PASIAN MIZAT D.L. MOODY TANGTHU

Pasian thugen minthang DL Moody pen Feb 5, 1837 in Northfield, Massachusetts, USA ah piang hi. Kum li ahih laitak in a nu Betsy in naupeng a paii laitak in a pa Edwin in sihsan a, amau unau 9 pen a nu tawh haksapi takin khangkhia uhhi. Moody kum 5 a phak kum in a pano leh pastor khat a inn uh ah hawh in DL Moody kituiphum hi.

–

Nu bek tawh om in nuntak haksa uh ahimanin a unau in a sep theih bangbang sem uha, biakinn ah kikhawm tangtang uhhi. Tua bang a a buai mahmah san laitak un a u pen uh in a nu leh anauteng nusia in inn panin taimang sawnsawn hi. Haksa lua uh ahimanin DL Moody in tan 7 ciang bek sin thei hi.

            Moody kum 17 a phak ciangin Boston-ah nasep ding zongin a pai leh a pano  Holton’s Shoe Store ah clerk sem hi. Tua na a sep sungin Congregational Church of Mount Vernon-ah Moody kikhawm den a, Sunday school laihilh Edward Kimball in Moody vei mahmah hi. Tua khit ciangin April 21, 1855 in a vanzuakna ah khedap a tun laitak in Edward in Moody aw  “ Jesu in hong it hi cih kong hilh nuam hi,” a cih leh tua panin a lungsim kikhel in Moody in pianthakna ngah hi.

            Sept 18,1856 in Chicago-a Wiswall Brothers te khedap zuakna ah sem dingin pai hi. Pasian thu lunggulh mahmah ahimanin Chicago, Plymouth Congregational Church ah kipia hi. Tua panin Pasian nasem in kipia in First Methodist Church-a Mission Band tawh kizom in mi innte leh hotel te ah Pasian thuhilhna nei zel hi. Tua cuangin mihau mahmah a kipia zo John V Farwell kituak kha uhhi. A nek zonna a nasep te zo mahmah bek hilo in khamangthang zong vei mahmah a, Pasian thu genpih in kikhawm dingin mi zawn den hi.

            1858 kum ciangin  ama hanciamna tawh Sunday school hong in mi kinak behlap mahmah ahimanin Chicago Mayor in North Market-a Hall khat pen  a khong in Moody zang sak hi. John V Farwell pen Sunday School superitendent in zang hi. Tua Sunday School ah Nov 25, 1860 in US President Abraham Lincoln hawh hi. Sunday school kah pen mi 1500 bang pha hi.

Moody in kumkhat in dollar 5000 ngah in bank ah zong dollar 7000 koih man hi.Pasian nasep lam lunglut mahmah ahimanin a nasepna pan tawp in June 1860 in full time-a Pasian nasem dingin kum 23 a phak in kipia hi.

Hih bang khensatna a neihna pen khatvei Sunday school hilh khat in Moody kiangah a laihilh lai numei te kha nuntakna a veina leh hotkhiat ahih theihnang a veina thu gen a, tua thu in Moody lungsim khoih kha mahmah hi. Moody zong Sunday school naupangte inn khempeuh lut in Pasian thu a genpih leh piangthak khin uhhi. Nitak khat a numei naupangte Moody kiangah hawh uh a, Moody thunget sak uhhi. Tua panin Moody in khamangthang khat beek Jesu kiang paipih ding ngaihsutpi in neipah a, nikhat in mikhat ta Pasian thu genpih ding kiciamta hi.
Tua bangin Pasian na a sep kawmin YMCA member muanhuai mahmah khat hipah in 1861 teh Moody pen YMCA city missionary dingin kila hi. Aug 28,1862 in Emma Charlotte Revel tawh kiteng in ta 3 nei hi.

            Tua hun pen American Civil War tawh kituakin mun tampi ah kidona om a, Moody in U.S. Christian Commission te tawh pangkhawm in Pasian nasem hi. Battle of Murfreesboro, 1863 ah gal kidona a a liamte kiangah na piangthak nai hiam ci in Pasian thu gen pih hi.

North Market Hall-a Saloon lui khatpuah pha in 1862 ciang kikhopna in zang uhhi. kum 1863 ciangin Moody in a sum khol dollar 20,000 tawh bul panin mi 1500 kikhop theihna Illinois Street Church biakinnpi lam hi.

           Moody in kum 1866- 1899 sung YMCA President sem hi. YMCA president a sep sungin America-a YMCA building masa pen leh Farwell hall, mi 3,000 kihop theihna lam hi. 1867 kum in Moody in a revival campaign masa pen Philadelphia-ah bawl hi.

1867 kum in a zi dam loh na hangin England ah a pai in Pasian thugen Henry Moorhouse tawh kimu in America a pai teh ama Pawlpi ah thugen dingin zawn a,1868 February kha in thugenna nei hi. Tua pa in Moody kiangah "thu na gen ciangin nang ngaihsutna leh nang hoihsak te bek genlo in lai Siangtho sung a dan in gen zaw inla, thungai mite Pasian in a itna thu gen den in ci hi. Tua khit ciangin Moody thugen mite in zaknop sa semsem pah uhhi.

   Sankey leh Moody te 1870 July kha in YMCA convention, Indianapolis ah kimu uhhi. Sankey in zingsang kikhop ,(morning devotion) ah "There Is a Fountain Filled With Blood’cih la a sak leh tua in Moody zo ahimanin kikhop khit ciangin Moody in nangbang mihing kum 8 sung zong khin ing, Pasian nasemni a cih leh Sankey in zong  Pennsylvania a, post office a a nasep pan tawp in kikhawl pah uhhi. 

   October 8, 1871 Sunday zan farewell ah akikhop laitak un Chicago khuapi kangin YMCA building leh Pastor pa inn te a kangtum te lakah kihel kha hi. Hih biakinn pen December 24,1871 in building lui omna gei ah kilam kum in North Side Tabernacle cih min kinei sakhi.

1872 kumin England ah zin in Arundel Square Congregational Church, London-ah Pasian thugenna nei a, mi 400 piangthak hi.

USA ah a ciah kik khit ciangin English mi thum te ngetna bangin June 7,1873 in a naseppih Ira Sankey tawh England ah pai uhhi. England a tun ma un amau a samte lakpan mi 2 na si man in ahihangin York YMCA te vaihawmna tawh F.B. Meyer tawh kithuah uh a, mi 250 piangthak hi. Tua khit ciangin Arthur A Rees tawh kithuah in Sunderland ah kal 5 sung, Newcastle ah, Edinburgh, Scotland ah Pasian nasem in pai kawikawi uhhi. British Isles leh Europe gam tecah Moody thugenna tungtawn in khanlawhna om hi.

–

September 6,1874 kum in Ireland khuapi Belfast ah thugen in tua banah Dublin ah, November 29,1874 the Manchester khuapi a Free Trade Hall ah, tua zomah Sheffield, Birmingham leh Liverpool ah gen kawkawi hi. Liverpool khit ciangin London a Agriculture Hall ah, Bow Road Hall ah, the Royal Haymarket ah, Victoria Theatre, Camverwell Green ah gen kawikawi hi. August 4, 1875 in England pan USA ah ciah a, August 14,1875 in a inn tunghi.

DL Moody in khuapi buppi a crusade a neih masak pen October 31,1875 in Brooklyn a, Ckermount Avenue Rink ah nei a, tua munah mi 7000 bek ta ahimanin ,mi 20000 tak ta zolo in ciah kik uhhi. Tua khit ciangin Philadelphia ah crusade nei kik in crusade sim mi 1,050,000 tak pha in tua lakah US President Ulysses S. Grant leh a cabinet minister te zong kihel hi.

–

Tua khit ciangin New York-ah (tu a Madison Square Garden) omna ah Pasian thugenna nei in mi 60,000 tak pai in mi 6000 piangthak hi. Tua zawh teh Chicago ah kileh kikin a biakinn lamthak uh zo in June 1,1876 in biakinn konghonna nei uh a, Chicago Avenue Church ci in pastor pen W.J. Erdman ahihi.

Moody in Chicago crusade pen October 1-January 16,1877 sungin bawl a, mi 10000 val piangthak hi. January 28-May 1,1877 sung Boston ah bawl kik hi.
1877-1878 sungin Baltimore leh a kim ah 270 vei bawl hi. Tua banah St Louis leh San Francisco leh USA mun tuamtuam ah Pasian thugen in pai kawikawi hi.

        1881 kum in England ah paikik in 1882 in Cambridge ah November 4-January 19, 1884 sung in Pasian thu gen in missionary minthang ahi Wilfred  Grenfell leh England National Cricket player missionary a pai CT Studd te in piangthakna ngah uhhi.

        1884 kum ciangin Northfield leh Massachusetts te ah Pasian thugen in pai hi. 1891-1892 sungin England, Scotland, France, Palestine, Olive mualte ah pai in Pasian thugen hi.

     1895 kumin Forth Worth, Texas ah Pasian thu a genna ah mihing 4000 a kikhop ni in kikhopna hall kicim a, Pasian kepna tawh a si a liam omlo hi.

         DL Moody in Pasian nasepna in ngaihsun in sanginn (school) nei ding thupit ngaihsun mahmah hi.

A sanginn neih masa pen in 1879 kum a, Northfield Seminary (tu in Northfield School for girls) hi in a nihna pen 1881 kumin Mount Massachusetts School for boys ahihi. 1889 kumin R.A Torrey tawh The Chicago Evangelization Society (tu in Moody Bible Institute) din uhhi.

A hun nunung lam;
DL Moody in a crusade nunung pen 1899 kum November kha in Kansas City ah bawl hi. December 22,1899 zingsang nai 7 in si a, December 26,1899 in Congregational Pastor C.I. Scofield in hunzangin Northfield, Massachussets- a Mount Hermon School compound ah kivui hi. A laitah ma in “leitung kikhin in vankong kihong kha mu a, Pasian in hong sam a, kapai kulta hi, natna omlo, lungkham dahna om nawnlo, nak nop hiven ” cih teng gen hi.

        A lawm hoih mahmah   R.A. Torrey in Pasian in DL Moody a zatna ahang pen DL Moody tangthu a gelhna laibu ‘Why God Used D.L. Moody’  ah hibangin gelh hi.  DL Moody pen

(1) a hihna peuhpeuh ah kipumpiak hi,
(2) thungen tawntung hi.
(3) Pasian thu sim den hi,
(4) kiniamkhiat mahmah hi.
(5) Sum deihluatna ah kikem zo hi,

6) Khamangthang vei ngiat hi,
(7) Pasian in ompih hi.

Laigelh: NK Nang

DL Moody Kammal nunung nih tawh amah tangthu khawl bawlin mailam ah akammal thupi pawlkhat gelh kik ding hi hang.

• Leitung guallel ta a,ka mai ah Vantung ki hongsa in om hi.