Tate Pattahsiam Nuhoih Susanna Wesley
÷÷÷÷÷÷÷÷÷÷÷÷÷÷÷÷÷÷÷÷÷÷÷÷÷÷÷÷÷÷÷÷
Leitungah John Wesley cih pen atheilo ki tam hetlo ding hi. Pasian mizat mahmah khat ahih ban ah Methodist pawlpi aphuan khiapa ahihi. Pasian na sepna sungah agualzo leh amui bun mahmah khat ahihi. Amah hi ciang atungthei na dingin a neu panin apattah Anu thupitna tawm i en suk nuam hi.
Susanna Wesley pen Samuel Annesley leh Mary White te sungpan in January 20/1669 in England gam London Khuapi huam Spitalfields ah suak hi. Unau 25 lak Susanna pen aneupen ahihi.
November 11/1688 in Susanna leh Samuel Wesley hong ki teng uh a, tua hun lai takin Susanna Kum 19 pha pan hi. Susanna leh Samuel te in ta 19 hong nei uh a, ahi zongin 9 bang in aneulai in hong nusia uh hi. Atate asi lak ah 4 bang pen apengvive ahihi.
Susanna te pen gen thei mahmah hi. Amau nupa pen ki it mahmah in aki teng uh hina pin hun hong paitoto ciangin inn kuan sunglemlona tawh apasal tawh kumkhat val bang kikhen uh hi.
Inn kuan sung haksatna hangin sun leh zan in atate adingin deihtak hanciam in ahihthei tawp in mapang a, tua bang kawmkal ah kamsiatna tawh a inn nihvei bang hong kang hi. Hih inn katna tawh ki sai John Wesley tangthu i gelh ciangin akicing zaw in i kikum ding hi.
Bangzah in haksatna ka thuak zongin katate in Pilna angah ding leh thuman thei in Topa tawh akalsuan ding lunggulh lianpen in koih den ka hih manin inn kuansung haksatna te hangin ka lungkia lo hi ci in Susanna in gen hi. Hih thu agen mah bangin atate pen Pilna lam hi ta leh Pasian thu lam ah ahi zongin pattah zo mahmah nu hoih khat ahihi.
Bangci bangin atate pattah hiam?
✓ Atate apauthei pan ki panin Vantung thungetna hilh in, thunget ding hoih tak pattah pah a, OT(thuciamlui) leh NT(thuciamthak ) sungah thupi asak LSTho te atate hilh den hi.
✓ Susanna pen lailam ah Pilna nei khat ahih manin atate zong Latin leh Greek bang kum5 aphak ciangin hilh pah ahih manin atate lak ah Hetty bang pen Kum 8 aphak ciangin Latin lai leh Greek lai tawh Thuciamthak bang simsak zo hi.
✓ A tate zingsang Devotion neih pih den a, Lasak pih in LSTho sunga thukham sawmte leh Apostle Creed te hoih takin hilh den hi.
✓ Nitak ann na6 in nekpih den a, Aneu pen pan alianpen dong nai7 in lupna tung tun in tua khit ah LSTho simna leh thungetna neihpih in nai8 ciangin ihmusak den hi. Atate ihmut khit ciangin aman atuam vilvel in thungen in , Topa aw hih pattah ding leh ka kep dingin nong piak tanote mailam ding nang khut sungah om hi hong makaih sak in ci in thungetsak den hi.
✓ Sikan nei mahmah ahih manin hun thupi sam diak ahih manin atate adingin time table hoih takin koih sak sitset hi.
✓ Nu leh Pa zahtak ding hoih takin ahilh ban ah Nu leh Pa zahtak kei leh Pasian bang ci zahtak thei ding hiam cih pen tate tungah thuhilhna in nei den hi.
Ka lam etna in Topa hi a, tua ka lametna ka tate tung panin agah ka mu ding hi cih Upna nei ahih manin asiamna khempeuh leh ahih theina zahin tate pattah a, Topa apap ahih manin atate pen mi nuai ah omlo in talent tuamtuam tawh Topa in lamsang hi.
Hih thu panin i lungngaih ding ka deih bulpi in, nuntakna haksatna hangin tate ading lungkham luatna hangin tate pattah zah ding in apattah zolo , tate hunpia zolo khawng ki om thei hi. Susanna in bang ci hiam cih le ka sep ding leh ka buaipih ding tampi tak om hangin ka tate aneu pen pan agolpen dong amau thu theina tawh ki tuak in kalsim in hun atuamtek in ka zatpih hi ci ngiat hi.
Atate thupi ngaihsut in hun khempeuh phiat zat ding mun ah zatpih zo mahmah ahih manin kei mimal mahmah zahtakna zong pia ing. Ei mite pen na sem ciatciat pawl khat in agim atawlna te paulap in tate tawh hun azang khawm lo ki tam mahmah hi. Tate hunpia in amau tupna leh sawmna khawng zong va dot zelzel ding leh va kuppih tangtang ding athupi ahihna ki phawksak hang ..
Susanna in hibang haksatna khempeuh hong thuak khit ciang’ atate kiangah Kammal nunung penpen “Tate aw kei suakta ta ing , Pasian minphat tawntung un” ci in vaikhak hi.
Atate apattah zia leh inn kuan sung haksatna tampi tak om mah taseleh Pasian thu leh Leitungthu tawh atate amakaih zo mahmah Susanna Wesley thupi sa ka hih manin hong gelh khia ka hihi.
Cidam in Hunhoih Topan hong piak leh John Wesley leh Charles Wesley te u nau thu zong thulu khat in tomkim cingin gelh zawhna ding hanciam semsem ni.
Laigelh Theophilus Khual
Photo : Susanah Wesley
Et kak laibu te :
This biography, Arnold A. Dallimore’s Susanna Wesley: The Mother of John and Charles Wesley (Baker Book House, 1993).
Susanna Wesley Biography, may 13/2009.
Methodist Church in Britain; 350th Anniversary of Susanna Wesley.
Susanna Wesley: The Complete Writing, ed Charles Wallamce Jr, Oxford University press 1997.
