Thum Gawm Pasian Khat
(The Trinity)
A. Pasian Om Hi Cih Upna
Mihingte sanga lianzaw Pasian khat om hi cih pen minam ngeina tuamtuama om den khat ahi hi. Hih leitung leh mihingte’ tuahkhak thute a hang om ding hi cih mihingte’ ngaihsutna pana piangkhia hi a, tua bang thute mihingte sanga lianzaw khat in a piansak hi ding hi cih upna pana piang ahi hi. Mihing peuhmah in a sunga a paii biakna lungsim neihna tawh amah sanga sangzaw khat om ding hi, ci-in kan nuam hamtang hi. Hih pen mihing a huam leitung buppi-a Khasiangtho nasepna hang zong hi dinga, mihingte’ hotkhiatna a piangsak Khasiangtho nasepna tuam vilvel tawh a kilehbulh Pasian’ thu thuk sinna theology-a a huampi hehpihna kici pen ahi hi. Tuhun a pasian om lo a ci mite bel mihingte’ lungtang git loh luatna leh vantung leitung bangci bangin pianga a bangci hiam cih a kigen thei ding hi lo hi ci-a upna pana piangkhia ahi hi. Tua mah tawh kizui-in Laisiangtho in tua bang mite mihai na ci hi (Late 14:1).
A tamzaw-in mihingte in amau aom takpi mah maw cih ahi zongin a theih theihnate uh tawh a theih theih uh muh theih nate a om takpi mah hiam cih peuhmah ngaihsut-in nei ngei lo uh hi. Pasian pen a mimal-in a kimuh theih loh hangin, Pasian a om taktakna kilang lua mahmah ahih manin Pasian’ thu tawh kisai-in mihingte in bangmah gen behbeh kul lo-in thei lel uh hi. Pasian om taktak hi cih a lunghiang i cihte nangawn ama’ lungsim ginatlohna leh lungsim mit khua muh lohna leh Satan’ nasepna hang bek ahi hi. A kipiangsak nate tungtawna ki mu thei Pasiana om taktakna pen kitel lau mahmah ahih manin lungdamna thu a za ngei lo mite nangawn hih thu a nialna uh tungtawnin thu kikhen ding hi. Romans 1:19-20 ah tua bang mite thu a kikhen nading thu hih bangin na gen hi: “Pasian tawh kisai theihtel ding khempeuh Pasian in amau tungah a kitelsak nunga tua banga a om hang uh ahi hi. Ahangin, leitung pian cil-a kipan a kimu thei lo Pasian pianziate, a tawntung vangliatna le a Pasian pianngei, a kipiangsaksa nate panin a teltakin kimu ta ahi manin mihingte in paulap ding a nei kei uh hi”
Laisiangtho a kigelh ma-a kamsangte’ tungtawna Pasian’ kilaakna leh Laisiangtho pana kingah kilaaknate in tuni-a mite’ lungsim tawng dong mah bun pah hi. Leitunga mite a huampi-in Laisiangtho sunga kilaakna a thei lo a tamzaw phial ahi ta zongin, Pasian tawh kisai ngaihsutna pawlkhat in a lungsim uh a zawhsa ahih manin Laisiangtho a sim ngei het lo mite’ lak nangawn ah mihingte sanga lianzaw khat om hi, cih upna om gige hi.
Tanglai Greek mipilte in Laisiangtho sim kha ngei het lo uh hi napi-in, hih leitung leh vantungte’ thu a genna vuah mihingte sanga lianzaw khat om hi, cih thu tungtawnin na gen den uh hi. Tua bang tungtawnin upna tuamtuam na om hi: (1) polytheism kici pasian tampi upna, (2)hylozoism, na khempeuh a om nuntakna peuhmah pasian hi, cih upna, (3) materialism kici nate khempeuh ngeina omsa thukhun banga paipai hi lel a, tua banga a paipai nadingin pasian cih bang kisam lo hi, cih upna hi a, mihingte amau’ thu a piang hil cih tuhun-a evolution tawh kinai mahmah hi; (4) pantheism kici pasian i cih a mimal a pasian hi lo a, nate khempeuh pasian hi pah lel hi, cih upna hi a, pasian pen a mimal a om pasian ahih loh hangin mite’ laka om hi tuan lo hi, cih upna ahi hi. Hih bang upna nam pen tuhun ciang mahmah in zong nam tampi-a a omna kimu thei hi.
Laisiangtho tungtawna genna hi lo a leitung vantung kipiangsak nate’ tungtawnin Pasian om taktak hi cih gen theihna a huampi-in nam 4 bang om hi: (1) Ontological argument kici leitunga minam khempeuh in Pasian a kici khat om ding hi, ci-in um tek uh ahih manin Pasian om taktak ding hi, cih upna. Hih pen khatveivei a priori argument zong kici hi. (2) Cosmological argument kici na khatpeuh a pian nadingin a piangsak khat a om kul hi, cih ngaihsutna hi a, leitung vantung i cih na khat pen a piangsak khat teiiteii a om loh phawmawh hi, cih ngaihsutna ahi hi. Hih ngaihsutna ah bel leitung vantung i cih pen zaii mahmah a a piangsak om lo-in a ma thu a piang thei ding hi lo hi, cih upna ahi hi. (3) Teleologcal argument kici khat om leuleu a, a hi sinsen na khatpeuh (design) a gel (designer) om hamtang dinga, a leitung vantung a et ciang a hi sinsen-a kigel ahihna leh khat leh khat a kizop diimdiamnate i et ciangin a gel (designer) khat om taktak ding hi, cih kimu thei hi. Na khempeuh kizomin na sem khawm diandiam cih thu i et ciangin tua na khempeuh a gelpa pen a kiciangtan lo vangliatna leh pilna a nei khat hi ding hi, cih hong lak hi. (4) Anthropological argument kici pen bel mihingte’ pianna leh pianzia peuhmah tua bang pianzia tawh kibanga, ahih hangin tua sanga a lianzaw pianzia a nei Pasian’ piansak a hih loh ngal-in piang thei peuhmah lo hi, cih ngaihsutna ahi hi. Hih ngaihsutna ah mihingte in ngaihsut theihna (intellect), phawk theihna (sensibility), leh a hoih a sia tel thei-a ut theihna (will) a neihna uh kihel hi. Hih bang pianzia lamdangte in mihingte’ pianzia kibang napi-a a sangzaw pianzia a nei khat in mihingte piangsak hi, cih hong lak hi.
Pasian om taktak hi cih thu tawh kisai hih bang ngaihsutnate a manphatna ciang khat om-in hih thute a nial mite Pasian in thu a khen nading thu a om hangin (Rom. 1:18-20), mihingte leh Pasian kikal ah kizopna maan hong neisak thei ding leh Lasiangtho lo-a Pasian upna taktak a piangsak dingin kicing zo lo hi. Pasian tawh kisai kilaakna kicing hong kipiakna Laisiangtho mah hi a, nate’ sunga kimu thei thute kipsakin nate in hong gen theih loh kilaakna tampi hong gen lai hi.
B. Thum Gam Pasian Pum Khat A Hihna
A huampi-in gen lehang Thuciam Lui sung peuhmah ah Pasian pum khat ahihna kinakgen deuh a (Pai. 20;3; Thuhilhkikna 6:4; Isa.44:6), tua mah zong Thuciam Thak sunga kigen thu ahi hi (John 10:30; 14:9; 17:11,22,23; Col. 1:15). Ahi zongin Thuciam Lui mahmah leh a diakdiakin Thuciam Thakte ah Pasian pen Pa Pasian, Tapa Pasian, leh Khasiangtho Pasian ci-in mimal thum-a om Pasian ahihna teltakin na kigen hi. Mi tampite bangin bel Pasian’ min kilawhna a kizang elohim kici kammal pen a tam genna (plural) a hih manin tua kammal mahmah in zong Thumgawm Pasian khat hong lak hi, ci-a gen bang om hi.
Piancilna Laisiangtho a bul lam mahmah ah Pasian’ Khasiangtho thu a kigenna na om pah a, tua banah Piancil. 1:26; 3:22; 11:7 te bangah Pasian a kigenna-in a tam genna (plural pronoun) na kizang pah hi. Thuciam Lui sung mahmah tamveipi mah Pasian pen Pa, Tapa, leh Khasiangtho, ci-a a kitang genna na om hi. Isaiah 7:14 ah Tapa pen Immanuel, “Pasian eite tawh om khawm,” ci-in kigena Pa leh Khasiangtho tawh kigenkhawm lo a a kitang genna kimu thei hi. Tua Tapa mah zong Isaiah 9:6 ah, “Vanglian Pasian, Tawntung Pa, Nopsakna Kumpi” ci-in kigen leuleu hi.
Late 2:7 ah Pa Pasian pen “Keimah” cih lawhna kammal-in na kigena, A Tapa in leitung ah thuneihna khempeuh a neih ding a deihna na gen hi. Pa leh Tapa-te a tuama a kitanggen mahbangin Late 104:30 sungah Pa leh Khasiangtho-te a tuamin kigena, tua lai ah Topa Pasian in Khasiangtho a sawlna kimu thei hi. Hih banga a kigenna khempeuhte Thuciam Lui sunga Topa’ Vantungmi kici Pa in a sawl Tapa Pasian a kilatnate leh Pa leh Tapa tawh a kilamdanga kigen Topa’ Khasiangtho a kigennate tawh ki-enkaak thei ding hi.
Hih banga Thuciam Lui in a gennate banah Thuciam Thak kilaaknate in hong gen beh lai hi. Zeisu Khazih pen Khasiangtho in a gaisak, Pa Pasian’ Tapa lah ahi lua mahmah Pasian ngiat mihing ci leh sa a hong pianna ahi hi. Zeisu a kituiphumna ah vantung pana paukhia Pa Pasian, vakhu bangin hong tuaksuka a liangko tunga khawl Khasiangtho, leh tuiphumna a ngah Zeisu ngiat, cih bangin thum gawm Pasian khat sunga mimal thumte a tuam tek ahihna kimu thei hi (Matthew 3:16-17). Hih banga thum gawm Pasian khat sunga mimal thumte a tuam tek ahihna John 14:16 ah zong kimu thei a, tua lai ah Khazih leh Pa leh Hehnem Pa-te a kibat lohna kimu thei hi. Matthew 28:19 ah thu ummite “Pa, Tapa, leh Khasiangtho’ mina tuiphum” dingin sawltakpite a kisawlna ah zong thum gawm Pasian khat sunga mimal thumte a tuam tek ahihna kitel mahmah hi.
Hih banga Thuciam Lui leh Thuciam Thak-te sunga tamveipi kitel taka a kigennate hang mah-in pawlpi pian tunga kipan tuhun ciang dong upna maan pulaakna orthodox creeds-te peuhmah ah hih thu kihel veu den hi. Hih thu pana pialkhiatna peuhmah Laisiangtho’ hong hilh thumaan thutak pana pialkhiatna bangin kingaihsun pahlian den hi. “Trinity” (thum gawm Pasian khat) cih kammal lian Laisiangtho sungah a om lian loh hangin, Laisiangtho hong hilhna ah hih upna sim loh thu dang peuhmah-a a kiivawh thei ding hi lo hi.
Thum gawm Pasian khat upna pen Christian upna ah a laigilpen khat ahih hangin mihingte’ tel khit zawh ding hi lo a, mihingte’ theih ngei thu khatpeuh tawh genkaak theih ding zong hi lo hi. A kitelpen dingin gen lehang, Pasian pen khat ahih hangin mimal (person) thum-a om ahi hi, cih ahi hi. Hih mimal thumte kikim uh a, hihna kibang nei-in, biak ding, paai ding leh up dinga a kilawmna uh a kikim lian ahi hi. Pasian pum khat ahihna tawh kizui-in hih mimal thumte Peter, James, John cih banga i gen theih mimal thum bangin Pasian thum hi lo hi. Tua ahih manin Christian upna maan taktak i cih Pasian thum upna ahi tritheism hi lo hi. A langkhat ah, thum gawm Pasian khat i cih pen Pasian khat bek nam thum banga kilang pianzia nam thuma kilat kawikawina zong hi lo hi. Thum gawm Pasian khat upna pen Pasian’ pianzia ah a kul khat hi a, Pasian’ kilaakna mawkmawk ciang bek hi lo hi.
Thum gawm Pasian khat sunga mimal thumte a hihna uh a kikim teii hangin a kilamdanna mun uh zong om leuleu hi. Tua ahih man mah-in hih mimal thum laka a a masapen (First Person) pen Pa kici hi. A nihna (Second Person) pen Tapa kici a Pa in a sawl ahi hi. A thumna (Third Person) pen Khasiangtho kici-a, Pa leh Tapa in a sawl hi leuleu hi. Tua pen Pasian’ thuthuk sinna theology ah “procession” kici a, Tapa in Pa sawl cih ahi a, Khasiangtho in Tapa sawl cih ahi zongin, a kigualh dan peuhmah kikhek zanzan thei lo hi. Pasian mimal thum Pasian khat-a a omzia peuhmah a tuam vilvel hi a, mihingte’ tuahkhak thute khat beek tawh genkaak theih ding hi lo hi. Mihingte in i tel zo kei ahi a, a siangin i gentel thei kei ahi phial zongin Laisiangtho in hong hilhna tungtawnin upna tawh i san ding ahi hi.
C. Pasian’ Minte
Thuciam Lui sungah a kizang mun deuh Pasian a kilawhna min thum om hi. A masapen “Jehovah” ahih kei leh “Yahweh” hi a, Pasian maan khat bek kilawhna-a kizang min ahi hi. Hih min bel Piancialna 2:4 sunga Piansakna tawh kizoma kizang min hi a, Paikhiatna 3:13-14 sungah a khiatna “Keimah” hi, ci-in na kigena, a khiatna taktak Ama’ thu a om, a tawntung Pasian cihna ahi hi.
Thuciam Lui sunga kizang munpen Pasian’ min bel elohim hi a, a maan Pasian leh lawki pasian dangte kigenna-a kizang khawmkhawm kammal ahi hi. Piancilna 1:1 ah hih min kimu pah hi. Hih Pasian’ min’ khiatna tawh kisai-in ngaihsutna a kibat kim loh hangin “a thahat pa” cihna leh kihtaak ding leh zahtaak ding pa cihna khiatna nei hi, cih kimu thei hi. A kammal mahmah a tam genna plural hi a, thum gawm Pasian khat sunga mimal khat ciat genna-in a kizat mahbangin thum gawm Pasian buppi huam kim khin hi, ci-in kingaihsun thei hi.
Thuciam Lui sunga Pasian’ min thumna bel adonai hi a, a khiatna bel “topa” (master or lord) cihna hi a, Pasian i Topa ahihna a kigenna beka kizang hi lo a, nasemte’ tunga ukna a nei leitung mi topa/pute genna-in zong kizang hi. Piancilna 15:2 sunga i muh theih mahbangin elohim min tawh kizang khawm mun mahmah a, tua banga a kizat ciangin Pasian pen i Topa (Master or Lord) ahihna a lim-gen nuam ahi hi. Thuciam Lui sungah hih Pasian’minte gawmkhawmin kizang khawm thei mahmah hi. A kimu munpen bel Jehovah Elohim ahih kei leh Adonai Elohim ahi hi.
Thuciam Lui sungah hih minte leh min kigawmkhawmte banah Pasian’ min kigawmkhawm pawlkhat zong om lai a, tuate’ lakah, Jehovah-Jireh, a khiatna, “TOPA in hong sik ding hi” (Piancil.22:13-14); Jehovah-rapha, “hong damsak TOPA” (Paikhiat.15:26); Jehovah-nissi, “TOPA ka gualzawhna ” (Paikhiat.17:8-15); Jehovah-shalom, “TOPA ka nopna” (Thukhente 6:24); Jehovah-tsidkenu, “TOPA eite’ dikna” (Jer. 23:6); Jehovah-shammah, “TOPA om hi’ (Ezek. 48:35) cihte ahi hi.
Thuciam Thak sungah Pasian’ kilawhna min pawlkhat kibehlap lai a, thum gawm Pasian khat sunga a Masapen bel “Pa” kici-in, a Nihna pen “Tapa” kici a, a Thumna pen “Khasiangtho” kici hi. Hih kilawhna minte Thuciam Lui sungah zong a kimuh kiukiuna om sam-a, ahi zongin Thuciam
Thak sungah kizang mun deuh hi. Hih kammalte tawh kisai a cingzaw-in thum gawm Pasian khat sunga mimalte’ thu i gen ciangin a cingzaw-in i sut lai ding hi.
D. Pasian’ Hihnate
Pasian’ pianzia ah Pasian bek in a neih hihna, ahih kei leh a om loh a phamawh Pasian pen Pasian a hisak tuampianna pawlkhat om hi. Tuate thum gawm Pasian khat in a tawntunga a neih hi a, mimal khat ciat in a kibang lian-a a neih ahi hi. Tua banga a tuampian hihnate lakah Pasian Kha ahihna (John 4:24), Pasian nuntakna ahihna (John 5:26), Pasian Ama’ thu-a a omna (Paikhiat. 3:14), Pasian pen ciangtan nei lo ahihna (Late 145:3), Pasian a kikhel theih lohna (Late 102:27; Mal.3:6; James 1:17), Pasian thutak ahihna (Thuhilhkikna 32:4; John 17:3), Pasian itna ahihna (I John 4:8), Pasian a tawntung ahihna (Late 90:2), Pasian a siangtho ahihna (I Pet. 1:16; I John 1:5), Pasian thakhat thu-in mun khempeuh-a a omna (Late 139:8; Jer. 23:23-24), Pasian in na khempeuh a theihna (Late 147:4-5), leh Pasian in na khempeuh a hih theihna (Matt. 19:26) cihte kihel hi.
Hih Pasian’ hihnate tawh kihuang a hihna dangte zong kimu thei a, Pasian a hoihna, Pasian in lainatna a neihna, leh Pasian pen thuneipen ahihnate, cih bangin kigen thei ding hi. Kicinna khempeuh ciangtan om lo-in Pasian’ a hi a, Ama’ pianzia ngiat leh a nasepte kicing hi. Vantung leitung a bawlna a a geelna kicingte leh a them a nenga a geelnate in a thuneipen ahihna, a vangliatna, leh a pilnate a kilatkhiatna hi a, Laisiangtho sunga kilaak hotkhiatna tawh kisai a geelnate in Ama’ itna, Ama’ dikna, leh A hehpihnate a kilatkhiatna ahi hi. Vantung leitung buppi uk-a, a uk zawh loh dingin gol lua cih om lo a, gitta bang vasano khat lei laka a kiatna khawngte ciang dong nangawn thuneihna tawh a geelna sunga kihel zo lo dingin thuneu lua, cih lah om lo kawikawi hi.
E. Pasian’ Thuneihna
Pasian’ hihnate in Amah na khempeuh tunga thuneipipen ahihna kitelsak mahmah hi. Vangliatna khatpeuh, thuneihna leh minthanna khatpeuh’ nuai ah om ngei lo a, Amah sanga a lianzaw khatpeuh’ thu mang cih bang om ngei lo hi. A pianzia khempeuh ah ciantan om lo kicinna khempeuh kimu thei hi.Na khatpeuh a ciangin lamdangsa cih bang om ngei lo a, guallel ngei lo-in, kician lo nemnum cih bang zong om ngei lo hi. Ahi zongin, a thuneihna sukha lo leh a kicing Ama’ deihna a tangtunna kipelh het lo-in mihing’ tate suahtakna leh deihtel theihna bangtan hiamkhat pia a, tua thu hang mah-in mihingte in amau’ deihtelna ah Pasian in mawhpuasak pah hi.
Mihingte mawhna hangin kisiacip a Pasian’ nasepna mu thei lo-in phawk thei lo ahih manin, Khasiangtho in mihingte’ lungtang sungah na a sep loh-in Pasian’ lam peuhmah ah kiheii thei lo uh hi, cih Laisiangtho in teltakin hong hilh hi (John 6:44; 16:7-11). Ahi zongin, mihingte’ lampang panin a up lohna uh hang mah-in thu kikhena, hotkhiatna a ngah theih nadingun Zeisu Khazih a up dinguh Pasian’ thupiak ahi hi (Sawltak. 16:31). Mihingte’ vai, a diakdiakin thu ummite’ nuntakna ah, Pasian in A deihna a tun nadingin sem hi (Phil. 2:13). Ahi zongin Pasian’ tunga ki-ap dingin mihingte zawhtawh thu-in sawl ngei lo a, a hehpihna thu bulphuh-in kal bek hi (Rom. 12:1,2).
Pasian in mihingte suahtakna pawlkhat a piakna hangin leitung bang hong ci ding hiam cih a kician lo nemnum hi tuan lo a, Pasian in tangtawna kipan mihingte in Pasian’ nasepna leh mihingte’vaihawmna tungtawnin bang ci ding cih a theihsa ahi hi. Tua ahih manin a tawpna ah Pasian’ minthanna mah a suah nadingin tawlkhatkhat sung siatna bang a kiphal mai hun a om hangin Pasian’ thuneihna in na khempeuh huam kim khin hi.
F. Pasian’ Thuseh
Pasian’ thuthuk sinna theology ah Pasian in thuneihna tawh a ngimnate Pasian’ thuseh (decrees) kici a, a piang ding kici khempeuh a kihel khin-a na khempeuh huam kim hi. Pasian’ thusehte lakah Pasian mahmah in a sep a bawl nate banah leitung nate’ pianzia zui-a piang dinga a seh nate zong kihel a tuate’ tungah zong thuneihna cing mah nei hi. A tel hak zawzen thu khat bang bel, a thuneihna tawh a geel a thusehte sungah mihingte’ gamtatna khempeuh nangawn kihel hi, cih thu hi a, tuate mah tawngtung Ama’ ngimna sunga kihel ahi hi.
Ih tel khit zawh loh hangin, na khempeuh thei-a pil Pasian in, mihingte in amau suahtakna zangin bang sem ding cih thei a, mihingte suahtakna a piak hangin na khempeuh a kician lo cih bang om lo hi. Tua thu mah tawh kizui-in Pasian’ geelna sungah Adam leh Eve in mawhna hong bawlna vuah a kilatkhiat mahbangin mihngte mawhna a bawl ding nangawn phal lel phot hi. Tua mahbangin mihingte’ mawhna a maisak thei dingin singlamteh tungah Khazih hong sihna ahi a, kisikkikna leh upna a neih theih nading vua Khasiangtho nasepna cihte zong a kihel ahi hi.
Mihingte’ lungtang sunga Pasian’nasepna pen a a tel a khawka theihtel zawh ahih loh hangin, mihingte’ sep leh bawl kici khempeuh Pasian in a tawntunga a geelsa thuseh sunga kihelsa hi a, a lang khat leuleu ah, mihingte in Pasian’ piak suahtakna tawh gamtangin amau’ telna bangbang ah mawhpua uh hi, cih zong Laisiangtho in teltakin hong hilh hi. Pasian’ thuseh i cih ciangin a piang khempeuh kibingphut hi lo a, mihingte in amau’ telna ah mawhpua a, a sepna bangbang tungah tavuan nei-in a hoih a septe pahtaakman a kipia, pil lua mahmah a itna tawh a geel khol Pasian’ sehna a gen i hi zaw hi.
Pasian’ thusehte piansak nading a thuseh, a bawlsa nate a kepp nadinga a thuseh, Ama’ hawsiamna thuseh, a bawlsa nate a makaihna thuseh cih bangin khen tuamtuam-in kikhen thei ding hi. A thusehte’ sungah Pasian’ kamciam leh thuciamna tuamtuamte, dispensations kici a geelnate a kisepkhiatnate, a thupipen ah mihingte’ tunga a lakkhiat a hehpihnate cihte kihel hi. Hih bang Pasian’ mai ah bel mihingte in ki-apna, itna leh biakna tawh boka i biak ding sim loh thu dang om lo hi.
Dotnate:
1. Leitung mihing kici peuhmah Pasian kici khat om hi, ci a a ki-up ciat mawkna bang hi na ci a?
2. Bang hangin Pasian om lo hi, cih upna peuhmah a piang thei ngiat lo ding upna hi mawk ahi hiam?
3.Nate’ sunga Pasian’ kilaakna bangzah-in kitel ahi hiam?
4. Mihingte’ sanga lianzaw khat om hi cih thu tungtawna vantung leitung thu a kigentel sawm zia nam lite gen in.
5. Pasian om taktak hi, cih thu ontological ngaihsutna ah bangci bangin kilakkhia hiam?
6. Pasian om taktak hi, cih thu cosmological ngaihsutna ah bangci bangin kilakkhia hiam?
7. Pasian om taktak hi, cih thu teleological ngaihsutna ah bangci bangin kilakkhia hiam?
8. Pasian om taktak hi, cih thu anthropological ngaihsutna ah bangci bangin kilakkhia hiam?
9. Thuciam Lui leh Thuciam Thak sungah Pasian khat ahihna bang ciangin kigen ahi hiam?
10. Thuciam Lui in thum gawm Pasian khat thu bang ciang hong hilh ahi hiam?
11. Thuciam Thak in thum gawm Pasian khat thu bang ciang hong hilh ahi hiam?
12. Thum gawm Pasian khat upna Trinity leh Pasian thum upna tritheim khentelin gencian in.
13. Thum gawm Pasian khat i cih Pasian nam thuma hong kilaakna banga gen ding ahih lohna gen in.
14. Thum gawm Pasian a kitelcianna tawlkhat gen in.
15. Thuciam Lui sunga kizang munpen Pasian’ min thumte a khiatna tawh gen in.
16. Thuciam Lui sunga Pasian’ min kigawm khawm pawlkhatte bang hiam cih gen in.
17.Thuciam Thak sunga thum gawm Pasian khat sunga mimal thumte a kilawhna kammalte gen in.
18. Laisiangtho in hong hilh bangin Pasian’ hihna pawlkhat gen in.
19. Pasian’ thuneihna i cih bang ahi hiam?
20. Pasian’ thuseh i cih bang ahi hiam?
21. Pasian’ thusehte bangci bangin kikhen thei ding ahi hiam?
22. Pasian’ thuseh i cih leh a piang khempeuh bingphutna i cih bangci bangin kilamdang ahi hiam?
23. Bang hangin Laisiangtho in hong hilh Pasian tawh kisai kilaaknate in Ama’ tungah ki-ap-in Amah it-a Amah i biak ding hong kal ahi hiam?
Laigelh : Rev.Dr. Zam Khat Kham
