Laisim cih pen ol lo hetlo a, asim nuam zong ki tawm mahmah hi. Ahi zongin a khangto ding mite leh akhangto nuamte in ahih leh pello in Laisim hahkat mahmah uh hi.
Laibu or Laisim na sungah Pilna tampi om hi. Bang hangin laibu ci sese i hihiam cih leh laibu khat akl lai khat limlim i gelh ding ciangin thu tampi kan kul a, laibu dang tampi et kak kul hi. Laisim I thadah hangin laibu bawlte or laigelh te in hun tampi pia uh hi. I sim ciangin minutes 5 zong I sim hetlo laimai khat or thulu khat pen agelh te akl akan ten akha bangin na kan uh a, pawl khat te in ahih leh a phutkhak atuahkhak thute na hi mawk hi. Tua ahih manin laisim na sungah thuthuk leh Pilna tampi om ahih manin hunpia in sim huai mahmah hi.
Laisimna in theina leh muhna hong zaisak hi. Theina i cih pen i kanzui in hong ki behlap ahihi. Muhna i cih pen i zakthu or i tuahkhak na panin ahihi. Tua ahih manin laigelh atamzaw te in akan thu (reasearch) tungpan in gelh khia uh a, tua in akanzolo te adingin ol takin theibeh sak hi. Pawl khat leuleu in ahih le azakthu te lai in gelh khia uh a, pawl khat te in atuahkhak thute hong gelh khia uh ahih manin hih Laisim na in theina leh muhna tangzai sak mahmah hi.
Theihna leh Muhna azai mite in Asia leh apha khentel thei uh a, ki dawm takin gamta kampau thei uh hi.
Laisim I cih pen bang zah in thupi hiam cih leh nang ol takin thu hong hilh den lawm hoih khat or pa hoih nu hoih khat ahihi. Tuhun ciangin nu leh pa tawh a om khawm Khangno ki tawm mahmah ta hi. Nuntakna ding zongin mi gam mi lei ah I om ciangin thuhilhna, thapiakna cih te I zak ding haksa mahmah ahih manin laisim den leng ei thu hong hilh , hong phawksak , hong thapia na hi gige hi.
Agualzo leh alawhcing nuam mikhat na hih leh zong leitungah gualzo na sak leh na enmahmah te nuntakna tawh ki sai lai in aki gelh tam mahmah ahih manin sim inla zuih ding te zuih sawm in. Na ki puah phat ding zong tampi hong om ding ahih manin ki puahpha in.
Thukhupna :
- Laisimna in theina leh muhna khang sak ahih manin hun tawmkhat la inla na lunglut lai sim in.
- Leitungah mi gualzo mahmah a tamzaw in Laisim na tawh ahun uh beisak zaw tham hi.
- Thulu khat sungah na zuih ding leh na pelh ding kimtak ki gelh ahih manin sim lel in.
- Laisim nuam mi khat nuntakna leh Laisim uklo khat nuntakna pen theina leh muhna, cihtakna leh nunnem na ah ki khai mahmah hi.
- Laisim in na paikhial kei ding hi.
Lungdam
Laigelh : Theophilus Khual
