PASIAN OMLO
“Pasian omlo hi” a cite pen upna neilote hilo a, Pasian omlo hi cih upna khauh mahmah a neite na hi zaw.
A upna uh khauh veve i cihna hang pen, Pasian omlo a cih tak uh teh, hih leitung ah i muhtheih leh i lawntheih nate ii khen lamah na (reality) bangmah dang om nawnlo a, ana om phial leh zong i lungsim in a bawltawm thu hi lel aci ngiatte ahi uh hi.
Pasian pen “kha” hi si ahihmanin muhtheih leh lawntheih loh na khat pen a thu kanbeh luat ding dan zong om tuanlo ahihmanin PASIAN OMLO cih tawh thukhupna a bawlte ahi uh hi.
A thu ngaihsutzia uh ka ngaihsut teh hih tawh kibang ka sakna khat om (kibang lua kei, ahizong i gennop a kitel zawk khak leh i cihna). Ken leitung bupah suangneu eng zilzial (yellow) cih limlim OMLO hong ci ta. Hih pen kei upna na hi ta leh, hih kei thugen (proposition) pen a maan leh a maan loh limtak sit hong kul ta hi.
Ken leitung ah suang om khempeuh (suang a kici limlim) velcian khinin ‘suang eng’ cih ding limlim muh ding omlo ci-in ka va kan khitsa thu ahihleh bel Suang Eng omlo cih pen thuman (fact) kici thei ding a, ahizongin kei thuahkhak thute leh kei leitung muhna ciangciang ah suang eng mu ngeilo ka hih mana a gen lel ka hih leh lah, Suang Eng omlo cih hi lo in, Suang Eng i cih leitung ah omlo kha thei ding hi cih ciang pen kei gen theih hi phot hi.
Suang Eng omlo ka cih ziau le lah, thukho (evidence) omlo pi a kei upmawh thu kei muhna ciang tawh kituaka a mawk gen ka suak a, tulai a thusuak nei kici pawlkhatte in amau lungsim a suak bangbang Pasian tung pana a ngah uh zah bang phiala a mawk gengente tawh ka kilamdanna omlo hi. Thu khat pen a maan leh maan loh kancianna om masa lo in thuman ahihleh ahihloh kipom thei nailo ding i cihna zong hi pah hi.
Tua hi a, Pasian omlo a cite pen upna khauh mahmah a neite hi in, pasian om maw omlo kigen thei lo aci Agnostic-te zong bel na om veve zel hi.
Bang teng hi leh, Pasian om hi cih umin Jesu pen Pasian hi a, amah pen “Lampi, Thuman, leh Nuntakna hi” cih a pom khate kana mi hampha omlo hi. I hamphatna pen hih leitung bekah ah hi lo, sihna gungaal i kan khit lam ciang kitel semsem ding hi.
Tua i cih laitakin ei lamah a buaihuai zaw thu khat pen, PASIAN OMLO a ci vitvet ngam mi ki-om nai khollo a (mailam ah bel hong tam semsem kha thei), ahizongin Pasian omlo banga nuntakna a mawk zat “practical atheist” i cihte bel kinak tam khe mahmah leuleu hi.
Pasian na um hiam ci leng lah, um lua mahmah ci ding uh. Ahizongin a nuntakzia uh i et ciang lah “hih in Pasian um hi” cih theihna ding thukho (evidence) bangmah muh ding om vetlo zel mi kitam hi. Hih bangte pen “Pasian omlo” a ci vitvet-te tawh a kilamdanna omlo zel hi.
I upna banga i nuntak ding thupi hi. Pasian omlo a cite pen a utut un a gamta phial zong un amau upna tawh kituaka nungta hi ta uh a, kician vet hi. Pasian um kici napi-a tua a upna a nuntakpih lote pen a poi pen hi zaw kik hi. Hih bang upna pen LST in ‘upna si’ na ci hilhel lel mawk a, a dahhuai pen thu ahihleh, hih upna si in i nuntakna hong honkhia zolo ding a, koima tan hong tun zolo ding hi.
Upna maan, upna hing, upna kho i neih tek ding hanciamhuai mahmah a, tua bang upna i nei hiam ci-in nisim in kivelcian zong kisam pha mahmah hi. “A kivelcian lo nuntakna pen nuntakna cing hi lo hi.” – Socrates
~ tutmuan lungngaih by Tg. Samm
