Pawlpi sung leh Gam sung vaihawmna
(The separation of Church and State)
Zomi sung bek hilo in, tuhun a Democracy gam upa pen a kigen USA gam sung nangawn ah, hih thulu tawh kisai in, thunung thuma leh a hong pian khiatna thu om zia a tello mite sungah kinialna (controversial) tam mahmah hi. Na khat peuhpeuh a pian ciangin a piangsak thu (a hang khat) om hamtang hi. Tua a pianna a hang zong masa loin, a piang na khat tung bek a i et ciangin kam kinialna om den hi. USA gam ah hih bangin Pawlpi (Saptuam) leh gam vaihawm zia a kikhenna ding thu a kipat ciangin, USA gam phut makai masate in pil vang takin na sem uh a, kammal mahmah zong kician tak in na tel uhhi. Kammal a zat uh pen “Pawlpi/Saptuam (Church) leh gam vai (State)” cih na zang uhhi. “Biakna (Religion) leh Minam (Nation)” cih na zang khalo uhhi. Tua kammal nihte gel pen a kibat loh bangin a deihna zong kilam dang a hihna i phawk tek hi.
A nung thu etkikna:
Tulai tak a, USA gam a kici sungah pemta mite (a diakin Europe pan in) a pem khiatna uh a hang pen biakna suahtakna ding; mi khatpeuh in a ma upna zui in a ma deih pawlpi ah om thei ding a, a ma lunggulh biak piak zia a zang pawlpi tawh kithuah in biakpiakna nei thei ding cih ngimna ahi hi. Lam khat pan ci leng, gam uk thunei kumpi in, a ma upna tawh kizui in pawlpi khat sungah a gam mite thu neihna zangin sawnlut theilo ding leh, Pawlpi sungah Siampi/Siampu te in zong gam uk kumpite thu neih khum theilo ding cih lunggulhna ahi hi. USA gam a bel masa Europe mite in biakna suahtak lohna, cih a gen uh pen, Christian biakna sungah om pawlpi/Saptuam kikhen na hanga a thahat pawlpi khatpeuh in a hatlo pawlpi te zawhthawhna tawh nasep man leh Kumpi in a ma mimal omna pawlpi sungah a gam bup mipite sawnlut a sawmna hang hia, Christian a hilo biakna dang khat in Christian upna a khaktan man hilo hi.
I theihsa mah bangin England pan USA gam a pemta masa mite pen England gam a thunei kumpi i a pawlpi (Saptuam) “Anglican Church” ah a gammi khempeuh a kikhop ding uh leh Anglican Church pawlpi paizia/biakzia khempeuh a kizuih ding deih thupiak a zui utlo mite hi masa hi. England kumpi in a ma pawlpi “The Church of England, (the Anglican Church)” pen a ma gamsung a kizui ding gambup pawlpi suaksakna hang cih ding ahi hi. Tua thu a zuilo mite, “Congregational” pawlpi teng pen bawlsiatna leh thahna dong kipia hi. (This persecution and oppression was a result of the Church of England, the Anglican Church, becoming the state church.) Gam uk kumpi i pawlpi a lut sangin ei upna leh biakpiak zia suakta tak a, a nei ut mi pawlkhat USA gam ah suahtakna a zong uh ahi hi.
A hizongin, USA gam ah a pem thak mite pen “Anglican Church” a deihlo mite bek hi lo in, Europe gam tuamtuam pan leh England pan (Church of England members) pan zong mi tampi tak in zong nuntakna nuam zaw ding zonna tawh na pem veve hi. Gam thak a tun uh ciangin a mau deihna leh lunggulhna om tek bangin pawlpi/saptuam phut ciat uhhi. England kumpi mahmah in zong USA gam ukna gam (colony) in damdam in la (annex) a, a lak zawhna ciangciang ah pawlpi/saptuam phut hi. Pawlpi suahtakna lunggulh vive uh a hih zah khat in, Catholic pawlpi/saptuam hatna gam teng pen Catholic colony dan suah pah a, protestant hatna gamte pen protestant colony cih dan suak pahpah hi. Tua hi a, Gamthak tung suakta tak a upna zuih theihna lunggulh mite in a tunna gam thak uh ah, Kumpi leh thu neihna a nei makaite in a mau upna zuihna pawlpi/saptuam pen mi khempeuh in zuih ding cih thu piakna a om ding deih nawnlo uhhi.
Tua bang kawmkal ah USA pen England kumpi in a mau ukna nuai a om gam (colonies) dingin la uh a, British Colonies gamsung ah biakna makai dingin Church of England Bishop koih ding British kumpi in a gen tak ciangin gamsung vai leh biakna vai ah buaina kipan pah hi. Tua hun lai in Pawlpi/saptuam Siampi/Siampu (Siate) pen Kumpi in khasum pia, tenna ding inn pia a, an nek tui dawn ding pia in, kumpi nasem bangin kikoih hi. Tua bek hilo in, phiangsiah (tax) na ngawn don theihna ding phalna kipia ahih manin a thu neihna uh lian mahmah hi. America gam thak British Colonies a teng Church of England a hilo pawlpi dangte pen tua bangin kibawllo ahih manin, vaihawmna zia ah mi pawlkhat lungkim lo bek thamlo in, a mau upna leh pawlpi vai a ding lunglau uhhi.
Tua bang thu om kawmkal ah, 1877 kum ciangin Virginia gamke sung ah Tuiphum (Baptists) mi pawlkhat in bawlsiatna a tuak tak ciangin kumpi thuneite na sep dan hoih sa lo tektek uhhi. Tua thu huhau in Kumpi thunei a hi, James Madison, Thomas Jefferson te makai in gamsung a om pawlpi vai leh gamsung ki vaihawmna pen a tuam tuak a koih, hoih a sakna uh hong khang tektek hi. Biakna Siampi/Siampu (Bishop/Pastor) te in gam sung vai ah, thu a neih luat tak ciangin a thu neihna uh zangin mi khempeuh a mau pawlpi/saptuam sungah guan sawmna hong om ahihna leh a mau pawlpi/saptuam a omlo mite gawtbawl thei ahihna hong ki mu khia semsem ahih na hang zong ahi hi. Tua ahih manin biakna sungah Pawlpi/Saptuam makai Siampi/Siampu (Bishop/Pastor) te in leitung gam ki-ukna vai thu neihna (State power) a let lohna ding leh thu neihna a khengval a zat lohna ding khaktan ding deihna ahi hi.
USA gam sungah “the separation of Church and state” a deihna leh a kizuih ding zia gelna taktak pen US gambup thukhunpi “the first amendment of the United States Constitution” sunga kigelh “Congress in biakna khatpeuh siasak ding, suakta tak a upna zuih theihna khaktan ding thukhun bawllo ding…” cih ngimna zui a, kikhen khiat theihna a tangtun sakna ding ahi hi. A kisep khiatna ah, thu nei kumpi (or) uliante in cik mah hun in biakna dang khat, mimal khat i thu zuih upna pen a mau thuneihna zangin khaktan sak, a mau utloh pi thu upna zui sak teitei cih a om lohna ding ahi hi. Thunei kumpi’ pawlpi ah a kikhawmlo, a zuilo mi khat pen thukhun palsat banga sanna leh thaman piakna a om lohna ding khamna zong ahi hi.
Hih mun santak ah i khin khai mahmah ding thu in, “pawlpi(saptuam) sung kivaihawm zia leh gam sung kivai hawm zia” gawmlo ding; cih nopna ah, pawlpi/saptuam sunga Siampi/Siampu (Bishop,Pastor) khatpeuh in gam uk thunei mite pen biakna leh upna paulap in khin gawp (manipulate) lo ding leh, gam uk thu nei khat in zong a ma thu neihna zangin pawlpi/saptuam Siampi/Siampu (Bishop, Pastor) te in a mau deih bangin thupia lo, a mau uploh pi zuih sak teitei lo ding cih ahi hi.
I gam-ah Pasian thu hong kipuak ciangin, American Missionaries te’n biakna sunga Pawlpi/Saptuam makai Siampi/ Siampu te thu neihna leh Gam vaihawmna lam a, makai thuneite’ thu neihna gawm loh dingin hong sinsak in, hong makaih uhhi. A deihna uh bel, thu neihna a kizat khialh loh ding ngimna hi zaw hi. Biakna sung a Pawlpi (Saptuam) makai a hi Siampi/Siampu (Bishop, Pastor) te in gamvai hawmna ah kihello, lang muh ding ngimna hilo a, mikhat in biakna lam pan thu neihna leh gam vai lam pan thu neihna a let khop loh ding ngimna hi zaw hi. Pawlpi (Saptuam) sung in vaihawmna ding huang ciangtan khat a neihna leh gam vai hawmna ah zong huang ciangtan khat a neihna kilat sakna ahi hi. Tua hi na pi’n ei Zomi sungah thu a kigen suksuk tak ciangin “Pawlpi (Saptuam) vai leh Gam vai- Church and State” pen “Minam leh biakna -Nation and Religion” kisuah kha ahih manin a huzap leh a sepkhiatna kilam dang hi.
Minam leh biakna (nation and religion) pen mihing a, piang khempeuh in a nei ahi hi. Tua i minam pen mi khempeuh in kinu sia theiloh bangin i biakna zong deih telna tawh i neih ahih manin thagum hat thu tawh hong kikhak, lampial sak ciangin na kisa hi. A diakin Christian te a dingin bangin minam pen Pasian bawl ahih manin Pasian in minam it mahmah ahihna ki thei hi. Pasian in minam it ahih manin minam vai ah Pasian in nusia lo hi. Mihingte in zong minam leh Pasian kinu sia thei lo hi. Ahi zongin “Pawlpi (saptuam) sung thu neihna leh Gam vai thu neihna” pen i gawm ding hilo a, a ki hual a, a luang khawm ding thu hi zaw hi.
Agelh~ Khansuan T. Guite