LAISIANGTHO PASIAN THUBU
(Holy Bible Book Divine)
✍️ Rev. Dr. Simon Pau Khan En
Khristian te- in sihsih nunnun a Pasian thubu hi, ci- a i up i san i Lai Siangtho pen bang a cih leh Pasian thu hi, ci thei i hiam? Atom in i en ding hi. 2 Tim. 3: 16 ah Lai Siangtho pen, ” Pasian lamlahna a hong kipia” ciziau hi. Dau zek hi. Mang Lai Siangtho te ah ‘Humop’ na kici hi. Thu Ciamthak (NT) a kigelh masak na Greek kam in bel(εμπνέω-) kici in tua pan in Rome – Latin pau in inspiratus hong kizang in tuapan khat veimah mangkam (English) in inspiration cih na kizang a, a khiatna, a cihnop na taktak in ” hu mop” a cihnop na linlian a hi hi. Mi nak thei nawn lo khat a nak pan
maw, akam pan maw, hu i mop ( breathe into) leh a hong nak kik leep leep theih a gen nuam a hi hi. (All scripture is inpired by God….II Tim 3:16 RSV)
Tua hi a, thu um mite- in i sihpih ngam Lai Siangtho Pasian Thubu pen Pasian lamlah na cih ziau sangin a ciik zaw in Pasian in Lai Siangtho gelh te a humopna ( inspiration) pan a hong po khia Pasian Thubu, hi, a cinuam i hihi.
Tua a hih man in hih Lai Siangtho gelh te bangci humop hiam, cih thu li i en ding hi. Et taak hi. A hang in hih thubul ( theory) te in thu um mite dinmun hong ki khen sak zo hi.
Tua humopna thu ( theory) li te- in :
I. KAM TAWH LAISIT IN SIT
( Verbal or Dictation theory)
Lai Siangtho gelh ding te kiang ah, Khaileh! na ki ging uo, manta maw, ” A kipat cil in thu a om hi. Thu in Pasian a hi hi….” cih bangin amal amal in naupang te laisit bang in sit hi, ci in a um a sang pawl om hi. Tua bang hi liang kei veh aw, a ci kha om leh Pasian kammal nial, Pasian kammal nial, ci- in tangteel sihtan bang in ki tom pah leuleu zawzen uh hi. Lai Siangtho nunglam a ompa, Lai Siangtho in teci a panpa Jesuh Khrih phawk nawn lo- in a laimal bek tawh nitum sawm uh hi. ( Johan 5: 39) Hi bang a, a laimal bek a suang te thu cik lak a, a luanglet te, thubul uang sante( ultrafundamentalist) zong kici in kuamah tawh kipawl thei mel lo uh hi. A thupom dan mahmah ah zong mihing pen Pasian’ laikung ( ball pen) bek suak mawk a hih man in Mechanical theory peuh zong kici thop thop hi.
II. SIAMTAWP A GELHKHIAT
( Intuition Theory )
Khristian pawl khat te san dan ah, Pasian in mihingte siamna kici talen a tuamtuam tek pia in pawl khat te lai- at, laigelh siamna pia hi. Tua te- in gelh gelh in a siamna uh a sang pen ( their best) a tun uh ciangin khawl uh a, nungciang un Lai Siangtho ding in kiciamteh kikipsak hi, ci- uh hi. A hih dekdek na ciang om a, a hi zong in hi khin lo zel hi. Gentehna in lai at siam minthang vangvang William Shakespeare (1564- 1616) in lai gelhgelh in a hoih pen leh asang pen a tun ciangin khawl in a nung sang ciang in Lai Siangtho in kisang, kiciamteh ki kipsak (canonized) hi cih nopna a hi hi. Pilna siamna a bulphuh phadiak mi tawm khat te’n hi bang in asang thei phial uh zong in hibang lian hong hi leh bel leitung ah pianpih laigelh siam talen nei tamlua mah a hihman in i Lai Siangtho ding hong tam lua zel ding hi.
III KHUAPHIA LEP THEORY
( Illumination Theory)
Pasian in Lai Siangtho gelh ding a, a deih te pen khuavak (illumination) pia a, pia paisuak lo- in khua phelep ( lightning) bangin piakhun khawl hun nei in tua khuavak apiak hun in
Lai Siangtho at saisai, at saisai in khuavak amih ciangin khawl saisai leuleu uh cih theory a hihi. Mit zel, taang zel, cih) theory apom thei a om kha phial zong in ngaihsut na man ( logical) tawh san ding in pom hak hi. Bang ding a taanna, khuavak ( illumination) taang suak hoh lo hiam, meiman ( meter) tam bei lua ding a hi hiam, cih dot huai hi.
4. A KHAUH PAI HUMOPNA
(Dynamic theory)
A tung a humopna theory thum te a pom kiukiu a om kha zong in kicing kim lo- a hih man in a Khauhpai Humopna (dynamic inspiration theory) cih i en ding hi. Khauhpai humop theory i cih in Lai Sianung tho gelh theih na ding in Pasian leh Mihing te- in panmun neitek uh a tua a neih uh pan ( role) hong lak tuak uh ciang bek in A khauh pai Humop na hong piang thei pan hi, cih a hi hi. Tua PASIAN PANMUN le MIHING PANMUN i en zual ding hi.
A. Pasian panmun
( divine element)
Lai Siangtho ong pian khiat theih na ding in,
1. Pasian hong kilat khiatna ( Revelation) kisam masa kuikui hi. Khristian Pasian pen a hong kilang khia Pasian (the revealed God) a hihi. Thuciam Lui ( OT) sung ah Pasian leh mihing te pen a kihal, a dang suak uh hi- a, Pasian pen “batlah Pasian” ( transcendental God) a hi hi.Thuciam Thak (NT) sung ah bel, Pasian pen Jesuh ah mibang a hong pianna ( incarnation) hang in “tual tang Pasian “( immanence, Immanuel) hong suak hi. Khristian biakna hong pian khiat theih na dingin hih thu in thugil pen leh thu masa mawng mawng a hi hi. Tua ahih man in Scotish theologian minthang John Baille (1886- 1960) in, “Piansak na dang khempeuh in Pasian vangliatna hong lak khia a, (Late 19 : 1) Jesuh Khrih in bel Pasian lungtang (the heart of God) hong lak khia hi” ci hi.
2. Lamlah na ( Guidance)
Lai Siangtho gelh te- in agelh uh ciang in a laigelh uh lampial in athu uh a paang len khak loh na ding in Pasian in amaute lam lak hi. Lai Siangtho gelhna, gelh sawnna ( deciphering) leh kampau khat pan kampau dang khat ah teina ( translation) te ah Pasian in lamlak hi.
3. Cinna leh kepna (Care)
Lai Siangtho pen olno tak leh baihno tak a, a na kigelh a na ki at leh a na kitei hi hethet lo- in luangkham in mi tampi in na sih lawh hi. Ahi zong in Topa Pasian in tua bang mite nusia lo- in cing in, kem hi.
B Mihing te Panmun
( Human element)
Mihing te pan mun pan in Pasian hong ki lahkhiatna te sangin nuntak pih in phutkhakna ( experience) in nei uh a, tua pen kum bang zah hiam sung kam tawh ki hawm kawikawi ( oral transmision) phot uh hi.
1. Lai tawh gelhna (Record)
Kam tawh a ki khakkhak khit uh ciang in laisiam te in lai in na gelh uh hi. Lai a, a gelh ciang un zong amau hun lai-a kizel ngaihsutna (thought- forms) te mah na zang uh hi. Tua hun lai- in numei te aniam zaw deuh ah na ki koih in pasal te pen a sang zawdeuh( male dominate) a, a kikoih hun a hih man in kikhopna hun sung nangawn ah thugen khuan ngah lo uh hi.( I Kor.14 : 34 – 36) Hi bang dan in amau hun a thu omdan ( socio-culture) zui a agelh a-at te – uh Kha Siangtho Pasian lamlahna mah tawh a hunhun in kan tohtoh ding a hi hi.
Hih Lai Siangtho gelhna i gen ciang in i phawk ding khat in ” laigelh te” hi-a, Lai Siangtho sung ah bel ” lai thei te ” ( scribes) te a hi hi. Phariseea te leh laithei te, ci in na kigen khawm hi. (Matt 5: 20 , A lai gelhgelh na lam un thukham zonng siam uh a hih manin thukham thei te, teachers of the law, zong kici a, laithei te leh Pharisees a kici Lai Siangtho gelh te a hi uh hi.)
3. Lai Siangtho teina
( Translations)
Thuciam Lui ( OT) pen Hebrews pau tawh na kigelh masa in Thuciam Thak ( NT) pen Greek pau tawh nana ki gelh masa hi.
1) CE (AD) 382-383 kum in
Roman mi Jerome (347- 420) laisiam pa in Pope Damasus thu piakna tawh Latin pau in LST na tei a VULGATE ki ci hi.
2) Latin kampan in Germany kam in Martin Luther ( 1483 -1546 ) leh alawm te’n 1534 in tei khia uh hi.
3) Mangkang mite William Tyndale (1490/ 1494 -1536) in 1524 in mangkam ( English) tawh tei a, Pope leh kumpi pa in phal lo- uh a hih man in gawlheek in meitawh hallum lai uh hi. Asih ma- in khukdin a, ” Topa aw, England kumpi pa mit na hon sak in” ci- in thungen ngeungau hi. Pasian in a thungetna za a, tuazawh kum 451 ciang in King James I (1566- 1625) in Mangkam tawh Lai Siangtho kum (1611) in tei sak in, King James Version ( Authorized Version zong) kici hi.
4) Kum1834 in American Baptist sangmang Adoniram Judson (1788- 1850) in paucil ( Hebrew leh Greek) pan in Lai Siangtho bup Kawlpau in tei khia hi.
5 ) Kum 1932 in American Baptist sangmang Rev. Dr. Joseph Herbert Cope (1882- 1938) in Thuciam Thak ( NT) Tedim kam tawh tei khia hi.
5) Baptist makai Rev. Dr. Kam Khaw Thang (1927 -2017) in Lai Siangtho bup teipha kik in October 17, 1982 ni- in mipi in Pasian tung ah apna nei hi. Hibang in Lai Siangtho khat apian nading Pasian leh Mihing te in na asem khawm diudeu uh hi-a, tua pen A KHAUH PAI HUMOPNA (Dynamic -Theory) kici a hi hi.
PHAWK DING THU
A tung a humop thu ( theory) teng lak ah ali na a hi, Khauhpai humop na ( dynamic theory) a maan pen a hihi. Pasian sep om a, Mihing sep zong om hi. Pasian nasep leh hong message khak te a hih leh ei buaipih ding om mahmah lo hi. A gen bang in zuih suk pahpah ding hi mai hi. Ahi zongin a khial thei mihing te nasepna zong kihel in, tatzia heekzia, gamtat ngaihsut na, pupa ngeina cih te a kikhel nuainuai den a hihman in tua te- in tuhun a ding in bang a ci nuam peuh mah hiam? cih i kan vilvel ding mah a hihi. Kum tampipi Lai Siangtho a kisin na zong tua hang mah hi pah hi.
PASIAN nasepna a bulpi ahi, Lai Siangtho muang ngam lah kei ni. Eite hong huh, honghilh Pasian thubu a hihi. I zak ngeingei Dr. John Bouton la khat tawh ka thu ka khup nuam hi.
LAI SIANGTHO PASIAN
THUBU
(Holy Bible Book Divine)
Dr. J. Burton (1773 -1822)
Doh is F Tedim 193
Lai Siangtho Pasian thubu
Ka neih manpha na hi,
Koipan kapiang honggen dg Bang ka hihiam hong hilh dg
Lam kapial ciang hong tai ding, Honpa itna hong lak dg, Lam hong hilh ding hong cing ding, Hong thuhilh ding hong phat ding
Hih leitung gam simtham ah
Hong hehnem ding dahna ah, Hong hilh hi neileng upna, Mi in zong zo thei sihna.
Hong hilh hi nopna ngah nang, Langpan mimawh te thuak nang, Ka neih manpha pen ahi, A siangtho LAI SIANGTHO BU
Asim kha khempeuh Topa Kammal in tha hong pia tahen !
