SAKOLLAM VENG PIANNA TANGTHU
————————————–
By Khup Zo Mang B.Th, M.Div, MBA, MTh
Tedim khua taap khuk 9 vei kiluah khit, Pu Kam Hau (Sukte), Pu Mang Gin (Hatlang), Pu Khoi Lam (Hatzaw), Pu El Khat (Thawmte), Pu Kim Thuam (Naulak), Pu Gen En (Lethil), Pu Kai Hen (Hatlang), Pu Pau Am (Samte).Pu Pau Vum (Sukte) te in Hausa, Upa semin vaihawm uh a, tua a kipanin Tedim khua a kip thei pan ahihi. Tua hun madeuh Kam Hau’ pa Khan Thuam hunin Tedim khua kim ah kiteng khin a, Tedim khua leilu (Southern) lam ah Phuaizang khua (tuhun in Leilum veng) le Tedim khua leitaw lam (Northern) ah Seekzang khua (tuhun in Sakollam veng) kisat hi. Guite beh Thang Go in a tapa nihna Pau Ngul zi guanin Phuaizang khua satsak hi. Phuaizang ah nuamsa in om uh a, Hausa sem in hawm le geel a ma pai mahmah hi. Tua hunlai takin Thang Go’ upa Pum Go in a sanggampa lawhcinna a zak ciangin Lamzang khua panin Tedim khua ah na lalto hi. Anlak khit khuado hun ciangin Phuaizang khua le Tedim khuate khuado bawl khawm in hong gualnuam uh hi. Tua ni in Manlun Zote’n Phuaizangte le Tedimte sim uh a, Tedim la zo lo in, Phuaizang khua hong la uh hi. Tua bek thamlo in Phuaizang hausa Pau Ngul’ zi Cing Vung thatin a tapa Kam Pau suakta sak uh hi. Pau Ngul in Phuaizang khua ah a tuahsiat ciangin Tedim khua leilu lam Seekzang khua na sat hi. Tua Seekzang khua pen tu laitakin Sakollam veng sung Bo Suan Do inn mun phei teng ahi hi. Seekzang khua pan Kam Pau hong khan ciangin, Khan Thuam tawh kipawl in Manlun Zote sim dingin Pawite vacial uh hi. Kam Pau in a nu Cing Vung a thatte phu hong la kik uha, vazo gawp in a khua uh a halgawp sak hi.
Kam Pau in galsim in Seekzang khua hong tun ciangin (tulai tak Sakollam Veng) sungah hih bangin la na phuak hi:
*Seino simsal a kathan a thanzawm aw, zanglei namtem katawi a thang zawm aw.
*Sang kakap lah geelin cing zo tah, lal hen in gee khuamual nen tung alva katai sak.
*Ka tun tom ee buh–al gi zom ngawn ing, ka meel neu ee, sialum in sung ngawn ing.
*Banzal tun tom lalhen suahgual bang kaihna kamin ciau galah kathangsak ngawn hi.
1806 kum pawl ciangin Sukte beh Kam Hau hong minthang a, Lamzang khua ah kum 5 sung hausa a sem khit ciangin Tedim khua ah hong lalto hi. Tua hunin Zo le Thado gal hat lua ahih manin Kam Hau in Khoi Lam zawn in Tedim ah a tenpih dingin Falam gam Ngalti khua panin Mang Gin va sam hi. Tua banah Mualbem khua a om Hau Tuang’ tapa Pau Vum pen a inntual a lam kimlai Tedim khua ah a teng khawm dingin vazol hi. Tedim khua inn 300 hong phato a, Bonuai Veng, Botung Veng, Vaiphei Veng, Seekzang Veng, Khuangzang Veng le Daiduap Veng ci in khen guk hong kikhen uh hi. Tua hun panin Kam Hau in ukpi sem a, Pau Vum, Mang Gin le Khoi Lam–te upa vaihawm minthang hong suak uh hi.
1880 pawl ciangin Kam Hau gam sung omte in Mangkang kumpi lehdona kipan uh hi. A do hangin gualzo tuan lo uh a, Tedim khua bek tham lo a kim nai a om khuate zong lau huai ahih manin Haicin khua (tu laitak Haupi le Ngenung kikal) mite a vek in gal pelh in a khua uh nusia uh hi. Tua hunin Haicin hausa Guite beh Kam Pum gal a tai ciangin Seekzang veng a Hausa sem Guite beh Ngul Man–te’n zong na zui uh ahih manin Seekzang veng kinusia ahi hi. Tua banah Tedim Ukpi Khua Cin nangawn Tonzang khua ah 1874–1881 sung gal pelh in va om a, Tedim khuapi kinusia cip hun ahi hi.
Mangkang kumpite honguk ma-in Seekzang kici pen 1908 kum ciangin Sakollam kici hi. Mangkangte hun ciangin Seekzang vengah Sakol galkap punjabe kici-te in galsim dan sinna dingin sangpi tennis court leh a kiim a paam teng pioneer te’n ziktam uh hi. Tua mun pi 50 ta kihal in a sanna pi 3 singluang khungin galte lim dingin ippi sungah taakteh koih in thun uha, nahtangluang te phut ciat uh hi. Mangkang galkapte in sun ciangin Sakolte mai kikim in singluangte kan kawmin taisak a, gallim kikoih ippte leh nahtang luangte teipi tawh khawh uh hi. Hunawng le nitak lam simin sakol tung tuang kawm in bawlung satin kimawl thei zel uh hi. Tua bang gamtatna a mu mite in sakol lam sak thapai hi, ci in ngaihsut uh ahih manun tua kuam teng khempeuh “SAKOLLAM” veng cih min pia uh hi.
Mangkangte hun sungin sakollam veng ah a teng masa pen in Pa Hen Za Cin (Gualnam), Teeklui khua mi ahi hi. A munpen tu laitak in Pa Sian Cin Zam’ inn mun ahi hi. Tua hun laitak in kumpi in inn mun hong nailo ahih manin Falam Menzi pa in Pa Hen Za En pen dangka Ks. 50% liausak (Gaam) hi. 1955 kum ciangin kumpite in inn mun hawmna nei uh a, tua ciangin Tedim gam sung khua tuamtuam panin inn mun kisiau hi. Tuate sungah Khuabeem khua panin Tual Cin, Gawngmual khua panin Suang Thang, Tonzang khua pan Thang Do Kap-te pen Sakoallam veng sung a teng mi masate in kiciamteh hi. Sakollam veng ahih hangin kumpi ciaptehna bangmah om nailo hi. 1966 kumin Tedim khua sung hausa Mang Za Cin (Bawmkhai) le Kham Za Thang (Tawmbing)-te makaihna sungah Sakollam khawk na kici a, upa sem dingin Tun Dal (Vengteh-Neekgen) na kiseh hi. 2nd March, 1962 ni in galkap kumpi hong kah ciangin thuneite in Tedim pen veng 3 in khen uh a, Lawibawl veng, Myoma veng le Sakollam veng ci in ciaptehna pia uh hi.
THUMNA
Sakollam veng sung tangthu hong kidong zel leh, lai in hong gelh in ci a om ahih manin keima sim khak sun laibu sung gawmkhawm in kong pose hi a, laimal le laipai zia te pen a kigelhsa laigual mah kong zuih kik hi a, laigelhpa theihna hilo zaw hi.
References:
1.Haiciin Vontawite Magazine Committee, Haiciin Suan Mawngneel Magazine, The Chronicle & Delight of Haiciin Village Hill Town Settlement (1894–2019) 125th Year Commemoration Souvenir. Yangon: Pu Thang Mun Mang, MD, BDK Company, 2020.
2. Sukte Laibu Bawl Committee, Sukte Beh leh Tedimgam Tangthu. Tedim, Chin State: Sukte Beh Laibu Bawl Committee, 1996.
3.ThangTuan Mualpi Khua, Khamtung Gam Zomite Khang Tangthu. Kalaymyo, Sagain Division: Tuan Go Mang, 2017.
4. Laibu Bawl Committee, A 48th Tedim Baptist Association Kumcin & Nelson Baptist Church, 7th Anniversary Jubilee Laibu. Tedim: Nelson Baptist Church of Sakollam, 1996.
