Sadhu Sundar Singh tangthu
✍️ Thangpi Naulak
Sadhu Sunder Singh kum 1989 september kha in India gam Rampur, Patiala ah piang hi. A hau mah mah innkuan sung pana piang ahi hi. Sikh biakna zui ahihmanun a neulai in Sikh Temple pan biakna thu tampi kisinsak hi. Kum 7 bek pha pan in Bhagavad Gita laibu byheart zo zen hi. Kum 16 a phak ciangin Hindu laibu Veda a vekpi in siam hi. Tuate banah Koran khawng zong ama’ hihtheihzah in sin hi. Tua khitciang Sadhu te tawh holimna nei hi. Tua panin a nuntakna biakna lamah zanga Sadhu suak dingin a lungsim khensat hi. A innkuanpihte nusia in India gam muntuam tuamah biakna vain zin kawi kawi hi. Miten huhna tawm tawm a piakte simloh bangmah nei lo hi. Zi zong neilo liangin biakna lamah aki piak hangin a lungsim hawm hi. A lungsimah lungnop khamuanna om thei lo hi.
Sunder Singh, sadhu ahih theih nangin a hanthawn tawntung pen anu hi. A nu meltheih Raipur a British Mission School ah lai hong sin hi. Tua panin Bible hong thei kha zenzen hi. Tua hunlai in Bible sangin Occult leh Hinduism lam khawngah lunglut zaw hi. Kum 14 a phak ciangin anu in sihsan citciat hi. Tua aki pan Sunder Singh nuntakzia kikhel hi. Lai siangtho a Jesu thuhilhnate diklo hi ci-in Lai siangtho khawng balkeek gawp hi. Lai siangtho hal in Pasian thugen a muh khak leh suangtum tawh deng hi. Midangte zong amah banga gamta dingin hanthawn hi. Ahizongin amau biakna ah lungnopna kicing mu tuanlo hi. Tuamanin a lungsim gim lua in amah leh amah kithawhnopna lungsim nei hi.
Lai Siangtho a hal khit nithum hong cin ciangin a lungsim beidonng lua ta ahihmanin Topa kiangah thungen hi. “Pasian aw, om takpi na hih leh lampi man hong hilh in, tua ahih kei leh ka inn nunglam ah zingsang nai 5 ciang a meileeng hong pai zel ka ki gawilum sak ding hi” ci ziau hi. Tua bang lian in khatvei thu a nget kik ciangin a room sung tha khat thuin hong taang hi. Sunder Singh in meikang om ding sa hi. Ahizongin meikang bangmah a muhloh ciangin a thungetna kidawng hi ci-in ngaihsun hi. Tua khuavaak ah Jesu meel hong kilangin mu hi. Tua bek tham lo in a aw zong zalai hi. “ Bangtan hong zong ding na hi hiam? Nangmah hondam dingin kong paia, Lampi ma hong hilh in na ci cina, banghangin lamman zui lo na hi hiam?” ci hi. Tuaciangin Sunder Singh in Jesu si lo in thokik cih thei hi. Amai ah khukdin in, tuapanin lungnopna leh khamuanna tawh kidim hi. Tuaciangin a nuntakna hong kikheel hi.
A nuntakna hong kikheel takciangin kituiphuum ding hong lunggulh ngeungau hi. Ahizongin a innkuanpih ten phalo mikmek mawk uh hi. A innkuanpihte thu zong ngailo in kum 1905 ama pian ni lian in Shimla English biak Inn ah kituiphum hi. Sunder Singh in lungdamna thu tangko sawm ta hi. Hindu te lakah lungdamna thu tangko na tawh Sadhu suah sawm hi. Sadhu bangin om leh Hindu ten theihsiamna nei zawdeuh ding cih ngaihsun hi. Khristian hong suah ciangin a innkuanpih leh tanau ten langbawl pah hi.
Kum 1905 October 16 ciangin bangmah neilo in kheguak tawh hong vaak khia hi. Tua pen Jesu hanga vaakkhiatna hi zaw ta hi. Kum 1906 ciangin Tibet gamah lungdamna thu tangko dingin kuan khia hi. Tuabanga a vaakkhiat ciang kuaman sponsor lo, khasum sanglo banah aman lah neihsa bangmah nei lo hi. Haksatna thuak ding lungsim kizo sa in Tibet vuuk gam manawh hi. Lamkaal ha American Missionary, Stroker kici tawh kimu bilbel uh hi. Amah tawh haksatna kawmkalah lungdamna thu tangko khawm uh hi. Sunder Singh khatvei aci hong na hi. Stroker in European mi khat inn ah tunpih in keem hi. Tua European pa in Sunder Singh kipiakzawhna a muh ciang thupisa lua in pianthak lawh hi.
Tua khitciang Sunder Singh in St.John School of Theology, Lahore ah kumnih sung vilvel Pasian’ thusin hi. A zawh ciang khuasungah Pasian thu gen dingin paikhia kik hi. Khatvei singkungah kahin, Pasian thugen in Pasian lasa hi.Mipi ten kaikhia in vuagawp uh hi. Sunder Singh in amah a vuate Pasian thu genpih meng meng hi. Tuaciangin amah a vuate zong khristian ah kipia uh hi. Khatvei Nepal gamsungah misuamte tawh kituak uh hi. Migilo ten thah sawm in namsau tawh ngiim uh a, aman a ngawng dawh dide lel hi. Tuaciangin migilo ten lamdangsa uh a, a puan laksakin thatlo in paisan uh hi. A puan neihsun laksakpa kingaihsun pha in hong lehkik hi. Tuaciangin Sunder Singh in Laisiangtho simin Lazar leh Mihaupa tangthu genpih hi. Tuaciangin misuam migilopa kikheel in piangthak hi. Migilo pa in Sunder Singh a inn ah ciahpih in sawtpi tak omsak hi. Kum 1912 in Topa Jesu etteh in ni 40 ann tan sawm hi. Ni 40 lawhcing takin ann tangzo kei mahleh a khalam nuntakna ah phattuamna tampi ngah hi.
Sunder Singh in bawlsiatna tampi thuak hi. Ahizongin a lamdang takin suakta zel vanglak hi. Kum 1914 in Nepal gam Rasa khua a Budhist makai Lama in a sih nangin thukhen hi. Kawltuikhuk thuk sungah puansilhlo in khiasuk uh hi. Tawh kalhcip in a tawhtang Lama in keem hi. Tua tuikhuk pen migilote kithahna tuikhuk hi. Tua tuikhukah misi luang tawh bangmah ne lo dawn lo in om hi. A ninihna ah a sin kihongin mi khat in lakhia hi. A lakhia pa in bangmah gen selo in paimang pah hi. A suahtak khitciang kiman kikin Lama kiangah puak uh hi. A hing tanga Lama mai a tunkik pen Lama in lamdang sa lua hi. A kalhna tawhtang lah amah bek in keem ahihmanin Sunder Singh pen a vanglian khatin ompih cih thei in lau mah mah hi. A gam pan un a paikhiat nangin thupia hi.
Kum 1918 in Madras ah zin in mipi tampi maiah thugen hi. Mi tampi takin Jesu uplawh uh hi. India gamsung mun tuam tuam banah India gam pua lam dongah Pasianthu gen in vaak hi. Sri Lanka banah 1918 -1919 kikal sung Malaysia, China leh Japan ah zin hi. Kum 1920 – 1922 kikal sung Western Europe, Australia leh Israel ah zin hi. Jerusalem, Lima leh Berlin khuapi te ah lungdamna thu tangko ziah ziah hi.Hih a zinna munte ah a lamdang tuahkhak tampi nei hi. Khatvei vanzuakna ah thu a gen laitak mipi ten suangtum tawh deng uh hi. Khat in a lu ah dengkha citciat hi. Tua phetin a dengpa in a lu nasa in tuuk zawsop hi. Tua takteh midangten zong deng ngam nawnlo uh hi. Sunder Singh pen mi kiniam khiat mah mah hi. Mi nasep laitak a muh khak leh seppih pah in amau na maingap tuam uh hi. Tuabangin aki maingap ciangun aman Pasianthu genpih suk pah hi. Sunder Singh in kumsim nisat sungin Tibet gam zin den hi. Tibet gam pen vei cihtakin vei hi. Kum 1929 in Tibet gam paikik a, tuakhit a thu kiza nawnlo hi. A thu a theician kuamah om lo hi. Pawlkhat ten mi thah dingin ummawh uh hi. Pawlkhat leu leu in bel vuuk lakah tuuklum hin cia ci uh hi. Pawlkhat bangin a hing tangin Pasian in vantungah la to dingin ummawh uh hi. Sadhu Sunder Singh Lai Siangtho taang deih Marka 8: 35 ahi hi.
Behlap : Jesu hangin anuntakna hong kikhel ciangin athuakhaksatna te hangin lungkialo in, hih anuntakna sungah athuakkhak te hangin amah lungdam ko zaw hi. Banghang hiam cih leh thuman ka muhma in hih Jesu thu gente pen gal bangin biakna lungsim in hong neisak ahih manin tua mun ah kei zong ka ki hel ngei hi ci in aman pulak zelzel hi. Kei pen khat veivei Paul tawh ki bang ka kisak hun tampi om hi.Paul zong Jesu aneih ma in tapidawte bawlsiain langpang himah leh Jesu hangin anuntakna hong kikhel ciangin Pasian in nakzat mahmah hi . Kei zong Jesu omlo hile Christian te gallian pen ka suak ding hi.
Jesu hangin i nuntakna hong kikhel takpi leh i thuaknate aman thuakzawh hatna hong pia lel hi. Ka sihna ding tamveipi agel kapa na gawn Jesu hangin Itna mittawh ka en thei a, amawhna te ka maisak zo hi. Hih thusim pen biakna dangte in neilo hi. Lungdamna thuhilh in ka gam ka lei ah kakalsuan laitakin amaute simmawhna te pen thuman atheilo manuh ahih manin ka thuakdan nuam mahmah hi ci-in agen thei haksatnate aman puazo mahmah ahihna gen khia hi.
Pasian adingin asih dongin na sem Sigh kammal thupi ka sak khat ” Pasian khekhap zui dingin kei lel ki lawm keng”
Lungdam ey
