kum tul leh kum za guk huam sunga nungta mi 40 val in a gelh uh hangin laibu bu khat bek mah hi a, bu 66 a kikaikhawm pongmawk hi lo hi, cih thu mahmah ahi hi. Laisiangtho a gelh mite’ nuntak zia a tuamtuam hi a, kumpi, lokho mi, thu thuk ngaihsun mipil, ngabeng, zato siavuan, leitung ki-ukna makaipi, laithei mipil, laphuaksiam cih bangpeuh hi ziazua hi. Minam ngeina kilamdang mahmah tampi sunga tuahkhak sinkhak thu tuamtuam tampi a nawk mite hi uh a a mihing pianzia mahmah uh zong a kilamdang mahmah mite ahi uh hi. Ahi zongin tua mite’ gelh laibute a kikaihkhopna Laisiangtho pen Piancilna panin Kilaakna dong thu khatin luang tansuak hi.
Laisiangtho sunga thu khata luang thute i et ciangin van leh lei kipiansakna tawh kipan-a tuhun ciang dong, tua panin van thak leh lei thak a kipiansak hun ding ciang dong huam hi. Thuciam Lui sungah Pasian’ pianzia mahmah, mawhna thu, hotkhiatna thu, leitung buppi ading Pasian’ gelna, Israel mite adinga Pasian’ gelna, pawlpi adinga Pasian’ gelna cih thugilte kimtakin kisuut khin hi. Thugilte peuhmah kibulpat mahmah-in damdamin kisuut toto a, a tawpna ah kimtakin kigen hi. Type kici limte a kawk nop thute tawh kilak pahpah a, genkholhnate zong a tangtunna kimu pah hi. Laisiangtho sunga kigen tansuak thu bel vantung leitunga a kicingpen ahi Topa Zeisu Khazih mah hi a, a kilam-etna, hong pianna, a kisanna leh a kipahtawina cihte cingtakin kigen hi. “Pasian’ lo humuapna” longal in laibu khatpeuh tuabangin a thu kizom paisuaksak thei ngei loding hi. Tua mah tawh kizui-in Laisiangtho um mi peuhmah in Laisiangtho bute mihingte’ gelh ahihna thei gige sa-in, Khasiangtho’ makaihna leh humuapna bek tawh tua bangin thu khata luang thei ahihna thei uh hi.
2. Laisiangtho kilaakna in bang ciang huam. Thumaan thutak a laakkhiatna ah Laisiangtho in ciangtan nei lo hi. Gamlapi etna telescope bangin vantung a sanpenna panin hell a thukpenna donga Pasian’ nasepnate a patna panin a tawpna dong huam khin hi. Nate a gol-a kimuh theihna microscope bangin Pasian’ ngimna leh gelnate leh a bawlsa nate a kicinna a them a nengin lak kim hi. Stereoscope bangin leitung vantunga na khempeuh amau’ mun ciat ah khat leh khat kizopna maan diimdiamin koih kim hi. Laisiangtho sunga laibu tampite a kigelh hun sawt mahmah napi-in, mihingte’ khantoh nai loh hun lai-a a na kigen thute leh tuhun a mite’ pilna a khan mahmah khit huna a zonkhiat uh leh muhkhiat uh nate a kitukalh om lo-a, tanglai peka kigelh thute leh tuhun thute kituak denkeii mawk hi. Kilaakna thu ah Laisiangtho pen mihingte’ muhkhiat thute sangin thukzaw dena, a beisa tawntung hun leh mailam tawntung hun dong huamin Pasian bek in a theih ding thute ahi hi. Leitung bupah Laisiangtho tawh kibanga thumaan thutak a pulaak kim laibu khat beek om lo hi.
3. Laisiangtho’ thuzawhna leh a kikhetkhiatna. Leitung ah Laisiangtho zah-a minam tuamtuam leh minam ngeina tuamtuam adinga kampau nam tampi-a kikhen laibu om ngei lo hi. Laikhetna a kibawl cil-a kikhen masapen laibu Laisiangtho mah hi pah hi. Leitunga kampau thupi kici peuhmah-in Laisiangtho bu awn tampi kikhen khina, lai-a kigelh kampau kici peuhmah-in Laisiangtho buppi ahi kei zongin khen khat beek cihbang kikhen khin hamtang ta hi. French mi Voltaire banga a um lo mite in khang khat sungin Laisiangtho kiphawk kha nawn lo ding hi, ci-in gen uh-a, kum zalom 20 sunga mi pawlkhat in Laisiangtho pen a sawt lo-in a kimangngilhcip laibu khat suak ding hi, ci-a a genkholhna uh a om hangin nidang sang nangawnin tam kikhen zaw a, kampau nam tampi-in kikhen semsem zawlai hi. Biakna dang pawlkhatte a zui mi tam mahmah, Christian-te sang nangawnin tamzaw kha ding uh a, ahih hangin kuama’ biakna peuhmah in Laisiangtho banga lai-a kigelh kilaakna kician nei lo uh hi. Tuhun ei khang nangawnin Laisiangtho in mite a thuzawhna tungtawin mihingte’ nuntakna kikhelkhel lai tazen hi. Thu um lo mi khat adingin “Khasiangtho namsau” hi a (Eph. 6:17), thu-ummi khat adingin a sawpsiang, a siangthosak, a thahat vangliatna ahi hi (John 17:17; II Cor. 3:17,18; Eph.5:25-26). Tuni dongin thukhun upadi leh gamtatna khempeuh a uk Laisiangtho mah hi veve hi.
4. Laisiangtho sunga kigen thu. Cikmah-a kithei ngei lo thute leh a kithei ngei lo ding thute a gen mahbangin a kitheisa thute zong a genna ah Laisiangtho a tuampianna kimu thei hi. Mihingte’ pian ma-a van leh lei a kipiansakna-a kipan a beisa tawntung hun thu zong gen hi. Pasian’ pianzia leh a nasepte zong kilaak hi. Laisiangtho’ genkholhna ah leitung ading, Israel mite’ading leh pawlpi adinga Pasian’ gelnate kihel-a, tawntung hun tawh kikhum hi. A gen thu khatpeuhpeuh ah thuneih tawpna tawh gena, a gennate maan kimin, hun khempeuh ading hi pahpah hi. A sim mi peuhmah in a tel theih dingin kigelh ahih manin a sim mi peuhmah tuhun leh tawntung hun dong adingin pilsak hi.
5. Laibu khat bangin ngaihsunin gen lehang. Laisiangtho pen a kigelhsa laibu khat bangin ngaihun-a en hi lehang zong laibu khempeuh lakah tuampianin lamdang lua mahmah hi. Tangthu kisuut diudeu bek hi lo-in mailam hun ding genkholhna nangawn aneng atawngin om-a, la ngaih nono leh drama tuamtuam, ki-itna leh gal-a kidona tangthu, leitung mipilte’ ngaihsutna tuamtuam leh Laisiangtho thumaan thutak, cih bangin a thu a la mahmah kicing lua mahmah hi. A gelh mi a tam mahbangin a kigelh thu zong namkim mahmah hi. Laibu dang khat beek mahmah mihing hih zah in sim ngei lo a, a haipen panin a pilpen dongin a sim laibu ahi hi.
6. Guptuam paihtuam a nei lo Laisiangtho thuneihna. Laisiangtho mihingte’ gelh ahih hangin mihingte’ hoihna bek gen lo-in kuamah gumtuam lo hi. A hoihpen kicite’ mawhna leh ginat lohnate nangawn im lo-in gen khin lel-a, amau’ gamtat hoihna a suangte a tawpkhakna-a a siatmang nading uh siangtakin hilh hi. Mihingte’ laikung zanga kigelh ahih hangin mihingte’ adinga mihingte’ thu kigelh hi lo a, Pasian’ tung pana mihingte’ adinga kigen thute ahi hi. Khatveivei leitunga thupiangte leh mihingte’ tuahkhak thute a kikhum hangin vantung leitung thute, muhtheih muhmawh thute mah zong gena, Pasian mahmah’ thu, vantungmite’ thu, mihingte’ thu, hun leh tawntung thu, nuntakna leh sihna thu, mawhna leh hotkhiatna thu, vantung leh hell thute thuneihna kicing tawh siangtak teltakin gen sinsen hi. Mihingte in gelh dingin ngaihsun hi leh tua bang laibu peuhmah gelh thei lo dinga, gelh thei ding hi phial mah leh zong, Pasian’ lamlahna lo-in, gelh ngei lo ding hi. Tua thu mah tawh kizui-in, Laisiangtho i cih pen mihingte’ gelh ahih hangin, Pasian’ kiang pana hong pai kiciatna, khamuanna, leh nopna (lemna) thu ahi hi.
7. Bangmah tawh a kiteh thei lo Laisiangtho’ pianzia. Thu dang khempeuh sangin, Laisiangtho i cih pen a Tapa’ sunga kilang Pasian’ hihna leh minthanna hong lak leitung pianngei khenga hong kipia laibu ahi hi. Zeisu Khazih bang mi peuhmah mihingte’ phuahtawm hi ngei lo dinga, a kicinnate leitunga a pilpen leh a siangthopente nangawn in a tel zawh ding hi lo hi. Laisiangtho bangmah tawh a kiteh theih lohna pen bangmah tawh a kiteh thei lo Zeisu Khazih sunga kilaak tangthu in hong lak hi.
Laisiangtho pen mihing’ khutma leh Pasian’ khutma kigawmkhopna ahih mahbangin, a kigelh Thu leh a nungta Thu ahi Zeisu Khazihte a kibatna kimu thei hi. A kipatkhiatna vuah leitung pianngei khenga kipan uh hi a, a kikhenkhia thei nawn lo ding mihing leh Pasian’ nansepte kigawmkhawm tuak ahi hi. A um mite’ nuntakna khel tuak uh a, a um lo mite in a ut bangbang vua a nial theih dingun Pasian in phal lel zel hi. A kawk baang lo, a kiam ngei lo Pasian’ kicinnate tawh kidim tuak uh hi. Tua tegel sunga kilaaknate naupangno khat nangawn in a tel zawh ding zah-in telnop a, a ciangtan om lo Pasian’ pilna leh theihtelna manphate mahbangin kuama’ tel khit zawh ding lah hi lo kawikawi-in amaute’ pulaak Pasian mahbangin a tawntunga om dingte ahi uh hi.
Dotna
1. “Laisiiangtho” (Bible) cih kammal khiatna bang ahi hiam?
2. Laisiangtho Pasian’ kammal hi, i cih theih nadinga a kilatna thu nihte bangte hiam?
3. Lasiangtho amah leh amah Pasian’ kammal banga a kingaihsutna ahih kei leh tua banga a kigenna Thuciam Lui sungah mun 5, Thuciam Thak sungah mun 5 gen in.
4. Late 19:7-11 sunga Pasian’ kammal a kicinna 6 leh tuate tawh kituak Pasian’ thu in mihingte’ nuntakna a khelna thu 6 gen in.
5. Bang hangin Laisiangtho sunga thute thu khata a luanna pen Pasian’ humuapna a kilatna hi se hiam?
6. Laisiangtho sunga thu khata luang thu pawlkhat bangte hiam?
7. Thumaan thutak kilaakna thu ah Laisiangtho leh laibu dangte a kilamdanna bang ciang taktak ahi hiam?
8. Laisiangtho bu tampi a kikhetkhiatna leh mihingte’ nuntakna a khelna bangci-in kizom ahi hiam?
9. A sunga kigen thute leh Laisiangtho leitung pianngei khenga kigelh laibu ahihna thu a kizop zia gen in.
10. Laisiangtho pen lai kigelh khatpeuh bangin ngaihsun lehang bangci bangn tuampian ahi hiam?
11. Laisiangtho sunga guptuam paihtuam nei lo-a kigen thute leh mihingte’ gelh ahihna bangci bangin kingaihsun khawm thei ding ahi hiam?
12. Laisiangtho pen leitung pianngei khenga kigelh laibu ahihna leh Zeisu Khazih mahmah leitung pianngei khenga piang mi khat ahihna genkaak dih in.
laigelh : Rev.Dr. Zam Khat Kham
