Pa Pasian
(God the Father)
A. Thum Gawm Pasian Khat Sunga
A Masapen Pa Pasian
Thum gawm Pasian khat sunga minal thum- Pa, Ta, leh Khasiangtho- kilaakna ah A Masapen mimal pen Pa bangin kigen den hi. Tua bang ahihna tawh kizui-in Pa guak thym gawm Pasian khat hi lo a, Tapa guak ahi a Khasiangtho guak zong thum gawm Pasian khat hi lo hi. Thum gawm Pasian khat ah mimal thum kihel hi. Thuciam Lui sung ah Pa, Tapa, leh Khasiangtho thu kigen-in hih kammalte mah zong a kizatna a om teii hangin Thuciam Thak sung ah a ciangzaw leh a siangzaw-in kihilh hi. Pa pen a teel, a it, a pia Pa bangin kigen hi. Tapa pen a thuak, a tankhia, leh van leh lei a lenkip Pa bangin kigen hi. Khasiangtho pen suahthakna a pia, a tenden, a baptaiz, thahatna a pia, leh a siangthosak Pa bangin kigen hi. Thuciam Thak sunga kilaakna khempeuh Zeisu Khazih bulphuh-a kilaakna hi a, Khaziah Pasian’ Tapa ahihna thu a kigenna ah Pa Pasian’ thu zong ki pulaak hi. Lumlet kawikawi-a kikhel mawkmawk thei lo Pa in Tapa sawl-in, Tapa in Khasiangtho sawl hi, cih thu ah Pa pen a masapen Pa bangin kigen dena, tua banga a kigen hangin Tapa Pasian ahihna ahi a KHasiangtho Pasian ahihna ahi zongin a kineusak tuan hi lo hi.
Pasian Pa ahihna thu a kigenna ah thupi li muh theih ding om hi: (1) Pasian pen a kipiangsak na khempeuhte’ Pa ahihna, (2) Kizopna tungtawna Pa Pasian ahihna, (3) Pasian pen eite’ Topa Zeisu Khazih’ Pa ahihna, leh (4) Pasian pen Zeisu Khazih Honpa leh Topa um mi khempeuhte’ Pa ahihna.
B. A Kipiangsak Nate’ TungaPa Ahihna
Van leh lei a kipiansakna leh a sunga nuntakna nei khempuh a kiletkipna ah a mimal thum-in a kihel kikim hangin, A Masapen Pa, ahih kei leh Pa Pasian, pen a lamtuam vilvel-in a kipaingsak na khempeuhte’ Pa ahi hi. Ephesians 3:14-15 ah Paul in, “Hih thu hangin vantung leh leitunga innkuan buppi’ min kilawhna i Topa Zeisu Khazih Pa’ mai-ah ka khukdin hi” ci-in na gen hi. Hih lai-ah vantungmite leh mihingte kigawmin innkuan khat bangin na gena, Pasian pen tuate khempeuh’ Pa ahi hi. Tua bang lian mah-in Hebrews 12:9 sungah, A Masapen Pa mah “khate’ Pa” ci-in na kilo a, tua lai ah zong vantungmite leh mihingte mah a kigawma kigen hi leh kilawm hi.
James 1:17 sungah, Pa Pasian pen “khuavakte’ Pa” ci-in kigena, kha nuntakna khuavak khempeuh a piangsak Pa ahihn a a kigenna hi leh kilawm hi. JOb 38:7 ah, vantungmite Pasian’ tate bangin kigen leuleu hi (Job 1:6;2:1). Adam mahmah zong piansakna thu hangin Pasian tapa bangin kigen hi (Luke 3:38). Malachi 2:10 ah, “Eite in pa khat bek nei hi lo i hi hiam? Pasian khat bek in hong piansak hi lo ahi hiam?” ci-in na kidong hi. Mars Hill a Paul thuhilhna ah, “Tua ahih ciangin eite Pasian’ suan leh khak i hih khit nungsang” (Sawltak. 17:29) cih kammal na zang hi. I Corinthians 8:6 ah, “Ei adingin Pa ahi Pasian khat bek oma, na khempeuh Amah pana piang ahi hi” ci-in an kipulaak hi.
Hih Laisiangtho munte siksan-in en lehang, Thum gawm Pasian khat sung a Pa Pasian pen a piangsak Pa ahihna tawh a kipiangsak na khempeuhte’ Pa hi a, a kipiangsak nuntakna nei khempeuhte’ pianna ahi hi. Hih thu bek ah, Pasian pen vantung leitung khempeuhte’ Pa cih theih ding ahi hi. Hih thu lian ah a kipiangsaksa na khempeuh sanggam unau bang hi belbel hi. Ahi zongin liberal theologian-te’ zatkhialh bangin leitung buppi in hotkhiatna ngah ding cih thu ahi a, Pasian pen kha thu ah mihing kici peuhmahte’ Pa hi, cih thu ahi zongin hilh theih nading om lo hi.
C. Kizopna Tungtawna Pa Ahihna
Pa leh tapa cih thu leh kizopna pen Thuciam Lui sung ah Pasian leh Israel mite kigenna ah kizang mun simsim hi. Paikhiatna 4:22 ah Moses in Pharaoh tungah, “TOPA in hih bangin ci hi, Israel ka tapa hi, ka ta upen hi” ci hi. Hih lai ah, amaute a Piangsak Pa ahihna bek a gen ahih loh lam kilangh a, ahi zongin amaute khempeuh kha thu-a suahthakna a ngahte hi, a ci nuam zong ahih lohna kimu thei hi. Bang hang hiam cih leh Israel mite a buppi in pianthak zenzen lo uh hi. Pa in a tapa kema a lunghihmawh bangin Pasian in Isarel mite kemin lunghimawh-a kizopna tuam vilvel khat a neihna uh a genna ahi hi.
David’ innkuan tungah Pasian in angvaanna tuam a neih nading thu a genna ah, Pasian leh Solomon kikala kizopna pen pa leh tapa kikal bang ding hi, ci-in Pasian in David tung ah genkhol hi. David’ kiangah, “Keimah in ama’ pa ka hi dinga, amah Ka tapa ahi ding hi” na ci hi ( II Samuel 7:14). A huampi-in gen lehang Pasian in Amah Pasian banga muang mite khempeuh tungah Pa in a kep banga a kep nading a genna ahi hi. Late 103:13 ah, “Pa in a tapa a hehpih bangin, TOPA in Amah a kihta mite a hehpih hi” ci hi.
D. Eite’ Topa Zeisu Khazih’ Pa
Pasian pen Pa ahihna thu ah a thupipen leh a kicingpen kilaakna bel Pa Pasian leh Tapa Pasiante’ kikal-a kizopna ahi hi. A Masapen Pa pen “eite’ Topa Zeisu Khazih’ Pasian leh Pa” (Eph.1:3) kici hi. Thuciam Thak sunga Pasian’ thuthuk kilaakna khempeuh lakah a kicingpenpen bel Pa Pasian pen Zeisu Khazih’ Pa hi, cih thu mah ahi hi. Thuciam Thak sungah Zeisu Khazih pen Pasian’ Tapa kici pahpah a, Pasian’ hihna leh A nasepte Amah a kipiak tawntungnate in Zeisu Khazih Pasian taktak ahihna leh Thum gawm Pasian khat a hih taktakna a kilatna hi a, Zeisu Khazih leh Pa Pasian’ kizopna pen pa leh tapa kizopna bang hi, cih a kilatna zong ahi hi.
Kumzalom khat hun lai-a kipanin Pasian’ thuthuk kante in Pasian pen bangci bang lian-in Topa Zeisu’ Pa ahi hiam? cih thu mah na buaipih den uh hi. A taktakin bel “pa” leh “tapa” cih kammalte Pasian tawh kisai-a a kizat ciangin Pa Pasian leh Tapa Pasian kikal-a kizopna kigen hi bek lel a, mihingte’ ngeina-a pa leh tapa cih kizopna lian bel hi het lo hi. Pa leh Tapate a nih un tawntung ahih tuakna vuah kilangh mahmah hi. Tapa pen a kipiangsak na khempeuh laka a masapen hi, ci-a gen kumzalom li hun lai a Arius’ khialhna bang Tapa pen tawntung ahihna ah Pa tawh kibang lian hi, cih upna bulphuh-in pawlpi masate in na nial pah vinven uh hi.
Pasian’ thuthuk kan pawlkhatte in, Zeisu Khazih mihingin a pian ma-a a omkholhna a kipsak bangin a om uh hangin, van leh lei kipiansak hun maw, ahih kei leh mihinga a pian hun maw, ahih kei leh a kituiphum hun maw. ahih kei leh a sih hun maw, ahih kei leh a thawhkik hun maw, ahih kei leh van-a A kah hun maw, hun khatpeuh ah Tapa a suak panpan bangin gen mawk uh hi.Laisiangtho in Pa leh Tapate’kizopna pen tawntung ahihna ah Pa tawh kibang lian hi, cih upna bulphuh-in kizopna pen a tawntung pan hi, cih thu siangtakin hong hilh ahih manin hih bang ngaihsutnate a khial taktak ahi hi. I Topa pen Pasian’ “Tapa neihsun” hi a, mihinga hong pian ciangin Pasian in a Tapa hong “pia” ahi hi (John 3:16). Tapa a neih hong piak hi a, Tapa a suah panpan nadinga hong piak hi lo hi. Isaiah 9:6 ah, “Eite’ ading naungek khat suaka, eite’ tungah tapa khat hong kipia hi” na ci hi. Colossians 1:15 ah kitel penpen hi. Tua lai ah Khazih pen, “a kimu thei lo Pasian’ lim, a kipiangsak khempeuh laka ta upa” na ci hi. Khazih pen a kipiangsak khempeuh laka ta upa ahih leh, a kipiangsak khat beek a pian ma-in Tapa hi khina, a beisa hun a tawntung panin Tapa hi khin hi.
Tua ahih manin Pa leh Tapate’ kizopna pen Thum gawm Pasian khat tawntung huna kipan Pasian ahihna leh pumkhat ahihna uh tawh kizom hi. Topa Zeisu mihinga hong pianna zenzen pen Pasian leh Khaizh mihing hihna a kizopna tuam khat a pianna hi beka, tua pen tangthu ah hun khat lai-a thupiang khat ahi hi. Upna maan bel, kumzalom 4 hun lai-a upna maan lo Arian upna khial a kidawnkikna Nicene Creed (AD 325) in gen bangmah-in, “Pasian’ Tapa khat neihsun, leitungte’ pian ma a Pa’ Tapa khat neihsun; Pasian-a Pasian, Khuavak-a Khuavak, Pasian taktak-a Pasian; Tapa neihsun, a kipiangsak hi lo, Pa tawh a hihna uh sa khat lian ahi hi” ci-in kipulaak hi. Tua bang lian mah-in Athanasian Creed in, “Tapa pen Pa tawh pum khat lian hi a, a kibawl a kipiangsak hi lo, Tapa khat neihsun hi-in…a tawntunga kipan Pa pana piang ahi hi” ci-in na pulaak in.
“Pa,” “Tapa” cih kammate Pasian leh Zeisu Khazih genna-in i zat ciangin a khiatna sangpenpen-a kizang hi a, nuntakna ah pumkhat ahihna uh, pianzia leh hihna ah khat ahihna uh a lak hi-in, tua kawmkal mah ah Pa’ thu manga singlamteh tunga sihna ciang dong a thuak ding Tapa Pa in a piakna leh a sawlna zong kimu thei veve hi. Zeisu Khazih in Pa’ thu a manna pen Tapa ahihna hang hi a, Thum gawm Pasian khat sungah a neuzaw a lianzaw om hi, cih thu peuhmah hi lo hi.
Thum gawm Pasian khat sunga Pa Pasian leh Tapa Pasiante’ kizopna pen pa leh tapa kizopna ahih hangin (2Cor. 1:3; Gal. 4:4; Heb. 1:2), hih bang kizopna cih thu nangawn a kiciangtan mihingte’ lungsima ngaihsut theih dinga kigen zia ahi hi. Pa pen eite’ Topa Zeisu Khazih’ Pa hi, cih thu pen Thuciam Lui sungah a kitamgen khol loh hangin (Late 2:7; Isa. 7:14; 9:6-7), Thuciam Thak sungah bel kilimgen mahmah hi.
1. Pasian’ Tapa pen Pasian’ Tapa neihsun hi ci-in kigen den hi (Late 2:7; John 1:14; 18; 3:16,18; IJohn4:9).
2. Zesu Khazih pen a Tapa hi, ci-in Pa in pulaak ngiat hi (Matt. 3:17; 17: 5; Lk. 9:35).
3. Tapa in zong A Pa pulaak hi (Matt.11:27; 26:63-64; Lk. 22:29; John 8:16-29,33-44; 17:1).
4. Pa Pasian pen eite’ Topa Zeisu Khazih’ Pa ahihna mite in pulaak uh hi (Matt. 16:16; Mk. 15:39; John 1:34,49; Sawltak. 3:13).
5. Tapa in A Pa’ thu a manna tawh na pulaak hi (John 8:29,49).
6. Dawite nangawn in hih Pa leh Tapa kikal kizopna na pulaak uh hi (Matt.8:29).
E. Zeisu Khazih A Um Mi Khempeuhte’ Pa
Na khempeuh a piansak Pa ahihna tawh kizui-in Pa Pasian pen a kipiangsak na khempeuhte’ Pa hi cih thu tawh kilehbulh-in Pa Pasian mah pen a tuamin Zeisu Khazih um-a nuntak tawntungna a ngah mite bek’ Pa ahihhna zong thumaan thutak khat mah ahi hi. Pasian pen a kipiangsak na khempeuhte’ Pa ahihna in mi khempeuh in hotkhiatna ngah-in nuntak tawntungna ngah ding cihna hi peuhmah lo hi. Zeisu Khazih Honpa a upna tawh a sang mite bek in hotkhiatna ngah ding cih thu Laisiangtho in siangtakin hong hilh hi. Pa Pasian pen mi khempeuhte’ Pa hi a, mihingte khempeuh sanggam unau khat ahihna hangin mi khempeuh in hotkhiatna ngah-in vantung tung zenen lo ding hi. Tua sangsikin Zeisu Khazih a umte bek in hotkhiatna ngah-in kha thu ah Pasian’ tate ahi hi. Mihinga a pianna uh thu hang hi lo-in, Pasian’ innkuan sunga a nihveina, a hih kei leh kha-a suahthakna hang ahi hi (John 1:12; Gal. 3:26; Eph. 2:19; 3:15; 5:1).
Khasiangtho in a suahthaksak nasepna tungtawnin thu-ummi khat Pasian ta suak hi. Pasian pen a Pa taktak ahih manin Khasiangtho in “Abba , Pa” cisak hi. Pasian’ suahsak ahih manin Pasian pianngei nei pah a, tua banga suahthakna hangin Pasian gou-luah, Khaziah tawh gou-luah khawm hi pah hi (John 1:12-13; 3:3-6; Rom. 8:16-17; Tit. 3:4-7; I Pet. 1:4). Tua banga Pasian’ pianngei a kipia pen cikmah-in bangmah thu hangin sia kik ngei nawn lo hi.
Tuhun Satan’ vangliatna leh thuneihnate tawh kisai Lasiangtho in hong hilhnate i ngaihsut ciangin, mihinga piang khempeuh Pasian’ tate ahih lianlian loh luatna kilangh mahmah hi. Hih thu tawh kisai-in Khazih in tangtaka a gen thute ah kilangh mahmah hi. Amah a um lote tawh tungah, “Note na pa uh dawimangpa’ tate na hi uh hi” ci hi (John 8:44). Tua mah tawh kibangin, a piangthak lote a genna ah, “Tua tahum i cihte gilopa’ tate ahi hi” ci leuleu hi (Matt.13:38). Sawltak Paul mahmah in zong hotkhiatna ngah lote, “thuman lohna tate” leh “thangpaihna tate” na ci hi (Eph. 2:2,3).
Mi khatpeuh amah leh amah Pasian’ ta kisuaksak thei peuhmah lo hi, cih i nakgen ding thupi hi. Pasian bekin tua bangin khel thei a, Pasian nangawn in Zeisu Khazih um-in sang ding cih thu tungtawnin bekin sem hi (John 1:12).
Pasian Pa ahihna thu pen Thuciam Thak sunga upna laigil thupi khat ahi hi (John 20:17; I Cor. 15:24; Eph. 1:3; 2:18; 4:6; Col. 1:12-13; I Pet.1:3; I John 1:3; 2:1,22; 3:1). Vantunga i Pa in hong itna leh hong kepnate thu ummite adingin kihehnepna lianpi hi a, upna leh thungetna ah hanthotna lianpi ahi hi.
Dotna:
1. Thuciam Thak sungah Pa, Tapa, leh Khasiangtho nasepnate bangci bangin kikhen ahi hiam?
2. Pasian Pa ahihna thu 4 te gen bangteng ahi hiam?
3. Pasian a kipiangsak na khempeuhte’ Pa ahihna a kilatnate a tomin gen in.
4. Kizopna tungtawna Pasian Pa ahihna i cih teh bang a gen nuam i hi hiam?
5. Pa Pasian Zeisu Khazih-te pa leh ta bangin a tawntunga a kizopna uh gencian in.
6. Pa Pasian pen Zeisu Khazih’ Pa ahihna bangci bangin kilangh ahi hiam?
7. Pasian pen Khazih a um mi khempeuhte’ Pa ahihna gencian in.
8. Mi khat bangci bangin Pasian’ ta suak thei ahi hiam?
9. Mi khat Pasian’ ta a suah ciangin bang hamphatna ngah ahi hiam?
10.Mihing khempeuh Pasian’ tate hi, kici mawk leh bang khialhnateng om ding ahi hiam?
11.Khazih sunga thu ummi khat in Pasian Pa a a neihna hangin bang hehnepna ngah ahi hiam?
7
Tapa Pasian:
Pasian A Hihna leh Tawntung A Hihna
(God the Son: His Deity and Eternity)
Laisiangtho hong hilhna ah Zeisu Khazih pen Pasian taktak lah hi a, mihing taktak lah ahi hi. Tua thu hang mah-in, mi dangte tawh a kibatna zong oma a kibat het lohna zong om hi. John 1:14; I Timothy 3:16; leh Hebrews 2:14-17 te ah, Zeisu pen mite’ laka mi mah hi a, mihing bangmah-in nungta-in thuakin si hi, cih kimu hi. Tua zahkhat-in Laisiangtho mah in Zeisu pen mihing tawh kibang lo-in mihinga hong pian ma-in a tawntunga om khol den, a mihing nuntakna mahmah ah zong mawhna a nei kilkel lo, sihna pan minthanna tawh a thawkkikna leh vantung ah a kah kikna ah Pasian ahihna vangliatna a neihnate kimu thei hi.
Mihing a hihna lam-ah, kipat hun nei a, Khasiangtho in gaisakin nungak siangtho Mary sungpan suak hi. Pasian ahihna lam-ah, Khazih pen a tawntung pan ahih manin kipat hun nei lo hi. Isaiah 9:6 a genkholhna ah, “Note’ adingin naungek khat suakin, note’ tungah tapa khat hong kipia hi” ci-in kigen hi. A suak naungek leh a kipia tapa bel kilamdang sinsen hi. Tua bangmah-in Galatians 4:4 ah, “A kicin hun a tun ciangin Pasian in a Tapa hong sawla, numei sung pan suak thukham nuai-ah piang hi” ci hi. Hih lai muna a gen bangmah-in tawntung Tapa mihinga hong pianna tawh “numei sung pan suak “ hi.
Zeisu Khazih mihinga a pian ma-in om khol khin hi, i cih ciangin a tawntung huna kipan om khin hi, cih thu a gen nuam i hi hi. Kum zalom li hun lai-a Arian upna khial bangin a kipiangsak khempeuhte’ laka a kipangsak masapen hi, a ci nuam i hi bek kei hi. Tua ahih manin a om kholhna thu i gen ciangin tawntung ahihna tawh i gen den ding ahi hi. Tua banah, Khazih Pasian ahih leh a tawntung ahih kul-in, tawnung ahih leh Pasian a hih kul-a, Pasian a hihna leh tawntung a hihnate khat panin khat kikhen thei lo-in kidihpih uh hi.
Zeisu Khzih tawntung a hihna leh Pasian a hihnate thu nih-in kikiosak thei ding hi: (1) Laisiangtho sunga hih thu a kigenna munte, leh (2) Lasiangtho sunga kigen thu pawlkhatte in hih thu lian a gen loh hangin hih thu mah a kimuh theihna munte.
A. Pasian’ Tapa Pasian A Hihna leh
Tawntung A Hihna A Kigennate
Zeisu Khazih tawntung a hihna leh Pasian ahihna Laisiangtho sung mun tampia a kigennate in Amah ciangtan nei lo mimal khat-a om ahihna leh thum gawm Pasian khat sunga mimal dangte tawh kibang liana a tawntunga om den ahihnate hong lak hi. Mihinga hong pianna hangin tawntung a hihna leh Pasian a hihna kiam tuan lo hi.
John 1:1-2 ah Laisiangtho in, “A kipatcil-in Thu a om hi, tua Thu Pasian tawh om khawma, tua Thu Pasian ahi hi. Tua pen mah a kipatcil-in Pasian tawh a om khawm hi” ci-in hong hilh hi. Micah 5:2 ah, “Ahih hangin nang, Bethlehem Ephratah aw, Judah sunga a tultul-a kisimte lakah na neu phial zongin, kei’ adingin nang sung pan khat hong piang dinga Israel ukpa ahi ding hi; Ama’ pianna tanglai pan hi a, a tawntung pan ahi hi” cipin na kigen khin hi. Isaiah 7:14 in Amah nungak siangtho sung pan piang ahihna kipsak-in, Immanuel cih min pia hi, tua min khiatna “Eite tawh Pasian om khawm” a cihna ahi hi. Isaiah 9:6 ah, Zeisu pen naungek suaktung khat ahih hangin, hong kipia Tapa ahihna na gena, “a thahat/vanglian Pasian” ci-in na kilo ngiat hi. John 8:58 ah Khazih in, “Thu man kong gen inah, Abraham om ma-in Keimah ka om khin hi” a cih ciangin Judahte in Amah leh Amah Pasian a hihna leh tawntung a hihna a kigenna ahih lam thei pah uh hi (Pai.3:14; Isa. 43:13 tawh enkaak in). John 17:5 a a thungetna ah Khazih in, “Tu-in, Pa aw, Tu-in ahih leh Pa aw, leitung a om ma-a nang tawh ka neih minthanna tawh hong minthangsak in” ci-in na ngen hi (John 13:3 tawh enkaak in). Philippians 2:6-7 ah Zeisu Khazih pen mihinga hong pian ma-in “Pasian’ pianzia” a om hi, ci-in hong hilh hi. Hih sanga kicianzaw-a a genna Colossians 1:15-19 ah kimu thei a, Zeisu Khazih pen a kipiangsak nate khat beek a om ma-a a omna, Amah mah na khempeuh a piangsak Pa ahihna, leh a kimu thei lo Pasian’ mel ahihna na gen hi. I Timothy 3:16 ah Zeisu Khazih pen “ci leh sa-a hong kilang Pasian” ahihna tel takin na kigen hi. Hebrews 1:2-3 ah, Tapa pen a piangsak Pa leh Pasian’ mel taktak ahihna na kigen kika, 13:8 ah tawntung ahihna na genpha lai hi (Phil. 1:4; Kilaakna 1:11 tawh enkaak in). Laisiangtho sungah Zeisu Khazin Pasian ahihna leh tawntung ahihna na kigen mun mahmah mawk hi. Cults pawlkhatte sim loh tuhun Laisiangtho siam tampite in Zeisu Khazih tawntung ahihna leh Pasian ahihna kiptakin um tek uh hi.
B. Pasian’ Tapa Tawngtung A Hihna A Kigenkhaknate
Pasian’ Kammal in mun tampi ah Zeisu Khazih mihinga hong pian ma-a a omkholhna leh tawntung ahihna na gen cinten den hi. Hih bang thu a kilatna mun tuamtuamte i en ding hi:
1. Piansaknate Khazih’ nasep ahihna na kigen hi (John 1:3; Col. 1:16; Heb.1:10). Tua ahih manin piansakna khempeuh ma-in omkhol khin hi.
2. Thuciam Lui sunga kimu mun mahmah TOPA’ Vantungmi mahmah zong mi dang peuh hi lo-in Zeisu Khazih mah ahi hi. Khatveivei vantungmi khat bang, mihing khat bang peuh in a kilaak hangin Pasian ahih luat mahmahna kimu thei hi.Hagar (Pianci.16:70, Abraham (Piancil.18:1; 22:11-22; John 8:58 en pha in), Jacob (Piancil. 48:15-16; Piancil. 31:11-12; 32:24-32 te zong en pha in), Moses (Pai. 3:2,14), Joshua (Josh.5:13-14), leh Manoah (Thukhente 13:19-22) te tungah na kilang hi. A mite’ adingin galdo a, A mite a huu Pa ahi hi (Kumpite Nihna 19:35; Khangtangthu Masa 21:15-16; Late 34:7; Zech. 14:1-4).
3. Topa Zeisu Khazih a kipia zaminte in Amah a tawntung ahihna hong lak hi. A kilawhna minte banglian mah in amah Pasian hi a, tawntung ahi hi. Amah “Pasian’ Tapa,” “Pasian’ Tapa neihsun,” “A Kipatna leh a Tawpna,” “Alpha leh Omega,” “Topa,” “Na Khempeuh Topa,” “Minthanna Topa,” “Khazih,” “Lamdang,” “Thulak Pa,” “Vanglian Pasian,” “Tawntung Pa,” “Pasian,” “Eite Tawh Pasian om khawm,” “A Lian eite’ Pasian,” “A tawntunga Thupha ngah Pasian” cih bangin na kilo hi.
Hih a kilawhna zaminte in Zeisu Khazih leh Thuciam Lui sunga Jehovah-Pasian’ kilaaknate a kizopna hong lak hi (Matt.1:23 leh Isa. 7:14 enkaak inla Matt. 4:7 leh Thuhilhkikna 6:16 enkaak-in, Mk. 5:19 leh Late 66:16 enkaak inla, Matt.22:42-45 leh Late 110:1 enkaak in).
Thuciam Thak sunga Pasian’ Tapa minte leh Pa leh Khasiangtho a kilawhna minte kibanga, amaute a kikim ahihna hong lak a (Matt. 28:19; John 14:1; 17:3; Sawltak. 2:38; I Cor. 1:3; II Cor. 13:14; Eph. 6:23; Kilaakna 20:6; 22:3), Pasian ci-in na kilo sinsen ngiat hi (John 1:1; Rom. 9:5; Titus 2:13; Heb. 1:8).
4. Pasian bek in a neih hihnate a neihna in mihinga hong pian ma-in om khol a hihna leh tawntung ahih taktakna hong lak hi. Amah nuntakna (John 14:6), Ama’ thu-a om ahihna (John 8:26), a kikhel lo ahihna (Heb. 13:8), Thumaan thutak (John 14:6), itna (I John3:160, sianthona (Heb. 7:26), tawntung hihna (Col. 1:17; Heb. 1:11), mun khempeuh ah thakhat thu-a a omna (Matt. 28:20), na khempeuh a theihna (I Cor. 4:5; Col. 2:3), leh na khempeuh a hihtheihna ( Matt.28:18; Kilaakna 1:8) cihte in Amah tawntung ahihna hong lak hi.
5. Pasian banga a kibiakna in zong Amah mihinga hong pian ma-a a omkhohna leh tawntung ahihna hong lak hi (John 20:28; Sawltak. 7:59-60; Heb. 1:6). Topa Zeisu Khazih Pasian ahih leh Amah a tawntung pan a tawntung dong hi, cih ding sim loh thu dang mahmah om lo hi.
Pasian’ Tapa Pasian ahihna leh tawntung ahihna thute khenpi 8 na a i sin ding Zeisu Khazih ci leh sa hong suahna tungtawna mihing ahihna tawh etkhop den ding hoih hi.
Dotna
1. Zeisu Khazih Pasian ahihna leh mihing ahihna a kilatnate khentel inla gen in.
2. Pasian Tapa tawntung ahihna a kilatnate bangte ahi hiam?
3. Pasian tawntung ahihna in Pasian ahihna bangci bangin lak ahi hiam?
4. A nasepte tungtawin Pasian Tapa tawntung ahihna a kilatnate bangte ahi hiam?
5. A nasepte in Pasian Tapa Pasian ahihna bangci bangin hong lak ahi hiam?
6. Amah a kilawhna zaminte in Zeisu Khazih tawntung ahihna bangci bangin hong lak ahi hiam?
7. Pasian bek in a neih a hihnate a neihna in Zeisu Khazih tawntung ahihna bangci bangin hong lak ahi hiam?
8. Zeisu Khazih Pasian ahihna Pasian bek in a neih hihnate a neihna in bangci bangin hong lak ahi hiam?
9. Zeisu Khazih Pasian ahihna thu leh tawntung ahihna thute i Christian upna ah bangzah-in thupi ahi hiam?
8
Tapa Pasian: Ci leh Sa Hong Suahna
(God the Son: His Incarnation)
Zeisu Khazih ci leh sa hong suahna thu i ngaihsut simin a thupi nih i phawk den ding kisam hi: (1) Zeisu Khazih Pasian leh mihing taktak ahihna, leh (2) ci leh sa hong suah ciangin, A minthanna a koihkhiat hangin, A Pasian hihna peuhmah koihkhia lo hi, cih thute ahi hi.Ci leh sa hong suaha ah A Pasian hihna peuhmah kem paisuak hi. Pasian ahihna kim leh mihing ahihna bitte singlamteh tunga A nasepna-a kisamte ahi hi. Mihing hi lo hi leh, si thei lo dinga; Pasian hi lo hi leh, Ama’ sihna in ciangtan om lo manphatna nei lo ding hi.
John in tawntung hun pan Pasian tawh khat hi a, Pasian ahi Khazih (John 1:1) ci leh sa hong suakin eite’ lakah hong teng hi ci-in gen hi (John 1:14). Paul in zong “ Pasian’ pianngei a om Khazih in mihing tawh kibatna la (Phil. 2:6-7); “Pasian ci le sa-in kilang” (I Tim. 3:16); Pasian’ minthanna kilaakna ahi Khazih pen Pasian’ lim leh mel linlian hi (Heb. 1:3) ci-in gen hi.Luke in a kicingzaw-in ci leh sa hong suahna na gena, a gaina leh a suahna thute a cingin na gen hi (Lk. 1:26-38; 2:5-7).
Laisiangtho sungah a telhak simsim a kilehbulh thu tampi kigena, tuate’ lakah Zeisu Khazih pen Pasian taktak leh hi a, mihing taktak lah ahihna zong a kidawk mahmah khat ahi hi. Hih banga a kilamdanna a kimuh theihna mun tampi om hi: Amah gim hi (John 4:6), ahih hangin a gim mite in tawldamna a ngah nadingin Ama’ kiangah sam hi (Matt. 11:28). A gilkial hi(Matt. 4:2), ahih hangin Amah “nuntakna anlum” ahi hi (John 6:35). Amah a dangtak hi (John 19:28), ahih hangin Amah nuntakna tui ahi hi (John 7:37). Amah gimna thuak hi (Lk. 22:44), ahih hangin natna khempeuh damsak hi. Amah khangto a tha hat hi (Lk.2:40), ahih hangin Amah tawntung hun pana om khinsa ahi hi (John 8:58). Ama’n ze-etna thuak hi (Matt.4:1), ahih hangin Pasian ahih mahbangin mawhna kibawlsak thei lo hi. Theihna ah Amah leh Amah kiciangtan a (Lk. 2:52), ahih hangin Amah Pasian’ pilna ahi hi. Ama’n (vantungmite sang a niamzaw-in kibawl-a a kiniamkhiatna tawh kizui-in) “Kei sangin Ka Pa lianzaw hi’ ci a (John 14:28), ahih hangin, “Kei hong mute in Ka Pa a mu ahi hi” ci-in (John 14:9), “Kei leh Ka Pa khat ka hi uh hi” ci kawikawi hi (John 10:30). Ama’n thungen-a (Lk.6:12), ahih hangin Amah mah-in thungetna dawng hi (Sawltak. 10:31). Han ah kap-a (John 11:35), misite thosak kawikawi hi (John 11:43). Ama’n, “Kei, mihing Tapa kua hi nong ci vua leh?” ci-in donga (Matt.16:13), ahih hangin “kuamah in Ama’ thu teci a pan ding a deih kei hi: bang hang hiam cih leh mite’ sungah bang om cih thei hi” ci leuleu hi (John 2:25). Ama’n “ Ka Pasian, Ka Pasian bang hangin hong taisan na hi hiam?” ci-in kiko a (Mk. 15:34), tua banga a kiko hun mah-in tua Pasian mah leh leitung Ama’ sungah kilemsak hi (II Cor. 5:19). Amah si a, ahih hangin Amah nuntak tawntungna hi kawikawi hi. Amah Pasian’ mi hoih hi a, mite’ adingin Pasian hoihpen ahi hi.
Hih bang thute i muhna tungtawnin khatveivei Zeisu Khazih a mihing hihna ah gamtang-in, khatveivei lah a Pasian hihna taktak tawh a tatna kimu thei hi. A mihing hihna in a Pasian hihna kiamsak peuhmah lo a, a Pasian hihna tawh a mihing hihna ah a lungkim bangin gamta gawp cih bang om ngei lo hi. A mihing hihna tawh a gilkial laitaka a nek dingin suangtumte anlum suaksak theih mahmah hi napi-in tua bangin hih ngei lo hi.
A. Khazih Mihing A Hihna
1. Khazih mihing hihna pen leitung pian ma-a kigelsa ahi hi (Eph. 1:4-7; 3:11; Kilaakna 13:8). Zeisu Khazih “tuuno” a kicihna i ngaihsut ciangin biakpiakna a kigawhna leh A sisan a luanna a gen nopna hi a, tua bang a pian theih nadingin pumpi khat kisam hi.
2. Thuciam Lui sunga Khazih tawh kisai genkholhna leh lim khempeuh Pasian Tapa ci leh sa hong suah nading lam-et kholhna vive ahi hi.
3. Khazih mihing ahihna thu Ama’ suah nading a kigen kholhna leh a suahna ah ki mu hi (Lk. 1:31-35).
4. Hih leitunga a nuntakna ah mihing a hihna kilang hi: (1) A mihing minte: “Mihing Tapa,” “Mihing ahi Khazih Zeisu,” “David Tapa,” leh tua banga a kigennate; (2) A mihing nu leh pate: “a ta upa,” “hih mi’ suan,” “David’ suan,” “Abraham’ suan,” “numei sung pan suak,” “Judah pan khangkhia,”; (3) Mihing pumpi, hinna leh kha a neihna (Matt. 26:38; John 13:21; I John 4:2,9); leh (4) Amah leh Amah a kiguat mihing kiciangtannate.
5. Khazih mihing a hihna a sihna leh a thawhkikna ah kimu thei hi. Singlamteh tungah thuaka si pen mihing pumpi hi a, thawhkikna minthanna tawh han sung pana hong paikhia zong tua pumpi mah ahi hi.
6. Khazih mihing ahihna vantung ah kahto-in tu-in minthanna a ngah A mihing pumpi mah tawh Ama’ mite adingin siampi sem hi.
7. Hong pai kik ciangin “tua Zeisu” mah a paitoh bangin hong pai kik dinga, ci leh sa hong suahna pumpi mah tawh (minthanna a ngah khin) hong pai kik ding hi.
B. Bang Hanga Ci Leh Sa Hong Suak
1. Mite’ tungah Pasian hong pulaak dinga hong pai ahi hi (Matt. 11:27; John 1:18; 14:9; Rom. 5:8; I John 3:16). Ci leh sa hong suahna tungtawnin a kitel zo ngei lo sing Pasian mihingte’ tel theih dingin hong om hi.
2. Mihingte pulaak dingin hong pai hi. Amah Pasian’ mi hoihpa hi a, tua bang a hihna tawh thu ummite adingin etteh ding ahi hi (I Pet. 2:21); ahih hangin hotkhiatna ngah lote’ adingin etteh hi ngei lo hi; bang hang hiam cih leh Pasian in tuate hotkhiat dingin zong beka puahphat ziau sawm lo hi.
3. Mawhna ading kithoihna pia dingin hong pai hi. Hih thu hangin Pasian’ tungah A pumpi hangin lungdamko a, mawhna ading kithoihna maan taktak ahi hi (Heb. 1-10).
4. Dawimangpa’ nasepte susia dingin ci leh sa-in hong pai hi (John 12:31; 16:11; Col. 2:13-15; Heb. 2:14; I John 3:8).
5. Pasian tawh kisai thute ah lainatna nei-a a muanhuai siampi lian a suah theih nadingin hih leitung ah hong pai hi (Heb. 2:16-17; 8:1; 9:11-12,24).
6. Pasian in David tawh a bawl thuciamna a tangtun theih nadingin leitung ah hong pai hi (II Sam. 7:16; Lk. 1:31-33; Sawltak. 2:30,31,36; rOM. 15:8). A minthanna pumpi tawh hong kilangin “KUMPITE’ KUMPI, TOPATE’ TOPA” in hong mang dinga, A pa David’ tokhom ah hong tu ding hi (Lk.1:32; Kilaakna 19:16).
7. Ci leh sa hong suahna tawh, a kipiangsak thak, mihing thak ahi pawlpi tungah na khempeuh ah Lutang suak hi (Eph. 1:22).
Ci leh sa hong suahna ah Pasian Tapa in mihing pumpi bek la li-in mihing hinna leh kha zong la hi. Tua hi a, mihingte a nuntakna a muh theih muh theih loh na khempeuh la kim ahih manin mihing taktak a suak hi a, mihing innkuan tawh a tawntungin kikhih-in “Adam nunung” a kicih zong a hi mahmah hi a (I Cor. 15:45), “ A minthanna pumpi” (Phil.3:21) mahmah zong tu mahmah a om a tawngtunga om ding ahi hi.
Tawntung Tapa ahi Jehovah-Pasian pen Mary’ Tapa zong hi a, Nazareth khua a naupang, Judea gam ah thuhilh-a cina a damsak Pa, Bethany a leengla, Calvary Tuuno ahi hi. Amah tu laitak mihingte’ Honpa, Siampi Lian, hong pai ding Mopipa leh Topa ahih mahbangin Minthanna Kumpi hi lai ding hi.
Dotna
1. Pasian’ Tapa ci leh sa hong suahna tawh kisai-in i phawk den ding thupi nih bangte ahi hiam?
2. Khazih Pasian taktak a hihna leh mihing taktak a hihnate i letkip ding bang hangin thupi ahi hiam?
3. Khazih in mihing hihna bukim nei taktak hi cih bangci theih i hi hiam?
4. Khazih in mihingte’ tuah ngeiteng mah tuak kha taktak hi cih bangci theih i hi hiam?
5. Khazih leitung ah a om lai mah-in a Pasian hihnate bangci bangin kilang ahi hiam?
6. Khazih ci leh sa hong suahna leh Pasian mihingte’ tunga hong kilaalna bangci bangin kizom ahi hiam?
7. Khazih ci leh sa hong suahna leh mawhna ading kithoihna bangci bangin kizom ahi hiam?
8. Khazih ci leh sa hong suahna leh dawimangpa’ nasepte a suksiatna bangci bangin kizom ahi hiam?
9. Khazih ci leh sa hong suahna leh Siampi Lian ahihna bang ci bangin kizom ahi hiam?
10.Khazih ci leh sa hong suahna leh Pasian leh David in a bawl thumciamna bangci bangin kizom ahi hiam?
11.Khazih ci leh sa hong suahna leh pawlpi tunga Lutang a hihna bangci bangin kizom ahi hiam?
9
Tapa Pasian:
Mawhnei Mite’ Tanga A Sihna
(God the Son: His Atonement)
Laisiangtho sungah Zeisu Khazih’ sihna pen leitung buppi mawhna hang ahihna hong kihilh hi. Tua mah tawh kizui-in, Tuiphumpa John in mipite’ tungah Zeisu Khazih kua hiam cih a gennaah Leitung mawhna a puakhia Pasian’ Tuuno” ci-in na gen hi (John 1:29). A sihna ah Zeisu Khazih pen mi khempeuh’ muna si ahi hi. “Tanga si” cih kammal lian Laisiangtho sungah a kizat loh hangin, Zeisu Khazih pen mawhnei mite’ tanga si ahihna bel kigen den hi. Tehpih om lo mawhnei mite’ tanga a sihna tawh, mawhnei mite’ tunga Pasian’ thukhenna khempeuh Zeisu in pua khinmang hi. Hih banga mawhnei mite’ tanga a sihna hanga i ngah hamphatna zong van kizuak kilei banga tel nop mahmah na khat hi bilbel hi. Honpa Zeisu in mawhnei mite’ tunga tung ding thukhenna khempeuh Pasian’ lungkimna ciang dongin thuak khin hi. Pasian hong piak hotkhiatna i san ciangin, Zeisu Khazih ei’ adingin si khin ahih manin Zeisu Khazih Honpa-in sanga hih lungdamna thu a um dingin mihingte hong kisawl hi.
“Mawhnei mite’ tanga si” cih kammal in Zeisu Khazih’ sihna in hong zawhsak khempeuh gen kim kha sam lo hi. A taktakin Laisiangtho sungah Zeisu’ sepsa khempeuh a huam kim ding kammal kizang om lo hi. Theology ah “atonement” cih kammal kizang mun mahmah a a huam kim dinga kingaihsun ahih hangin Thuciam Lui leh Thuciam Thak sungah hih kammal bang lian om tuan lo zel hi. Thuciam Lui sungah bel mawhna tanga sihna cih pen kithoihna biakpiakna tuamtuamte tungtawna mawhna tawlkhat sung a kikhuhna genna-in kizang hi. “Pasian’ tuak keiikaiina tungtawnin a beisa mawhnate tawlkhat sung a kimaisakna” zong tua thu hang mah ahi hi (Rom.3:25). Mawhna tawlkhat sung khuh bek lo-a a tawntunga puakhia ding kithoihna Tuuno bangin Ama’ Tapa mahmah hong pai ding ngak gige ahih manin Pasian in Thuciam Lui hun lai-in thumaan takin mawhna maisak thei hi (John1:29).
A. Tapa’ Sihna In Bangteng Sem
Khazih’ sihna bangzah-in manphacih thu Laisiangtho in thupi pawlkhat hong hilh hi.
1. Khazih’ sihna in mawhnei mite Pasian in bangzah-in hong it cih hong lak hi (John 3:16; Rom. 5:8; I John 3:16; 4:9). Pasian in hong it cih thu i telna hangin thu um lo mite in a ngah zawh ngei loh ding uh nuntakna siangtho-in hong nungtasak nuam ding hi (II Cor.5:15; I Pet. 2:11-25).
2. Khazih’ sihna pen mawhnei mite’ mawhpaihna pan a suahtak theih nading mawhnei mite’ adinga a siangtho Pasian’ tunga kipia tatkhiatna man hi. Laisiangtho sungah Zeisu Khazih’ sihna a kigenna khempeuh ah, “ading” cih kammal kizang dena, a khiat mahmah zong, “tangin,” “mun-ah” cihna ahi hi (Matt. 20:28; Mk. 10:45; I Tim. 2:6). Khazih’ sihna pen mawhnei mite’ thuak loh a phamawh mawhnei mite’ thuak ding khempeuh thuakna ahi hi (Rom. 4:25;; II cor. 5:21; Gal. 1:4; Heb. 9:28).
Eite’ suahtak nading man a piakna tawh Khazih in eite hong tan hi. Thuciam Thak sung ah hih thu kigenna-a kizang Greek kammal thupi mahmah thum om hi: (1) agorazo, a khiatna, “van kizuakna mun ah lei” (agora, van kizuakna mun a cihna). Mihing peuhmah mawhn ei mi a hihna tawh sihna thukhenna thuaksa a kingaihsun hi a ( John 3:18-19; Rom. 6:23), ahih hangin Zeisu Khazih in Ama’ sisan hong bua-a hong tatkhiatna tawh hong lei kik hi (I Cor. 6:20; 7:23; II Pet. 2:1; Kilaakna 5:9; 14:3-4); (2) exagorazo, a khiatna “van kizuakna mun pan leikhia” cihna hi a, van kizuakna mun-a kilei bek hi lo-in tua mun-a kizuakna pan hemkhia, cih khiatna nei-in (al. 3:13; 4:5; Eph. 5:16; Col. 4:5), tatkhiatna nasep pen khatvei-a a tawntung ading zawhsa hi, cihna hong lak hi. (3) lutroo, a khiatna “khahkhia,” “suaktasak” cihna ahi hi (Lk. 24:21; Tit. 2:14; I Pet. 1:18). Hih bang khiatna mah a nei hih kammal noun a kizang pen lutrosis (Lk. 2:38; Heb. 9:12), hi a, kammal kizang dang khat leuleu bel epoiesen lutrosin (Lk. 1:68) ahi hi. Hih kammal mah a kizatzia dang khat pen apolutrosis hi a, sila khat khahkhia-in suaktasak, a cihna ahi hi (Lk. 21:28; Rom. 3:24; 8:23; I Cor. 1:30; Eph. 1:7,14; 4:30; Col. 1:14; Heb. 9:15; 11:35). Hih thute tawh kizui-in tatkhiatna i cih man pia-a leina, kizuakna pan lakkhiatna, leh Zeisu Khazih’ sihna leh Khasiangtho in tatkhiatna a tangtunna tungtawna a kilei mimalte suahna kiuhkeuhna ahi hi.
Khazih’ sihna pen Thuciam Lui hun lai-a thumaan-a thukhenna a tun pak lohna dinga mawhna a khuh ganhinga biakpiaknate bang hi lo-in mawhna kithoihna taktak ahi hi. Mawhna biakpiakna-a a kipiakna ah Zeisu Khazih in i mawhnate a tawntunga kimang dingin pukhia khin hi (Isa. 53:7-12; John 1:29; I Cor. 5:7; Eph. 5:2; Heb. 9:22,26; 10:14).
3. Zeisu Khazih’ sihna pen Ama’ lampang panin mawhnei mite in a palsat thukham thu manna hi a, mawhnei mite’tunga Pasian in a thumaanna tawh a kalh khempeuh thoihdam-a lungkimsakna ahi hi. Greek kammal hilasterion pen “hehpihna tokhom” genna a kizang hi a (Heb. 9:5), Siangthopen Mun a thuciam singkuang sunga thukham a tuam thuciam singkuang sin ahi hi. Biapiak Ni in (Siampi. 16:14) tua hehpihna tokhom biaknatau pana kila sisan kitheh a, tua in thukhenna tokhom pen hehpihna tokhom suaksak hi (Heb. 9:11-15). Tua mahbangin, Pasian’ tokhom mahmah zong Zeisu Khazih’ sihna tungtawnin hehpihna tokhom hong suak ahi hi (Heb. 4:14-16). Hih kammal tawh a kibang Greek kammal hilasmos bel kithoihna cih thu kigenna-a kizang kammal ahi hi (I John 2:2; 4:10); a khiatna pen Zeisu Khazih singlamteh tungah a sihna hangin mihingte’ mawhna thukhen nading thumaan taka Pasian’ hong kalhna khempeuh kicin khin, a cihna ahi hi. Romans 3:25-26 ah Zeisu Khazih hong si-in dikna thukham khempeuh a cit nading thu tungtawnin mawhna a maisakna ah Pasian thutang hi, cih-in kipulaak hi. Hih thu khempeuh ah Pasian pen mawhnei mite’ tungah phulaak nuam a sa Pa bangin kimu lo a, a itna hanga mawhnei mite’ tunga lainatna a lak Pasian bangin kimu zaw hi. Tua ahih manin, tatkhiatna leh kithoihna thu ah Khazih sunga thu ummi peuhmah amau’ adingin tatkhiatna man a cingin kipia khin, mawhnei mi a hihna panin kisuaktasak khin, a mawhna hanga Pasian in thumaan tgaka a kalh thukhenna khempeuh kicin khin, ci-in kikhamuan khin hi.
4. Khazih’ sihna in hong tankhia-in a siangtho Pasian lungkimsak bek lo a, leitung mahmah Pasian tawh kilemsak hi. “Kilemsak,” cih khiatna a nei Greek kammal katallasso pen mihingte’ pianzia a kikhel khit cianga Pasian tawh kituahkhawmsak, cih genna-in kizang hi. Thuciam Thak sung ah kizang kawikawi hi (Rom. 5:10-11; 11:15; I Cor. 7:11; II Cor. 5:18-20; Eph. 2:16; Col. 1:20-21). Kilemna cih thu ah Pasian kikhel cih peuhmah hi lo-in Zeisu Khazih in hong tatkhiatna hangin mihingte leh Pasian’ kikala kizopna kikhel cihna bek ahi hi. Mihingte a mawhna kimaisaka, dik kitangsak-in, Pasian tawh a kilem thei dinmun ah kilamto hi. Mihing te tawh a kilem theih nadingin Pasian’ pianzia kikhel-in mawh nei suak,cih hi lo-in, mawhneite Pasian pianzia siangtho banga kikhel, cih hizaw hi. Pasian in leitung buppi tankhia-in a thoihdam mahbangin hih kilemna zong leitung buppi ading ahi hi (II Cor. 5:19; II Pet. 2:1; I John 2:1-2). Hih banga leitung buppi ading Pasian tatkhiatna, kithoihna, leh kilemnate kicing lua mahmah ahih manin Pasian in tu laitakin leitung mawhpaih lo phot liang hi (II Cor. 5:18-19; Eph. 2:16; Col. 2:20).
5. Khazih’ sihna in mawhnei mite a hotkhiat theih nadinga a khaktan thei khempeuh Pasian’ lungsim pan hemkhia khina Khazih’ sihna in mawhna pan hong tankhia khin-in, Pasian kilkungkimsak khina, Pasian leh mihingte kilem thei ta hi. Zeisu Khazih Honpa-a a um mi peuhmah Pasian in sanga dik a tansak theih nadinga a khaktan bangmah om nawn lo hi (Rom. 3:26). Zeisu Khazih’ sihna tungtawnin ciangtan om lo Pasian’ itna leh vangliatnate mawhnei mite’ tunga a kalh thukhennate in khaktan nawn lo ahih manin Zeisu Khazih’ sihna hangin leitung buppi kigawm sangin Pasian’ ading Ama’ deihna tung zaw hi, kici thei hi.
6. Khazih a sihna ah mawhnei mite’ thuak ding khempeuh amau’ tanga thuak Pa hong suak hi (Siampi. 16:21; Isa. 53:6; Matt. 20:28; Lk. 22:37; John 10:11; Rom. 5:6-8; I Pet. 3:18). Hotkhiatna ngah dinga Pasian a zuan khempeuh ading khamuanna ahi hi. A mawhna thu ah Pasaian tawh a kizopna tawh kisai mawhnei mi khat peuh in a up ding thu ahi hi. Zeisu Khazih leitung mi khempeuh’ adingin si hi, cih thu um pongmawkna bek kicing lo hi; tua mi’ mawhna Zeisu Khazih mahmah in mawhnei mite’ tanga si Pa ahihna tawh puakhia khin taktak hi, ci-a mimal upna kisam hi – tua bang upna mah lah vanzanna, lungdamna, leh lungkimna hong pia upna ahi hi (Rom. 15:13; Heb. 9:14; 10:2). Hotkhiatna i cih a um mi ading thakhat mah-a tung pah Pasian’ nasepna lamdang ahi hi.
B. Tapa’ Sihna Thu Tawh Kisai Upna Khialte
Khazih sihna thu kitelkhial pahpah thei hi. Tuhun-a tuabang telkhialhnate i theih ding hoih hi.
1. Pasian in mawhnei kiuhkeuh lo Pa’ tungah mawhneite’ mawhna a suat pen a kilawm lo thu hi. Zeisu Khazih in mawhnei mite’ mawhnate a puakkhiat laitakin ut lo pipi a kisuan hi leh bel hih bangin Pasian kimawhsak thei kha ding hi; ahi zongin Laisiangtho hong hilhna ah Zeisu Khazih in A Pa’ itna bangmah itna nei-in a Pa’ deihna leh Ama’ deihna kibang hi, ci-in Laisiangtho in hong hilh hi (John 13:1; Heb. 10:7). Tua mah tawh kizui-in i tel khit zawh ngei loh ding thum gawm Pasian khat’ nasepna ah Pasian in Khazih’ tungtawin leitung Amah tawh kilemsak hi (II Cor. 5:19). Zeisu Khazih’ sihna pen a kilawm lo pi-a sihsakna ahih cih thadah, Pasian mahmah, thumaan-a thukhen Pa ngiat in ciangtan om lo itna leh kipiakkhiatna tawh mawhnei mite’ tunga a kalh mawhna thukhenna khempeuh a cinga thuak ahi hi.
2. Khazih pen sihna a thuak donga a upna khat hanga a hanna leh a thumaannate etteh dinga martyr khat banga si ahi hi. Hih bang upna a khialhna bel Khazih pen Pasian’ hong piak Tuuno ahihna mahbangin kuamah in Ama’ nuntakna laksak lo a, Amah leh Amah hong kipia ahi hi, cih thu ah kimu thei hi. (John 10:18; Sawl. 2:23).
3. Khazih mite’ lungsim a lawpsak dinga si hi bek lel hi, ci-a gen zong om hi. Singlamteh ngiat in Pasian in mawhna bang zah-in hua hiam cih hong lak ahih manin singlamteh thu a lungngai mi peuhmah mawhna pan kideekin kiheii ding hi, cih upna ahi hi. Laisiangtho bulphuh ding a nei lo hih upna bel Pasian in mite puahphat ding hanciam hi cih upna hi a, ahi zongin Pasian in mite pianthaksak ding bek hanciam hi.
Dotna
1. Khazih pen mawhnei mite’ tanga si hi, cih thu bang a cihna ahi hiam?
2. Thuciam Lui in mawhna kithoihna tawh kisai bangci gen ahi hiam?
3. Khazih’ sihna leh Pasian itna bangci bangin kizom ahi hiam?
4. Tatkhiatna thu a kigenna a kizang kammal thumte leh a khiatna bang ahi hiam?
5. Pasian lungkimsak nadinga kithoihna a cih bang hi a, tua hangin bang hamphatnateng kingah cih gen in.
6. Pasian tawh kilemkikna a cih bang hi a, tua hangin bang hamphatnateng kingah cih gen in.
7. Leitung buppi Pasian tawh kilem khin ahih leh bang hangn mi pawlkhat in hotkhiatna ngah lo veve ding uh ahi hiam?
8. Bangci bangin tatkhiatna, Pasian kilungkimsakna leh Pasian tawh kilemnate in Pasian in mawhnei mite a lungsim bangin honkhia theisak ahi hiam?
9. Bang hangin Thuciam Thak sungah hotkhiatna pen upna tungtawn bek hi, ci-in kinakgen ahi hiam?
10. Khazih’ sihna tawh kisai upna khial pawlkhat gen inla, bang hangin khial uh kici thei hiam cih zong gen in.
10
Tapa Pasian: Sihna Pan A Thawhkikna
(God the Son: His Resurrection)
A. Thuciam Lui Sunga Thawhkikna
Mi khempeuh a thawhkik nading leh Khazih mahmah a thawhkik nading thu Thuciam Lui dungah na kihilh khin hi. Job 19:25-27 sungah, “Bang hang hiam cih leh ka kei hong Tanpa nungta hi cih ka thei a, ni nunung ciangin amah hih leitung ah ding dinga: than in hih ka pumpi a nektum khit hangin, ka ci leh ka sa mahpin Pasian ka mu ding hi: keimah mah in ka mu dinga, ka mit-in ka en dinga, mi dang hi lo ding hi” cih kammalte i muh mahbangin Abraham-te pian tawh a kikhankhat dinga kingaihsun Job’ hun lai pekin hih thawhkikna thu na kigen khin hi. Hih lai ah Job in ama’ thawhkik nading a lam-et bak hi lo-in amah a Tanpa a nuntakna leh ni khat ni ciangin leitunga a din nading thu na gen hi. Mi khempeuh sihna pan kithokiksak ding cih thu John 5:28-29 leh Kilaakna 20:4-6, 12-13 te ah kimu thei hi.
Thuciam Lui sungah mihing pumpi mahmah a kithawhkiksak nading lam-etna a kigenna mun kician mahmah pawlkhat om hi (Job 14:13-15; Late 16:9-10; 17:15; 49:15; Isa. 26:19; Dan. 12:2; Hos. 13:14; Heb. 11:17-19). Khazih’ thawhkik nading thu Late 16:9-10 ah kician takin kigenkhol-a, Late laphuakpa David in, “Tua hangin ka lungsim kipaka, ka leii a nuam hi; ka pumpi zong lungmuangin a tawlnga hi. Bang hang hiam cih leh sheol ah nong nusia kei dinga, nangma Siangtho Pa zong na muatsak kei ding hi” ci-in na gen hi. Hih lai ah David in ama’ thawhkik nading a lam-et bek hi lo-in “Siangtho Pa” ci-a kigen Zeisu Khazih’ luang mahmah zong han sungah muat man lo a a thawhkik nading a lam-etna na gen hi. Hih mun ah Peter in Sawltakte’ Tangthu 2:24-31 leh Paul in Sawltakte’ Tangthu 13:34-37 ah na genkik a, Zeisu Khazih’ thawhkikna thu kigenna ahihna na pulaak uh hi.
Late 22:22 ah zong Zeisu Khazih’ thawhkikna mah na kigena, Khazih in a sih nungin a “sanggamte” tungah A min pulaak ding hi, na ci hi. Late 118:22-14 a kigen innkiu suang a suak Khazih’ thu Sawltakte’ Tangthu 4:10-11 ah A thawhkikna a hihna na hilhcian hi. Zeisu Khazih’ lim mah ahi Melchizedek’ siampi hihna ah Khazih’ thawhkikna na kilam-en khol hi (Piancil. 14:18; Heb. 7:15-17, 23-25). Tua mahbangin lim mah ahi vasa nihte’ laka kikhakkhia vasa (Siampi. 14:4-7), thawhkikna ah Khazih a gah masapen ahihna a lak gan masa pawi (Siampi. 23:10-11), leh thawhkikna thu mah a hilh Aaron’ ciangkhut sel (Gamlak. 17:8) te ah zong thawhkikna thu mah kimu thei hi. Hih bangin mi khempeuh a thawhkik nading thu leh Khazih’ thawhkik nading thu Thuciam Lui sungah kiptakin kigen hi.
B. Ama’ Thawhkik Nading Thu
Khazih Mahmah In A Genna
Lungdamna thubute ah, Khazih mahmah in a sih nading thu leh a thawhkik nading thute na genkhol den hi (Matt.16:21; 17:23; 20:17-19; 26:12,28-29,31-32; Mk. 9:30-32; 14:28; Lk. 9:22; 18:31-34; John 2:19-22; 10:17-18). Hih banga a genkholhnate i et ciangin gen mun mahmah a, kician mahmah-in, mun tuamtuam leh hun tuamtuama a gen ahih manin Khazih in Ama’ sih nading leh a thawhkik nading a genna ahih lam telkhialh nading om lo a, a gen bang liana tangtunnate in hih genkholhnate a maanna kipsak lai hi.
C. Khazih A Thawhkik Takakna
Thuciam Thak sungah Khazih a thawhkik taktakna thu a kigenna kicing mahmah hi. Khazih a thawhkik khit ciangin a tawmpenin sawm leh sagin vei bang kilang hi. Tuate hih bang ahi hi: (1) Mary Magdelene’ tunga a kilatna ( John 20:11-17; Mk. 16:9-11 tawh enkaak in); (2) numeite’ tunga a kilatna (Matt. 28:9-10); (3) Peter’ tunga a kilatna (Lk. 24:34; I Cor. 15:5); (4) Emmaus lampi-a a nungzuite’ tunga a kilatna (Mk. 16:12-13; Lk. 24:13-35); (5) Thomas kihel lo nungzuite’ tunga a kilatna (Mk. 16:14; Lk. 24:36:43; John 20:19-24); (6) A thawhkik khit zawh nipikal khat khit cianga nungzuite’ tunga a kilatna (John 20:26-29); (7) Galilee Bual Tuilii gei-a nungzui sagihte’ tunga a kilatna (John 21:1-23); (8) Mi za ngate’ tunga a kilatna (I Cor. 15:6); (9) Topa’ naupa James’ tunga a kilatna (I Cor. 15:7); (10) Galilee gam mualtunga nungzuite’ tunga a kilatna (Matt. 28:16-20; I Cor. 15:7); (11) Olives Mualvmpan vantung a kah tungtanga a hungzuite’ tunga a kilatna (Lk. 24:44-53; Sawltak. 1:3-9); (12) Stephen a kithah madeuh a Stephen’ tungah a thokik Khazih a kilatna (Sawltak. 7:55-56); (13) Damascus lampi tunga Paul’ tunga a kilatna (Sawltak. 9:3-6; Sawltak 22:6-11; 26:13-18; I Cor. 15:8 te tawh enkaak in); (14) Arabia a Paul’ tunga a kilatna (Sawltak. 20:24; 26:17; Gal. 1:12,17); (15) Biakinnpi sunga Paul’ tunga a kilatna (Sawltak. 22:17-21; 9:26-30; Gal. 1:18 tawh enkaak in); (16) Caesarea ah Paul a thongkiatna a a kilatna (Sawltak. 23:11); (17) Sawltak John’ tunga a kilatna (Kilaakna 1:12-20). Hih bangin tamveipi a kilatna, a mun leh a hun kilamdang tuamtuama a kilatna leh hih bangin kilang taktak hi cih a kilatnate in sihna pan Khazih thokik taktak hi, cih a kipsak thute ahi hi.
Hih banga a kilat kawikawinate in a thawhkik taktakna a kipasak banah, hih thu a dinpih ding thu tampi kigen thei lai ding hi. A thawhkik khit ciangin a han hawm hi (Matt. 28:6; Mk. 16:6; Lk. 24:3,6,12; John 20:2,5-8). Khazih tho kik hi ci-a teci pangte a kikhem ziauziau zo ding mite a hih lohna uh kilang hi. Khazin thokik taktak hi cih a theih khit nangawn vua a um ngam nai lote hi zawsop uh hi (John 20:9,11-15,25). Khazih thokik taktak hi cih lungsim kizo-a a up khit uh ciangin bel, Khazih a upna uh a sihpih nuamte hi pah uh hi. Thawhkik khit ciangin nungzuite nakpi-in kikhel uh cih zong kitel mahmah hi. A dahna uh lungdamna leh upna-in kikhel lian hi.
Tua banah, thawhkik khat cianga nungzuite sunga Khasiangtho vangliatna, a tangko uh lungdamna thu vangliatna, leh a thuhilhna uh a kipsak nalamdangte Sawltakte’ Tangthu in teci pang hi. Pentecost ni mahmah zong Khazih thokik cih thu a um nai lo-a tanghtu kiphuaktawm banga a ngaihsun mi tul thumte in Khazih thokik taktak hi, cih a up ni uh ahih manin a thupi mahmah teci khat ahi hi.
Pawlpi masate nipikal ni masa ni-in Topa’ Nitak-an ne khawmin sumpite khia a a kikhopna mahmah uh zong tangthu ah a kinial thei lo teci khat mah ahi hi (Sawltak. 20:7; ICor. 16:2). Bawlsiatna nasia takin thuakin sawltakpite in a sih san hanga pawlpi a om teiiteiina mahmah zong Khazih sihna pan a thawhkikna thu hang bek mah hi, cih ding sim loh ngawh theih ding thu dang om lo hi. Vantunga a nasep tawh kituak dingin Khazih’ thawhkikna pen pumpi tawh a hibang liana thawhkikna ahi hi.
D. Khazih Bang Hangin Thokik
Khazih bang hangin thokik hiam cih thu tawh kisai in thu sagih peuhmah kigen thei ding hi:
1. Khazih pen Amah Khazih a hihna tawh kizui-a thokik ahi hi(Sawltak. 2:24).
2. Pasian in David tawh a bawl thuciamna a tangtun nadinga Khazih thokik hi (II Sam. 7:12-16; Late 89:20-37; Isa. 9:6-7; Lk. 1:31-33; Sawltak. 2:25-31).
3. Thawhkikna nuntakna a pia dingin Khazih thokik hi (John 10:10-11; 11:25-26; Eph. 2:6; col. 3:1-4; I John 5:11-12).
4. Thawhkikna vangliatna naak a suah nadingin Khazih thokik hi (Matt. 28:18; Eph. 1:19-21; Phil.4:13).
5. Pawlpi lutang a suah nadingin Khazih thokik hi (Eph. 1:20-23).
6. Eite’ diktansakna kizo khin ahih manin Khazih thokik hi (Rom. 4:25).
7. Thawhkikna ah gah masapen ahih nadingin Khazih thokik hi (I Cor. 15:20-23).
E. Khazih’ Thawhkikna A Thupina
Khazih’ thawhkikna pen tangthu-a a pianzia zui-in Khazih Pasian a hih taktakna a kilatna ahi hi. Mawhna leh sihna tunga gualzawhna lianpi ahih manin, Ephesians 1:19-21 a a gen mahbangin tu mahmah a Pasian’ vangliatna omzia hi pah hi. Thawhkikna pen upna thu ah thupi lua ahih manin hih hehpihna hun sungin Israel mite’ adinga kiseh nipikal sunga ni sagih ni Sabbath khengin Zeisu Khazih thawhkikna a kiphawk den nadingin nipikal sunga ni masapen ni kituamseh hi. Tua ahih manin, Paul in I Corinthians 15:17 a, “Khazih thokik lo hi leh, note’ upna a mawkna hi a; note na mawhna sung vuah na om lai ding uh hi” a cih mahbangin thawhkikna pen Christian upna ah innkiu suang bang ahi hi. Khazih thokik ahih manin i Christian upna mahmah khamuan huai-a, a tawpna donga Khazih gualzawh nading kicianin, i Chritian upna mahmah zong a uptaak taktak ahihna kilang hi.
Dotna
1. A si mi peuhmah thokik ding ci-in Laisiangtho in hong hilh hiam?
2. Mihing pumpi thawhkikna tawh kisai Thuciam Lui in hong hilhnate a tomkimin gen in.
3. Zeisu Khazih’ thawhkikna ding tawh kisai Thuciam Lui in bang ciangtan lam-enkhol ahi hiam?
4. Khazih in Ama’ thawhkik nading thu bang ciangtan genkhol ahi hiam?
5. Khazih a thawhkik leh vantunga a kah kikal bangzah vei kilang ahi hiam?
6. Khazih vantungah a kah khit bangci bangin kilang ahi hiam?
7. Bang hangin Khazih a kilat kawikawinate leh a mun leh a hun tuamtuam-a a kilatnate in Khazih thokik taktak hi cih tecite hi thei ahi hiam?
8. Bang hangin a han a hawmna, teci pangte mihing pianzia leh lungsim kizo-a a upnate uh Khazih thokik taktak hi cih teci ahi hiam?
9. Thawhkik khit ciangin nungzuite’ nuntakna bangci bangin kikhela, tuate thawhkikna teci dingin bangci bangin kimang thei ding ahi hiam?
10. Pentecost ni-in bang thawhkikna teci kimu thei ahi hiam?
11. Pawlpi masate nipikal sunga ni masa ni-a a kikhopna uh leh bawlsiatna a thuak uh hanga pawlpi a om teiiteiinate in Khazih thokik taktak hi, cih thu bangci bangin dinpih ahi hiam?
12. Bang hangin Khazih sihna panin thikik cih thu sagih peuhmah gen in.
13. Bang hangin Khazih’ thawhkikna i Christian upna ah thupi ahi hiam?
14. Khazih’ thawhkikna leh tuhun-a Pasian’ vangliatnateomziate bangci bangin kizom ahi hiam?
11
Tapa Pasian: Vantung Ah A Kahna Leh
Siampi Nasep A Sepna
(God the Son: His Ascension and Priestly Ministry)
A. Khazih Vantung Ah A Kahna
Khazih a kipahtawina ah thawhkikna pen a kal masa ahih manin, vantunga Khazih a kahtohna pen a kal nihna hi, ci-in kingaihsun thei ding hi. Mark 16:16:19; Luke 24:50-51; leh Sawltaktakte’ Tangthu 1:9-11 sungah kiciamteh hi.
Zeisu Khazih vantung ah a kah taktak ma-in vantungah a kah hiam cih dotna kidong thei den gige hi. John 20:17 sung Mary Magdelene’ tunga i Topa in, “Ka Pa, na Pa uh, Ka Pasian, na Pasian uh kiangah ka ciah ding hi” a cih kammalte sinsaka kigen thei den thu ahi hi. Thuciam Lui hun lai-a siampipa in biakna a piak khit cianga siangtho mun-a sisan a paipihna lim zong kila den pian hi (Heb. 9:12-23-24). Laisiangtho hilhcian siate khat leh khat a ngaihsutna uh a kituah kim loh uh hangin, evangelical a tamzaw in bel “Ka kah ding hi” cih kammalte mai lam hun genna bangin ngaihsun zaw uh hi. Hebrews sunga Khazih a sisan tawh siangtho mun-a lut cih thu leuleu pen, “A sisan tungtawnin,” cih lama tei zawk ding ahi hi. Ci leh sa-a sisan bel vantung peuh-a kikeng thei hi lo a, singlamteh tung bek mah a baang ahi hi. A kimansiang khin tua nasep hanga hamphatnate bel tuni dongin thu ummite’ ading ahi hi (I John 1:7).
Hih thute banah, Sawltakte’ Tangthu 1 sunga Khazih vantunga a kahna pen a pumpi mahmah-a kah ahi hiam? cih dotna khat om leuleu hi. Leitung hong pai lai-in naubu sungah kipaii a naungek mah a hong suah bang lian mah-in a pumpi mah a kahto ahihna a Laisiangtho mahmah i sim ciangin kitel mahmah hi. Sawltakte’ Tangthu 1 sungah hih vantunga kahtohna tawh kisai a kigenna ah Greek kammal li kizang hi: “Amah kila to hi” ( taang 9); “a muhna panun meii in liah hi” (taang 9); “Amah pai to hi” (taang 10); “Amah note’ kiang pan vantung ah kila hi” (taang 11). Hih kammal li te thupi mahmah hi, bang hang hiam cih leh, taang 11 ah, Ama’ hong pai kik nading zong tua mah bang hi ding hi, ci a, a vankahna leh hong paikikna dingte damdam-in mit-a muh theih, pumpi mahmah a meii tawh kipawl ahihna kimu thei hi (Sawltak. 1:9-11). Hih hong pai kik nading bel a kumpi gam phut dinga hong pai kiknading hi lo zaw-in a pawlpi la to dinga hong pai nading rapture a genna hi zaw hi.
B. Khazih Vantung Tung Taktak Cih A Kilatna
Zeisu Khazih leitung pan vantung ah a kahtohna a kilatna kicing mahmah khin hi ta leh, vantung tung khin taktak a hihna tamveipi a kigennate in vantung ah a kah tohna a kilatna ahi hi. Laisiangtho mun tampi ah Khazih vantung ah a kimuhna thu kigen hi (Sawltak. 2:33-36; 3:21; 7:55-56; 9:3-6; 22:6-8; 26:13-15; Rom. 8:34; Eph. 1:20-22; 4:8-10; Phil. 2:6-11; 3:20; I Thess. 1:10; 4:6; I Tim. 3:16; Heb. 1:3,13; 2:7; 4:14; 6:20; 7:26; 8:1; 9:24; 10:12-13; 12:2; I John 2:1; Kilaakna 1:7,13-18; 5:5-12; 6:9-17; 7:9-17; 14:1-5; 19:11-16).
C. Vantunga A Kahna a Khiatna
Vantungah Zeisu Khazih a kahna pen leitunga a nasepna a beina ahi hi. Khazih hong pai a, Bethlehem ah suakin, tu-in a Pa’ kaingah ciahkik hi. A thawhkik khit nangawna a kiselcip lai a minthanna ah a ciahkikna ahi hi. Vantung ah a lutna open gualzawhna lianpi hi a, leitunga a nasep zosiang taktak cih a kilatna hi-in, a Pa’ ziat lama a nasep thak ah a lutna ahi hi.
Vantunga Khazih’ dinmun pen a tawpna a a gualzawhna leh hong pai kik nading a ngak kawma vantung leitung khempeuh te’ Topa a hihna hi a, Pa’ ziat lama om bangin kigen den hi (Late 110:1; Matt. 22:44; Mk. 12:36; 16:19; Lk. 20:42-43; 22:69; Rom. 8:34; Eph. 1:20; Col. 3:1; Heb. 1:3-13; 8:1; 10:12; 12:2; I Pet. 3:22). Vantunga Khazih in a luah tokhom mahmah zong a Pa’ tokhom hi a, ni khat ni cianga leitunga a luah ding David’ tokhom tawh telkhialh ding hi lo hi. Ama’ khe ngakna a suak dingin leitung in ngak gige a, leitung mahmah ah a tokhom kiphut ding hi (Matt. 25:31). Tu laitaka a dinmun bel pawlpi lutang ahihna tawh kituakin pahtawina leh thuneihna mun ahi hi.
D. Tu Laitaka Vantunga Khazih’ Nasep
A Pa’ ziat lama a dinmun ah Khazih in pawlpi tawh kizoma a hihna sagihte kicingsakin sem hi: (1) Adam nunung leh piansak thak’ lutang; (2) Khazih pumpi’ lutang; (3) A mite ading Tuucing Lian; (4) A hiangte tawh a kizopna ah Leenggui taktak; (5) Suang tawh kilam pawlpi tawh kizopna ah Innkiu Suang; (6) Kumpi nam siampi ahi pawlpi tawh kizopna ah Siampi Lian; (7) Mo ahi pawlpi tawh kizopna ah Mopipa. Hih gentehna nam sagihte in tu laitaka Khazih’ nasepte laka, khiatna nei mahmah ahi hi. A nasep khempeuh lakah a thupipen bel Pasian’ tokhom mai ah pawlpi’ tangin dinga Siampi Lian a sepna ahi hi.
Siampi Lian a sepna ah thupi kilangkhia hi.
1. Tunglam-a biakbuk ah Siampi Lian ahihna tawh, leitunga a mite’ ading Siampi sem dingin Zeisu Khazih ngiat vantung ah lut khin hi. (Heb. 8:1-2). Vantung ah a kahtoh cianga a Pa in a sanna pen leitunga a nasep a Pa in a sanna a kilatna ahi hi. A tutsukna in leitung ading a nasep kizosiang taktak, cih hong lak hi.
Ama’ tokhom ah tu lo-a a Pa’ tokhom ah a tutna in leitunga hong pai masak lai-in kumpi gam phut lo a, ni khat ni cianga leitung ah kumpi gam kiphut-in vantung ah Pasian’ deihna a kicin mahbangin leitunga a kicin ding hun ngakin om hi, cih Laisiangtho sunga kigen tansuak den thumaan thuthak hong lak hi. “Hih leitung kumpi gamte eite’ Topa leh Ama’ Khazih’ kumpi gam suaka a tawntung pana tawntung dongin maang ding hi” (Kilaakna 11:15); Kumpipa Tapa in a Pa’ kiangah ngen dinga lawkite Ama’ luah dingin kipia dinga leitung mong dong Ama’ a neih dingin kipia ding hi (Late 2:8).
Ahi zongin leitung ah tua kumpi gam tu-in phut nai lo a (Matt. 25:31-46), Jew leh Gentile-te’ lak panin Ama’ pumpi leh mo banga kizom vantung tawh kipawl mi pawlkhat kaikhawm hi, ci-in Laisiangtho in teltakin hong hilh hi. Tu laitaka a nasep a zawh ciangin hong pai kik dinga, “a puksa David’ puanbuk hong lam kik ding hi” (Sawltak. 15:16; taang 13-18 tawh enkaak in). Melchizedek’ pianzia zui-in Kumpi-Siampi ahih hangin (Heb. 5:10; 7:1), tu laitakin Siampi sem beka Kumpi sem lo hi. Ni khat ni ciangin hong pai kika Kumpite’ Kumpi a hi ding Khazih pen tu laitakin, “A pumpi ahi pawlpi tungah na khempeuh-a lutang” a suak dingin vantungah kahto hi (Eph. 1:22-23).
2. Eite’ Siampi Lian ahihna tawh Khazih pen Khasianghto letsongte hong pia Pa ahi hi. Thuciam Thak hong hilhna ah, Khasiangtho letsong i cih pen thu ummi khat sung leh tua thu ummi tungtawna a sunga a tenden Khasiangtho in a piak Pasian’ vangliatna tawh nasep theihna ahi hi. Pasian’ deihna a tangtun nadinga sem Khasiangtho hi a, a tendenna mite tua banga zang ahi hi. Mihingte’nasep khat Khasiangtho in panpih cih bang hi lo hi.
Laisiangtho sungah letsong pawlkhat a huampi-in a kigen hangin (Rom. 12:3-8; I Cor. 12:4-11), mihing khat leh khat i nuntak zia kibang lian cih om lo ahih manin letsong khat leh khat kibang lian cih om ngei lo hi. Ahi zongin thu ummi khat tungah letsong pawlkhat kipia hi; ahih hangin tua letsong nangawn a ngahte in a nuntakna Pasian’ tungah a ki-ap ciang bekin kilang pan ding hi (Rom. 12:1-2,6-8 tawh enkaak in). Khasiangtho tawh a kideim mi khat Pasian’ minthan nadingin nasem dinga hanthot kul lo ding hi; bang hang hiam cih leh tua mi in Pasian’ lungkimna a sep nadinga a utsak leh a semsak pen Khasiangtho ahi hi (Phil. 2:13).
Tua bang lian mah-in “mite’ tunga a piak letsong” a kici mi pawlkhat zong vantunga a kahto Khazih in nasep theihna pia-in a deihna mun ah koih hi (Eph. 4:7-11). Mihingte’ khensatna kician lo leh cingtaak lo peuh muangin koih mawkmawk lo hi (I Cor. 12:11,18).
3. Vantunga a kahto Khazih in Siampi ahihna tawh nungta tawntunga A mite’ adingin thuumsak den hi. Hih nasep bel leitung a nusiat ma-a a patsa hi-in (John 17:1-26), a piangthak lote’ ading sangin a piangthakte’ ading hi zaw a (John 17:9), a mite leitung ah a om laiteng vantunga kizomsuak ding nasep ahi hi. Hih banga a mite’ adinga a thuumsakna pen a thanem, a cimawh, a picing nai lo leitunga a misiangte’ ading hi a, tua mite mawhsak nading thu bel hi peuhmah lo hi. A mite’ kicin lohna a thei, a mite’ kidopih den dawimangpa’ vangliatna leh galkuan ziate a thei Pa pen tua mite’ adingin a kha uh tuu cin-a cing Pa leh a kem Pa ahi hi. Peter a kepna mahmah zong hih bang a nasepna a kimuh theihna khat ahi hi (Lk.22:31-32).
Siampi ahihna tawh a mite’ adinga Khazih in a thuumsak denna pen muibun mahmah bek lo-in bei hun tawp hun nei lo hi. Tanglai-a siampite a sih theihna uh hangin a nasepna uh tangtun lo uh hi; ahih hangin Khazih a hih leh a nuntak tawntung manin a kikhel ngei lo siampi nasep a nei ahi hi. “Tua ahih manin ama’ tungtawna Pasian kianga paite khempeuh a tawp dongin (bei hun nei lo) honkhia zo hi; bang hang hiam cih leh amaute’ tanga a thumsak nadingin a nungta tawntung hi” (Heb. 7:26). Tua banga Pasian in tuu cin-a hong cinna leh a tawntunga a lungmuanhuainate David in na thei mahmah hi (Late 23:1).
4. Ama’ mite’ adingin Pasian’ mai ah tu-in Khazih om den hi. Pasian tate amaute’ tanga a thumsak Khazih leh Khazin sihna in a zawhsa nasep om kei peuhmah leh Pasian tawh a kikhensak thei ding mawhna taktak a bawl kha zelte vive ahi hi. Christian khat in mawhna a bawl khak ciangin Pasian tawh a kikholhna taan-a, a lungnopna, a lungsim daihna, leh a vangliatnate taan hi. A lang khat leuleu ah, tua thu ummi in a mawhnate a pulaakna tungtawnin a kiciangtan lo Pasian’ hehpihna hangin tua hamphatnate kipia kik hi ( I John 1:9); ka mawhna hong kimaisak tah ci lo zaw a Pasian’ sianthona tawh kizomin Christiante’ mawhnate i ngaihsun den ding kisam hi.
Khazih in tu mahmah-in vantungah siampi sema hong thumsakna tungtawnin a Pa’ tanote in mawhna a bawl khak phial uh hangin bitna leh lungmuanna kicing om veve hi. Sitni i cihte in thukhen zum ah mi dangte’ adingin dinsakin thumsak hi. Khazih zong Sitni ahihna tawh a mite in mawhna a bawl khak uh ciangin (I John 2:1) amau’ ading vantung ah om den hi (Heb. 9:24).Tua banga a thumsakna pen Pa’tung hi a, sanggamte sun tawh zan tawh Pasian’ mai-a a mawhsak niloh dingin dawimangpa zong tua lai ah om hi (Kilaakna 12:10). Thu ummite’ muhna ah tua mawhnate a thupi khol lo tawh a kibat hangin a siangtho Pasian in mawhna kici peuhmah neu ngaihsut ngei lo hi. Leitung ah bel a kisimbawl mawhna hi kha ding hi; ahi zongin vantung ah a kitheitaang mawhna ahi hi. A hehpiha lian lua mahmah tawh mihingte’ tung pan bangmah hong kal ngei lo-in, eite’ Sini Pa in Pasian’ tate’ adingin hong thumsak den hi. Tua banga thu ummite’ bit nading a sepna ah “a thutang Zeisu Khazih” ci-a a kilawhna tawh kizom ciangtan nei lo
ama’ thutanna tawh kituak mahmah hi. A sihna tungtawnin eite’ mawhna kithoihna suak ahih manin satan ahih kei leh mite in a mawhsakna leh mawhna hanga thukhenna kici khempeuh panin Pa in a tate a kepna dingin Zeisu Khazih in Ama’ sisan mahmah paulam-in hong thumsak den hi (I John 2:2).
Zeisu Khazih in vantungah siampina a sepna hangin thu um mite in mawhna bawl thei cih bang hi zenzen lo hi. Tua sangsik-in, eite i mawh loh nadingin hih thute hong kigelh hi zaw hi (I John 2:1); bang hang hiam cih leh mawhna a bawlna hangin a Sitnipa in a thumsak ngitnget loh phamawh cih thu a ngaihsun mi peuhmah a ut bangin mawhna gamta lo ding hi. Zeisu Khazih Thumsakpa leh Sitnipa banga siampina a sepna pen hotkhiatna ngah mite a tawntunga bit taka a kikepna thu ahi hi (Rom. 8:34).
E. Leitung Ah Tu Laitaka A Nasep
A pumpi-in vantunga Pasian’ ziat lamah a om hangin Zeisu Khazih in leitunga a pawlpi sungah nasem veve hi. Laisiangtho mun tampite ah Khazih in a pawlpi a tendenna leh a pawlpi a ompihna kigen hi (Matt. 28:18-20; John 14:18-20; Col. 1:27). A pawlpi nuntak tawntungna a pia Pa ahihna tawh a pawlpi sungah teng hi (John 1:4; 10:10; 11:25; 14:6; Col. 3:4; I John 5:12). Pawlpi sunga a nasepnate banah, thu ummite’ nuntakna-a nasem dingin Ama’ Khasiangtho hong sawla, tua mahbangin Pa in zong tu khanghun-in thu ummite tenden hi (John 14:23).
Tu laitaka Khazih’ nasepna pen Khazih pumpi a piangsak ding mi pawlkhat samkhia-a leitung mong donga Khazih ading teci a pang ding tua mite vanliatna pia-in a siangthosak tuhun-a Pasian’ nasepna i tel theihna ding a bulpi ahi hi. Tuhun-a Khazih’ nasepna pen hong pai kik nading tawh kizom thupiang dingte a kipatna zong ahi hi.
Dotna
1. Khazih vantunga a kahtohna leh a kimingthannsakna bangci bangin kizom ahi hiam?
2. A thawhkik ni-in Khazih vantung ah a kahtoh hiam cih thu a cingin gen in.
3. Sawltakte’ Tangthu 1 sunga Khazih vantunga a kahtohna pen a kahto takpi ahihna bangci bangin kilang ahi hiam?
4. Vantung ah a kahtoh khit ciangin Khazih vantung tung taktak cih Laisiangtho in bang ciangin teci pang ahi hiam?
5. Khazih vantunga a kahtohna leh leitunga a nasep bangci bangin kizom ahi hiam?
6. Khazih vantunga a kahtohna pen bangci lam-in gualzawhna kici ahi hiam?
7. Vantunga Khazih’ tokhom leh David’ tokhomte a kilamdanna gen in.
8. Khazih leh A pawlpi a kizopna a lak gentehna kammak sagihte gen in.
9. Tu mahmah-in Khazih A Pa’ ziat lama a tutna bang hangin thupi mahmah hiam cih gen in.
10. Khazih eite’ Siampi Lian ahihna leh Khasiangtho letsongte a hawmna bangci bangin kizom ahi hiam?
11. Siampi a hihna tawh Khazih in a mite’ ading a thuumsakna leh Thuciam Lui hun lai-a siampite’ nasep a kilamdanna gen in.
12. Vantunga eite’ Sitnipa ahihna tawh Khazih’ nasepna gencian in.
13. Tu laitak-in Khazih in leitungah bang ciangin na sem ahi hiam?
12
Tapa Pasian: A Misiangthote’ Ading Hong Pai Kikna
(God the Son: His Coming for His Saints)
A. A Tangtung Nai Lo Genkholhna
Hih lai-a i gen ding thugil bel a tangtung nai lo genkholhnate’ laka a thupipen khat ahi hi. Genkholhna i cih peuhmah Pasian’ gelhkholh tangthu hi a, Laisiangtho mun dangte teekteekin uptaak hi. Laisiangtho sunga thute lakah seh li suah seh khat bang a kigelh hun lai-in genkholhna hi lai hi. Tampi tak tangtung khina, a tangtunna mun khempeuh i et ciangin a kigenkhol bang teekteeka a tangtunna kimu thei hi. Khazih’ suah nading thu bangte, kum za tampi lai-a a kigenkhol bangin, hong pai taktak ciangin, Judah nam sung pan hong piang takpi-in, Abraham’ tapa, David’ tapa, Bethlehem khua-a nungak siangtho sung pana suak hong hi takpi hi. Tua mahbangin, kum tul val lai-a Late 22 sunga a sih nading thute a kigenkhol bang teekteekin tangtung hi.
Pasian’ Kammal sung ah tu laitaka tangtung nai lo genkholhna tampi om lai a, tuate mahmah zong tuhun ciang donga i muh theih a muanhuaina tawh kizui-in tangtung taktak ding hi, ci-a up ding kilawm-a, Pasian mahmah a kilawm banga pawhtawina zong ahi hi.
Vantunga a kahtoh bangin Khazih hong pai kik ding cih thu – “hih Zeisu mah” a thawhkikna pumpi mah tawh mei tung tuangin hong pai kik ding cih thu (Sawltak. 1:11) – Laisiangtho in nakpi-in hong hilh ahih manin Christian pawlpi tangthu a upna pulaaknate ah zong kihel kim hi. Ahi zongin hih Khazih hong pai kik nading thugul pen limtaka sin phat mahmah ding kisam hi,
Khazih hong pai kik nading thu tawh kizomin genkholhna thu i ngaihsut ciangin, Laisiangtho siam tampite in rapture (vantunga misiangthote kilak tohna) gen nopna ahi a pawlpi adinga Khazih hong pai kikna leh kum tul khat mang dingin a Kumpi gam phut dinga a misiangthote tawh hong pai kiknate (hih leitung ciang dong mahmah hong paikikna) na khentel sinsen uh hi. Hih banga hong pai kik nading nihte kikal hun sungin leitung bup pawlpi a piankhiat nading ahi a leitung khempeuh a uk kumpi leh kumpi gam a pian nading ahi zongin, Khazih in a gam phut dinga hong pai laitaka piang ding gal kidona lianpi cihte ahi zongin thu piang ding tampi kigenkhol hi. Hih genkholhnate ahi banga i khiat nak leh hih thu piang ding tampite’ lakah a pawlpi adinga Khazih hong pai kikna pen a masapen hong hi ding hi.
Rapture khit hun nunung cianga piang ding thu tampi Thuciam Lui leh Thucaim Thak sungah genkholhna tampi a om hangin a pawlpi adinga Khazih hong pai nading thu pen Thuciam Lui sungah kigen peuhmah lo a, Thuciam Thak kilaakna ahi hi.
B. Rapture Thu Kigenkholhnate
Hun nununga thute a tangtun ma-in a misiangthote’ adingin Khazih hong pai kik ding cih thu Khazih a kikhailup ma a zan nitakin inndei tungnungah a nungzuite’ tungah na kilaak hi. John 14:2-3 sunga i muh bangin, Khazih in a nungzuite’ tungah, “Ka pa’ inn sungah inndei tampi a om hi: om lo hi leh kong gen khin ding hi. Note’ omna ding bawlkhol dingin ka va pai ding hi. Note’ om nading bawlkhol dingin ka va pai leh, hong pai kikin kei’ kianga om dingin kong la ding hi; keima’ omna ah a om dingin kong la ding hi” ci-in na gen hi.
Hih genkholhna a za dingin a nungzuite kigingkhol het lo uh hi. A kumpi gam phut idngin minthanna tawh Khazih hong pai naidng thu Matthew 24:26-31 ah kihillh khin hi. Tua hun ciang dong peuhmah amaute leitung pan vantungah la to-in hun nununga piang ding gimna pan amaute kihemkhia ding cih thu peuhmah thei kha nai het lo uh hi. John 14 sunga Pa’ inn a cih bel Khazih in amaute nusia a a om nading vua a bawlkholh ding vantung ahihna kitel mahmah hi. Tua mun a bawlkholh khit ciangin amaute a la dingin hong pai kik taktak ding ci-in kamciam hi. A gen nopna bel, hih leitung pan amaute lakhia-in vantunga a Pa’ inn ah ciahpih ding cihna ahi hi. Hih banga Khazih in thumong a lep pen Sawltak Paul in a cingin hong genbeh hi.
Misiangthote’ thawhkikna leh hih leitunga nungta lai misiangthote’ thu leh hih leitunga nungta lai misiangthote’ thu tawh kisai Thessalonians-te’ dotna a dawnna ah Paul in hih thu a cingin na gen hi (I Thess. 4:13-18). Taang 16,17 ah, “Topa mahmah vantung panin a ngaih mahmah kikona tawh vantungmi mangpa’ aw leh Pasian’ peengkul tumna tawh hong kumsuk dinga, tua ciangin Khazih sunga misite hong tho masa ding hi. Tua khit ciangin a nungta lai-a om eite Topa dawn dingin huih lakah amaute tawh meii lakah hong kilato khawm ding hi. Tua ciangin Topa tawh i om khawm tawntung ding hi” ci-in hong hilh hi.
A misiangthote’ adinga Khazih hong paina pen vantunga a tokhom nusia a lei tung meii laka hong tuahsukna tawh kipan ding hi. Amah kiko ding hi – a cih nopna taktak, “thupiakna kikona.” Tua Topa’ kikona pen vantungmi mangpa Michael’ aw leh Pasian’ peengkul mutna tawh hong kithuah khawm ding hi. Khazih’ thupiakna mangin a si khinsa Christian-te hong tho ding uh hi (John 5:28-29). I Thessalonians 4:14 ah, “Zeisu’ sunga a ihmu mite Pasian in amah tawh hong tonpih ding” ci-a a gen bangin a sisa mite’ khate in vantung pan Khazih hong zui ding uh a a thokik a pumpite uh tawh hong kigawm ding hi. Khazih sunga sisa mite a thawh kik khat ciangin, a nungta lai Christian-te zong Topa dawn dingin huih lakah amaute tawh meii lakah hong kilato khawm ding hi.” Hih bangin pawlpi buppi leitung pan kihemkhia-in, John 14 sungakikamciam ahi vantunga Pa’ inn ah Khazih tawh om khawm cih thu hong tangtung ding hi.
I Corinthians 15:51-58 sungah hih thu mah a cingzaw-in kigen lai hi. Hih lai ah a pawlpi adinga Khazih hong paina thu pen “thuthuk” ci-in kigena, Thuciam Lui-a kipulaak lo, Thuciam Thak sung beka kipulaak thu a cihna ahi hi (Rom. 16:25-26; Col. 1:26). Thuciam Lui sunga kipullak hih leitung mahmah ah a kumpi gam phut dinga Khazih hong pai kik nading thu tawh kibang lo-in rapture thu pen Thuciam Thak sung bekah kigen hi.I Corinthians 15 sungah, “mitphiat kal-in” ci-a kigen mahbangin thakhat thu-a piang ding ahihna Paul in na gena, thawhkikna thokik misite’ pumpite mahmah zong a tek thei nawn lo ding leh a si thei nawn lo dingin muat thei nawn lo dingin kithosak ding hi (I Cor. 15:53).
Eite’ pumpi thakte mawh thei nawn lo ding, ci-in Laisiangtho in hong hilh lai hi (Eph. 5:27; Phil. 3:20-21 tawh enkkak in). Han sunga pumpite leh hih leitung mahmah om lai mihing pumpite peuhmah vantung tawh kituak lo hi. Tua ahih man mah-in Paul in, “eite khempeuh i kikhel ding hi” ci-a a gen ahi hi.
Thawhkikna leh pawlpi kilaktohna rapture tawh kibang lo-in, Pentecost ma-a si misiangthote, ahih kei leh rapture khit cianga site bel Khazih in a kumpi gam phut dinga hong pai kik hun ciang dong thokik lo-in om ding uh hi (Dan. 12:1-2; Kilaakna 20:4). Mawhnei misite leuleu bel Khazih kum tul khat a maan khit hun ciang dong kithosak lo hi (Kilaakna 20:5-6,12-13).
C. A Misiangthote’ Adinga Khazih Hong Paina leh
A Misiangthote Tawh Khazih Hong Painate A Kilamdannate
Hun nunnung bei ma-in rapture om ding hi, cih upna pen pretribulational upna kici a, a misiangthote’ adinga Khazih hong paina leh a misiangthote tawh Khazih hong paina thupiang khat banga sang posttribulational upna tawh a kilamdang vilvel ahi hi. Hih upna nam nih lakah a koizaw maan hiam cih bel genkholhnate bangci bangin a hi bang lianin kikhia zaw hiam cih thu tungah kinga hi. Hih thupiang ding nihte a kilamdanna pawlkhat hih bangin kimu thei hi:
1. Vantunga a Pa’ inn ah a misiangthote la dinga Khazih hong paina ah leitung pan vantunga omna kituahna hi a, a misiangthote tawh hong paina i cih ciangin Khazih Olive Mual ah hong tuaksuka a kumpi gam a phuh ciangin vantung pan leitungah omna kituahna ahi hi.
2. Rapture ah a nungta lai misiangthote kikhel-a, Khazih leitung ciang dong hong paina ah misiangthote’ kikhelna cih bang om lo hi.
3. Rapture ah misiangthote vantungah pai uh a, Khazih leitungah hong pai kik ciangin misiangthote kikhel se lo-in leitung mah ah om uh hi.
4. Rapture ah leitung kikhel lo-in thu zong kikhen lo a, mawhna sung mah ah kizom suaksuak lai a, Khazih leitungah hong pai kik ciangin leitung thu kikhen-in leitungah thumaanna kiphut hi.
5. Rapture i cih hong tung ding thangpaihna ni pana hutkhiatna hi a, Khazih leitungah hong pai kikna bel gimna huna Khazih uma a suakta mite a kihotkhiatna ahi hi.
6. Rapture peuhmah a kigenna khempeuh ah theihkholh loh-a thupiang ding, a pian nop huna piang thei na bangin kigen dena, Khazih leitungah hong pai kikna bel a pian ma-in lim tuamtuam leh thupiang tuamtuam tampi a pian khit cianga piang ding ahi hi.
7. Misiangthote’ kilaktohna rapture pen Thuciam Thak sung beka kipulaak thumaan thutak hi a, a nung a ma ah thupiang tampi tawh kigenkhawm den Khazih leitungah hong pai kikna bel Thuciam Lui leh Thuciam Thak sunga kigen khawm thugil ahi hi.
8. Rapture pen hotkhiatna a ngah mite bek tawh kisai-a, Khazih leitungah hong pai kikna bel hotkhiatna ngahte leh a ngah lo mite tawh zong kisai hi.
9. Rapture ah Satan kihencip lo a, tua hun khit ciangin a ut bangin gamta a, Khazih leitungah hong pai kik ciangin bel Satan kihencip dinga gamtang thei nawn lo ding hi.
10. Thuciam Thak sunga kigen bangin, pawlpi leh tua pawlpi theihkholh loh huna kilaktoh hun kikal ah a tangtung lo genkholhna cih bang om lo a, a kumpi gam phut dinga Khazih leitungah hong pai kik ma-in bel lim tuamtuam tampi tangtung phot ding hi.
11. Thuciam Lui leh Thuciam Thak ah a kumpi gam phut dinga Khazih hong paina tawh kizoma kigen misiangthote’ tawhkik nading thu a kigenna peuhmah ah tua hun mah in a nungta lai misiangthote’ kikhel nading thu peuhmah kigen khawm ngei peuhmah lo hi. Tua sangsikin, kum tul maanna hun sung a gamtat nadingun misiangthote in a leitung pumpi uh a kisam ding hi zawsop hi.
12. Khazih leitungah hong pai kikna tawh kizom thupiang dingte tawh kisai a kigennate ah rapture ading mun om lo hi. Matthew 24:31-46 ah, Khazih leitungah hong pai kik khit cianga thukhenna ah thu-umte leh thu-um lote om khawm lai uh a, Khazih vantung pan leitungah hong pai kikna ah rapture ahi a, hotkhiatna ngah leh ngah lo kikhenna ahi zongin om lo hi, cih kilang hi.
13. Anung ama-a thupiang dingte tawh kumpi gam phut dinga Khazih leitungah hong pai kikna thu i etcian ciangin tua thute leh pawlpi kisai kha lo a, Israel leh Gentile thu-um leh thu-um lote tawh kisai hi bek hi, cih kimu hi. Hih thu Khenpi 13 ah i en lai ding hi.
A pawlpi adinga theihkholh loh-a Khazih hong pai kik naidng thu pen nisima a kinuntakpih thugil ahi hi. I Thessalonians 1:10 ah, “sihna pana a thawhkiksak pa, hong tung ding thangpaihna pana hong suaktasak ding pa Zeisu vantung pan hong pai ding ngaka na omzia uh amaute in hong ko uh hi” ci-in na gen hi. Tua mite’ lam-etna pen gimna sunga suahtakna hi lo a, leitunga kisung ding Pasian’ thangpaihna pana suahtak ding ahi hi. (I Thess. 5:9 leh Kilaakna 6:17 tawh enkaak in). Thuciam Thak sunga kigen mahbangin, rapture pen hong hehnem lam-etna (John 14:1-3; I Thess.4:18), hong siansuah lam-etna (I John 3:3:1-3), leh thupha dim ahih kei leh a lungdamhuai i lam-et gige na (Tit. 2:13) ahi hi. A kumpi gam phut dingin Khazih leitungah hong pai kik matengin leitung mite in Khazih a muh loh ding uh hangin, Christian-te in rapture ciangin a mintanna ah Khazih mu ding uh a, tua pen, “i Honpa leh a lian Pasian, Zeisu Khazih hong kilatna” hi ding hi (Tit. 2:13). Rapture tawh kisai atel akhawk-a kigenna John F. Walvoord’ gelh The Rapture Question (Grand Rapids: Zondervan, 1957) sim beh lai dingin hoih hi.
Dotna
1. Laisiangtho sungah khen bangzah a kigelh hun lai-in genkholhna ahi hiam?
2. Genkholhnate tampi a kigen bang liana a tangtunna bang hangin thupi mahmah ahi hiam?
3. Khazih a misiangthote’ ading hong paina leh Khazih a misianghtote tawh hong paina a kilamdanna bang ahi hiam?
4. Hih thupiang nihte’ kikal ah bangteng piang ding ahi hiam?
5. Bang hunin Khazih in rapture tawh kisai pulaak a, tua kisai bang thu na laak ahi hiam?
6. Rapture tawh kisai a kigen masak hun lai-in bang hangin nungzuite in tel haksa mahmah uh ahi hiam?
7. I Thessalonians 4:13-18 sunga kigen bangin a misiangthote’ adinga Khazih hong pai kik cianga thupiang dingte a banbanin gen in.
8. Bang hangin Khazih in rapture ciangin ama’ sunga sisa mite’khate vantung pan hong tonpih ahi hiam?
9. Bang hangin I Corinthians 15:51-52 sungah a pawlpi adinga Khazih hong pai nading thu pen thuthuk kici se ahi hiam?
10. I Corinthians 15:51-58 sungah rapture tawh kisai bang thuteng kigen beh ahi hiam?
11. A kikhelte leh sihna pana thokikte in bangci bang pumpi ngah ding uh ahi hiam?
12. Rapture ah Thuciam Lui hun lai misiangthote kithosak nai lo ding ahih leh bang hunin kithosak ding ahi hiam?
13. Bang hunin mi gilote kithosak ding ahi hiam?
14. Rapture leh thawhkikna thu tawh kisai Laisiangtho hong hilhna tawh kizui-in mi khempeuh a kithawhsak hun a kibang hi, cih thu bang hangin nial ding i hi hiam?
15. Pawlpi kilaktohna rapture leh a kumpi gam phut dinga Khazih leitunga hong painate a kilamdannate gen in.
16. Tua bangin kilamdang taktak hi cih i theihna tungtawnin, posttribulational rapture maan lo a, pretribulational rapture maanzaw hi, i cih theih na bang hang ahi hiam?
17. Rapture thumaan thutak tawh kizui in nusima i nuntakna ah bangci bangin nuntakpih ding ci-in Laisiangtho in hong hilh ahi hiam?
13
Tapa Pasian: A Misiangthote Tawh Hong Paina
(God the Son: his Coming with His Saints)
Hih thu pen a misiangthote’ adinga Khazih hong paina tawh kitelkhial num mahmah ahih manin, tua thu mah tawh sin khawma a kilamdannate i muh theih lianlian ding thupi hi.
A. Khazih A Nihveina Hong Pai Kik Ma-a Thupiangte
Hun nunung tawh kisai genkholhnate i sin cianga i gen ding thu a om mahbangin, pawlpi kilaktohna rapture leh a kumpi gam phut dinga Khazih a nihveina hong pai kikna kikal hun pen a kician sinsen hun thum-in kikhen thei hi.
1. Rapture khit ciangin tanglai Rome kumpi gam a ding kik gam sawmte’ kipawl nading kiginkholhna hun hong om ding hi. Hih kipawlna panin a masa-in gam thum, a nunglam teh gam sawm a uk ding dictator khat hong khangkhia ding hi.
2. Mediterranean kuamteng ah hih dictator-pa in kilemna hun khat hong piangsak dinga, Israel tawh kum sagih sung kimang dinga a geel uh kilemna thuciam a bawlna uh tawh hong kipan ding hi (Dan. 9:27).
3. A masa kum thum leh a lang a cin ciangin hih dictator-pa in kilemna thuciam hong palsat-in Israel leh Khazih a um mi khempeuh a kibawlsiatna hun hong om ding hi. Tua pa leitung buppi a ukpa a suah hun mah-in, amah a kibiak ding hanciamin leitunga a omsa biakna khempeuh phiatsiang ding hong hanciam dinga, ama’ phalna lo-in van leina van zuakna cih bang a om theih loh nadingin leitung suamzuakna khempeuh hong lencip ding hi. Hih kum thum leh a lang hun pen gimna lianpi hun kici hi (Dan. 12:1; Matt. 24:21; Kilaakna 7:14). Hih hun sungin Pasian in a thukhennate leitung ah sungsuk ding hi (Kilaakna 6:1-18:24 sunga kigente hi). Giimna Lianpi hun pen leitung gal kidona lianpi khat tawh hong bei ding hi (Kilaakna 16:14-16). Hih gal kidona a nasiat mahmah laitakin, a kithat nai lo a misiangthote a honkhia ding, leitung thukhen ding, leh a thumaan a kumpi gam a phut dingin Khazih hong pai kik ding hi. Hih hun tawh kisai a gen Laisiangtho mun tampite i simna tungtawnin,Khazih a nihveina hong pai kik ma-in hih thupiang lianpite piang dinga, hih thute piang nai lo ahih manin Khazih leitungah a nihveina hong pai kikna pen theihkholh loh-a thupiang bangin kigen thei lo ding hi.
B. A Niveina Hong Paina Tawh Kizom Thupite
1. Topa Zeisu Khazih leitung ah (Zech. 14:4), a mimal mahmah-in (Matt. 25:31; Kilaakna 19:11-16), vantunga meii tung tuangin ( Matt. 24:30; Sawltak. 1:11; Kilaakna 1:7) hong pai kik ding hi, ci-in Laisiangtho in hong hilh hi. Laisiangtho hong hilhna khempeuh tawh kizui-in, leitung khempeuh in a muh ding minthanna tawh kidim hong pai kikna hi ding hi (Kilaakna 1:7).
2. Matthew 24:26-29 sunga kikhum Khazih mahmah in a genna ah, ama’ hong pai kik nading pen Nusuahna pana Nitumna donga taang khuaphelep tawh kibang ding hi. Hong pai kik ma, “tua gimna lianpi nite” a kici hunin, vantunga nawngkaii dinga, ni mial-in, kha tang lo dinga, aksite vantung pan pulhkhia-in vanpite mahmah liing ding hi. Kilaakna 6:12-1; 16:1-21 ah a cingzaw-in kigen hi. Khazih’ hong pai kikna pen leitunga mi khempeuh in mu dinga (Matt.24:30; Kilaakna 1:7) “tua ciangin leitunga minam khempeuh kap ding uh hi (Matt. 24:30), bang hang hiam cih leh tua mite’ lakah a tamzaw tham pen thukhenna bek a ngak thu um lote ahi hi.
3. Leitungah a nihveina a hong pai kikna ah, misiangthote leh vantungmite in Khazih’ nung hong zui ding uh hi. Kilaakna 19:11-16 sung ah hih thu a cingin kigen hi. Hih lai-ah John in, “Tua ciangin vantung kihonga om ka mu a, sakol kang leh a tunga tuang pa, Muanhuai leh Thumaan kici pa ka mu hi. Amah in thutangin thu a khena gal a go hi. Ama’ mitte meikuang tawh kibanga, a lutang ah kumpi lukhu tampi a khu hi; tuate’ tungah kuama’ theihpih theih loh amah bek in a theih min kigelh hi. Siasan sunga kidiahsa puantual khat-in kizem-a, ama’ min Pasian’ Thu ahi hi. Vantung galkapte sakol kang tungah tuangin, asiang apaak mahmah saihadial puan hoih silh uh a, amah zui-i kawikawi uh hi. a kam panin minamte a sattuk nading namsau hiam khat hong dawkkhia hi. Amah in amaute sikciang tawh a uk ding hi. A Thanhat-pa Pasian thangpai-a a lungsona lenggah suukna Amah in a tuancil hi. Ama’ puantual tung leh a phei tungah : KUMPITE’ KUMPI, TOTE’ TOPA ci-in min khat kigelh hi” ci-in gen hi.
Hih banga Khazih’ nungzui-a misiangthote leh vantungmi siangthote in a zuih ngiitngeetna i et ciangin a hun mahmah a sawt nading hong lak hi. Hih hun sungin leitung a kipeii ngei-in kipeii dinga leitunga mi khempeuh in mu ding uh hi. Khazih hong pai kikna pen vantung a kahtohna mun mah ahi Olive Mual tunga hong kumsukna tawh kikhum ding hi (Zech. 14:1-4; Sawltak. 1:9-12). A khe in Olive Mual a suk khak phet-in tua mual kitamin Jerusalem pan Jordan Kuam donga kikhung kuamzang khat piang ding hi.
4. Hong pai ciangin, Khazih in gal kidona kuan leitung galkap khempeuh thukhen ding hi (Kilaakna 19:15-21). A kumpi gam a phuh ciangin, Israel-te kaikhawm kik dinga kum tul maanna sungah a lut dingin kilawm kilawm lo cih thu thukhenna nei ding hi (Ezk. 20:34-38). Gentile-te, ahih kei leh “minamte” zong kaikhawm dinga thukhen ding hi (Matt. 25:31-46). Tua ciangin leitungah thumanna leh nopna tawh kidim a kumpi gam hong phut dinga, Satan leh amah langpanna khempeuh thu kikhen ding hi. Hih thu tawh kisai-in a cingzaw mai lamah i gen lai ding hi.
C. Khazih Hong Pai Kikna leh Rapture A Kilamdanna
Hih ma-a i muhsa mahbangin a mite’ adinga Khazih hong paina leh a mite tawh Khazih hong painate a kilamdanna tampi om hi.
Hih thupiang nihte – a mite’ adinga Khazih hong paina leh a mite tawh Khazih hong paina-hih anuai-a bangin kikhen thei ding hi (a toma i lah nadingin a mite’ adinga Khazih hong paina pen a tawh i lak dinga, a mite tawh Khazih hong paina pen b tawh i lak ziau ding hi.
(a) “Eite ama’ kianga i kikaihkhopna”; (b) Eite’ Topa Zeisu Khazih hong paina (I Thess. 2:1).
(a) “Zingsol bangin hong pai” (Kilaakna 2:28; 22:16; II Pet. 1:9); (b) “Thumaanna Ni” bangin hong pai (Mal. 4:2).
(a) “Khazih’ Ni” (I cor. 1:8; II Cor. 1:14; Phil.1:6,10; 2:16); (b) “Topa’ Ni” (II Pet. 3:10).
(a) Theihkholh theih nading lim om lo; (b) hong tun ding hun encik gige-a theih theih ( I Thess. 5:4; Heb. 10:25).
(a) A hun om lo- hun khat peuhpeuh-a piang thei; (b) Genkholhnate tangtung phot ding (II Thess. 2:2,3).
(a) Mawhna tawh kisai genna om lo; (b) mawhna bei-in, Satan thu kikhena, Mawhna Mipa kisusia I II Thess.2:8; Kilaakna 19:20; 20:1-4).
(a) Israel kikhel lo; (b) Israel-te tawh kibawl thuciamna khempeh tangtung ( Jer. 23:5-8; 30:3-11; 31:27-37).
(a) Leitung pan pawlpi kihemkhia; (b) Khazih tawh hong pai khawm (I Thess. 4:17; Jude 14-15; Kilaakna 19:14).
(a) Minamte kikhel lo; (b) thu kikhen (Matt. 25:31-46).
(a) A kipiangsaksa nate kikhel lo; (b) siatna koltaanna pan kisuaktasak (Isa. 35; 65:17-25).
(a) Nidanga a kilaak nai lo “thusim”; (b) Thuciam Lui leh Thuciam Thak ah kimu den (Dan. 7:13-14; Matt.24:27-30; I Cor. 15:51-52).
(a) Lam-etna khempeuh ah Khazih a bulpipen- “Topa hong nai zo hi”; (b) Kumpi gam hong tung ding (Matt. 6:10).
(a) Mopipa, Topa, leh pawlpi Lutang bangin Khazih kilang (Eph. 5:25-27; Tit. 2:13); (b) Kumpi, Messiah, leh Immanuel bangin Israel’ tungah kilang (Isa. 7:14; 9:6-7; 11:1-2).
(a) Leitung in hong paina mu lo; (b) vangliatna leh minthanna lianpi-in hong pai (Matt. 24:27,30; Kilaakna 1:7).
(a) Pahtaakman ngah dingin Christian-te thu kikhen; (b) kumpi gam tawh kisai-in minamte thu kikhen (II Cor. 5:10-11; Matt. 25:31-46).
Laisiangtho mun thupi: (a) John 14:1-3; I Corinthians 15:51-52; I Thessalonians 4:13-18; Philippians 3:20-21; II Corianthians 5:10; (b) Thuhilhkikna 30:1-10; Late 72; Kamsangte khempeuh encian in; Matthew 25:1-46; Sawltakte’ Tangthu 1:11; 15:13-18; II Thessalonians 2:1-12; II Peter 2:1-3:18; Kilaakna 19:11-20:6.
Dotna
1. Pawlpi a kilaktohna rapture khit-a kiginkholh hun bangci bang hiam cih gen in.
2. Kiginkholh hun nunga hong pai ding kilemna hun bangta sawt dinga, bangci bangin hong piang ding ahi hiam?
3. Kilemna hun nunga hong pai ding Israel-te a kibawlsiat hun ah bangteng piang ding ahi hiam?
4. Gimna Lianpi hun cih kammal khiatna lian bang ahi hiam? Bangci bangin hih hun bei ding ahi hiam?
5. Bang hangin tu-in Khazih hong pai-in a kumpi gam hong phut thei lo ding ahi hiam?
6. Khazih a nihveina hong pai kik cianga leitung buppi in a muhzia ding gen in.
7. Khazih a nihveina hong pai kik ciangin leitung leh vantung bangci om ding ahi hiam?
8. Bang hangin Khazih a nihveina hong pai kik ciang minam khempeuh kap ding uh ahi hiam?
9. Khazih a nihveina hong pai kik ciang kuate in zui ding uh ahi hiam?
10. Khazih a nihveina hong pai kik ciang leitung buppi in mu ding a cih bangci bangin piang ding ahi hiam?
11. Khazih a nihveina hong pai kik ciang leitung bang mun ah hong pai dinga, a khe in leitang a sukkhak ciangin bang thu piang ding ahi hiam?
12. Khazih pai kik cianga a thukhen masakna pen bang hi ding hiam?
13. Khazih hong pai kik ciang Israel-te bang cih ding ahi hiam?
14. Khazih hong pai kik ciang Gentile-te bang cih ding ahi hiam?
15. Bang kilamdannte in Rapture leh Khazih a nihveina hong pai kiknate a tuam tuak ahihna hong lak ahi hiam?
16. Rapture leh Khazih a nihveina hong pai kikna thu a gen Laisiangtho mun pawlkhat gen in.
17. Bang hangin Laisiangtho a hi banga khiatna hangin rapture leh a kumpi gam phut dinga Khazih a nihveina hong pai kiknate a kibang hi i cih ding piang thei peuhmah lo ahi hiam?
14
Khasiangtho Pasian: Person A Hihna
(God the Holy Spirit: His Being A Person)
A. Person Ahihna A Thupina
Khasiangtho tawh kisai thugil bulpite i hilhna ah, person ahihna nakpi-a gen ding ahi hi. Bang hang hiam cih leh Khasiangtho in ama’ adingin ama’ thu peuhmah gen lo a, a zaksate hong genin (John 16:13; Sawltak. 13:2), Khazih minthangsak dingin leitunga hong pai hi, ci-in kigen lai hi (John 16:14). Khasiangtho’ pianzia tawh kilehbulh in Pa Pasian leh Tapa Pasiante in amau mahmah kigen uh a, thuneihna kicing leh Kei cih kigenna kammal mahmah zangin, kithuahkhawm, kipawlkhawm, leh kiho-in om uh hi. Khasiangtho lah amah leh amah kigen ngei lo ahih manin person ahi lo bang zawzen hi. Tua mah tawh kizui-in pawlpi tangthu ah, tawlpi khat sung bang Khasiangtho person ahihna kingaihsun kha khol lo a, Nicean Creed (AD 325) sunga i muh mahbangin Pa leh Tapate’ thu a kitelgen khit ciangin Khasiangtho person khat ahihna kikipsan pan hi.
Ordothox upna maan taktak a kikipsak ciangin, Thum gawm Pasian khat pen person thum- Pa, Tapa, keh Khasiangtho-in om hi, cih thu a huampi-in kikipsak hi. Laisiangtho’ hong hilhna ah Pa leh Tapate person ahih zah lian mah in Khasiangtho zong person hi a, Thum gawm Pasian khat thu sunga i muh mahbangin tua mimal thumte Pasian khat bek hi a, Pasian thum lah hi lo hi.
B. Khasiangtho Person Ahihna
Laisiangtho Sunga A Kigennate
1. Person ahite bek in a sep theih nate Khasiangtho in sem hi.
(a) Leitung mawhna pulaak hi: “Amah ong pai ciangin, leitung mawhna, thumaanna, leh thukhenna thute pulaak ding” (John 16:8).
(b) Ama’n hilh hi: “Amah in na khempeuh ong hilh ding hi” (John 14:26; Neh. 9:20; John 16:13-15; I John 2:27 te zong ciamteh in).
(c) Khasiangtho in thugen hi: “Note Pasian’ tate na hih manun, Pasian in note’ lungsim sungah a Tapa’ Khasiangtho hong sawla, ‘Abba, Pa aw’ ci hi” (Gal. 4:6).
(d) Khasiangtho in thumsak: “kammal-a lawhkhiat theih loh tauna tawh eite’adingin hong thumsak hi” (Rom. 8:26).
(e) Khasiangtho in makaih: “Khasiangtho’ makaih” (Gal. 5:18; Sawltak. 8:29; 10:19; 13:2; 16:6-7; 20:23; Rom. 8:14 te tawh enkaak lai in).
(f) Khasiangtho in nasem dingin mite koih: “Khasiangtho in, ‘amaute ka sapna muna sem dingin Barnabas leh Saul sehkhia un’ ci hi” (Sawltak. 13:2; Sawltak. 20:28 tawh enkaak in).
(g) Khasiangtho mahmah in zong a kisehna mang hi (John 15:26).
(h) Khasiangtho in nasem: suakthaksak (John 3:6), ciamteh (Eph. 4:30), baptaiz (I Cor. 12:13), kidimsak (Eph. 5:18).
2. Midangte in midang dangte a bawl bangin kibawl thei hi.
(a) Pa in leitung ah sawl a (John 14:16,26), Tapa in leitung ah sawl hi (John 16:7).
(b) Mite in langpan thei (Isa. 63:10), dahsak thei (Eph. 4:30), mitsak (dal) thei (I Thess. 5:19), gensia thei (Matt.12:31), khem thei (Sawltak. 5:3), simmawh thei (Heb. 10:29), a langah gendai thei (Matt. 12:32).
3. Laisiangtho sunga Khasiangtho thu kigenna khempeuh in amah person ahihna hong lak hi.
(a) “A dang Hehnempa” kici a, tua in amah pen Khazih bang teekteeka person ahihna hong lak hi (John 14:16-17,26; 16:7; I John 2:1-2).
(b) Pasian mahmah Kha a kicih mah bangin amah zong Kha kici hi (John 4:24).
(c) Amah a kilawhna a kizang kammal pronoun-te in person ahihna hong lak hi. Greek kampau ah “kha” cih kammal pen nuntakna nei lote’ kilawhna kammal hi a, nuntakna nei lote’ kilawhna kammal pronoun mah zat ding ahih mahbangin tua banga a kizatna zong om hi (John 8:16,26); ahi zongin a tamvei zaw-in pasal kilawhna masculine pronoun kizang mawka, tua in Khasiangtho person ahihna hong lak hi (John 14:16-17; 16:7-15).
C. Thum gawm Pasian Khat Sunga
Mimal Khat A Hihna Tawh Pa leh Tapa Tawh
Kikim Hi
1. Pasian kici hi. Isaiah 6:8-9 leh Sawltakte’ Tangthu 28:25-26; Jeremiah 31:31-34 leh Hebrews 10:15-17 te enkkak le hang kimu thei hi. (II Cor. 3:18, leh Sawltak. 5:3,4 te zong ciamteh in. Sawltak. 5:3,4 ah, “Satan in na lungsim hong zo-inKhasiangtho khema….mihingte khem hi lo-in Pasian khem na hi uh hi”). Khasiangtho a khemte’ tungah Pasian’ thukhenna ngahtak tungin (Sawltak. 5:3) Khasiangtho’ min-in kuamah a kiciam ding kiphal lo a, amah mahmah zong Khasiangtho a kicih se hangin Pa leh Tapa sangin siangthozaw tuan se lo hi; siantho bitna cih pen Thum gawm Pasian khat’ pianzia hi ngiat hi.
2. Pasian’ hihnate nei hi (Piancil. 1:2; Job 26:13; I cor. 2:9-11; Heb. 9:14).
3. Khasiangtho in Pasian’nasepte sem hi (Job 33:4; Late 104:30; Lk. 12:11-12; Sawltak. 1:5; 20:28; I Cor. 6:11; 2:8-11; II Pet. 1:21).
4. Atunga i gensa mahbangin mimal lawhna pronoun-te kizangin kigen den ahih manin person ahihna kilang hi.
5. Mimal-a up theih muan theih dingin Khasiangtho kigen den hi (Late 51:11; Matt. 28:19; Sawltak. 10:10:19-21). Tua banga mimal muan theih dinga a omna ah, a thu man theih dingin om lai hi. Khazih sunga thu ummi khat Khasiangtho sungah a kalsuan leh a vangliatna, a makaihna, a thuhilhna, leh a kicinnate a nuntakna ah sin kha dinga, Laisiangtho sunga kigen Khasiangtho person taktak ahihnate ama’ nuntakna ngiat ah a sin khakna tawh kiptakin thei ding hi.
Dotna
1. Khasiangtho person khat ahihna bang hangin kinakgen ahi hiam?
2. Khasiangtho person khat ahihna a lak a nasepte bangte hiam?
3. Midangte in Khasiangtho person khat ahihna tawh bang cih thei uh Laisiangtho in bang ciang hong hilh ahi hiam?
4. Khasiangtho person ahihna a lak Laisiangtho sunga kizang kammalte gen in.
5. Khasiangtho pen Pasian ci-a a kigenna ah Pa leh Tapa tawh a kikimna bangci bangin kilang ahi hiam?
6. Khasiangtho in Pasian’ hihna nei hih i cih theihna bang hang ahi hiam?
7. Khasiangtho Pasian ahihna a nasepte in bangci bangin lak ahi hiam?
8. Khasiangtho kigenna a kizang personal pronoun-te in amah person ahihna bangci bangin lak ahi hiam?
9. Khasiangtho mahmah mimal muan theih ding leh thuman theih dinga thu ummi khat in a nuntakna ah a sin khakna ah Pa leh Tapa tawh a kikimna bang ciangin kimu thei hiam?
15
Khasiangtho Pasian: A Hong Paina
(God the Holy Spirit: His Coming)
Pentecost ni a Khasianghto leitunga ong paina pen dispensation dangte a a nasepte tawh kizoma etkhop ding ahi hi. Thuciam Lui hun lai-in Khasiangtho pen mun khempeuh a om Pasian bangin leitungah om a; ahi zongin Pentecost ni in leitung ah hong pai hi. Tu khanghun-in leitungah oma Pentecost ni a hong pai bang dan mah-in rapture ciangin leitung panin paikhia ding hi. Khasianghto tawh kisai hih thumaan thutak i tel theih nadingin leitung tawh kizoma a omzia tuamtuamte i ngaihsut ding kisam hi.
A. Thuciam Lui Hun Lai Khasiangtho
Zeisu Khazih ong pai masak hun mateng hun sawtpi sung, Khasiangtho mun khempeuh’a a om bang dan mah-in leitung ah om a, ama’ deihna bangin Pasian’ mite’ sung leh tua mite’ tungtawnin nasem hi (Piancil. 41:38; Pai. 31:3; 35:31; Gamlak. 27:18; Job 33:4; Late 139:7; Hag. 2:4-5; Zech. 4:6). Thuciam Lui hun lai-in hih leitung a kipiansakna leh Khasiangtho a kizopna kimu thei hi. Misiangthote leh kamsangte’ tungah Pasian’ thumaan thutak a kilaakna ah zong na kihel hi. A kigelh Laisiangthote hu na muam-a, leitung ah mawhna khaamin, nalamdang na bawl hi. Hihte khempeuh in Thuciam Lui hun lai-in Khasiangtho nakpi-in gamtang ahihna hong lak hi; ahi zongin, Thuciam Lui hun lai-in Khasiangtho in thu ummi khempeuh tenden cih bel om lo hi. John 14:17 in a gen mahbangin, Khasiangtho amaute “tawh” om khawma, amaute’ “sungah” om lo hi. Tua mahbangin, Pentecost ni ma peuhmah in Khasiangtho in mi khatpeuh a ciaptehna ahi a, a baptaizna cih ahi zongin om lo hi. Tua tawh kizui-in, Pentecost ni khit ciangin tua ma hunte sangin Khasiangtho’ nasepna lianzaw ding cih lam-et huai pah hi.
B. Leitunga Khazih Nuntakna Sunga Khasiangtho
Thum gawm Pasian khat sunga Tapa Pasian ahi Zeisu Khazih ci leh sa hong suakin leitung mahmah hong omna in Khasiangtho nasep zia tampi kikhelsak ding hi cih up huai a, tua bang zong hi takpi hi.
1. Nungak sianghto naubu sungah Pasian-mihing ahi Khazih a gaisak Khasiangtho ahi hi. A kituiphum laitakin Khazih’ tungah vakhu lim-in Khasiangtho hong kumsuk hi. Tua banah ah tawntung Khasiangtho tungtawnin Khazih amah leh amah Pasian tungah biakpiakna-in kipia hi, ci-in Laisiangtho in hong hilh lai hi (Heb. 9:14).
2. Leitungah Khazih a nuntak sunga Khasianghto tawh a kizopna pen a khangtoto kizopna ahi hi. Khazih in a nungzuite’ tungah Khasiangtho ngen le uh ngah ding uh ahihna gen masa hi (Lk. 11:13). A beisa hunin Pasian’ deihna bangin mihingte’ tungah Khasiangtho tung ngei zel hi napi-in, mihingte’ ngetna tawh a lungsim sung vuahsunga a ten nading thu peuhmah om ngei nai lo a, hamphatna thak ahi hi. A nasepna khum dekta-in a sih maseuh-in Khazih in, “Pa’ tungah ka ngen dinga, amah in a tawntunga hong ompih dingin Huhpa dang khat, Khasiangtho hong pia ding hi” (John 14:16-17). Tua bang mah-in, a tawhkik khit ciangin amaute mut-a, “Khasiangtho ngah un” na ci a (Jphn 20:22), tua Khasiangtho a ngah nadingun tungla pan vangliatna a ngah matengun Jerusalem ah ngak uh hi (Lk. 24:49; Sawltak.1:4)
C. Pentecost Ni A Khasiangtho Hong Paina
Pa (John 14:16-17,26) leh Tapa (John 16:7) in a kamciam bangin leitungah mun khempeuh a om Pa ahi den Khasiangtho mah Pentecost ni-in hong pai hi. Leitunga om densa hi napi-a Pentecost ni a hong paina pen leitungah a omsuaksuak dinga hong pai ahi hi. Pa Pasian mahmah zong mun khempeuh ah om napi-in (Eph. 4:6), “vantunga om kote’ Pa” ahi hi (Matt. 6:9). Tua mahbangin, Tapa Pasian mahmah zong mun khempeuh ah om napi-in (Matt. 28:20; Col. 1:27), tu laitaka a omna pen Pasian’ ziatlam-a tu ahi hi (Heb.1:3; 10:12). Tua bang lian mah-in Khasiangtho zong mun khempeuh a om ahih hangin tu-in leitunga om ahi hi. Pentecost Ni a hong paina pen hih leitunga a omna kipatna ahi hi. A omna mun vantung pan leitungah kikhel hi. Nungzuite in a ngak ding vua kivaikhak zong hih mah ahi hi. Khasiangtho hong pai loh-in hehpihna hun ahi tuhun kipan thei lo hi.
Mailam ah tuhun-a Khasiangtho nasepnate i gen ding hi. Khasiangtho Pasian in a masapen-in John 16:7-11 sung kigen bangin mawhna, thumaanna leh thukhenna thu ah leitunga mawhna laktel hi. Mi khat in Khazih’ thu tel sinsena a up theih nadinga a kigingkholsak Khasiangtho’ nasepna hi a, hehpihna nasepna hi-in Satan in a lungsim mit a tawtsak thu um lo mite in hih thugil thumte a muh theih nadinga Khasiangtho’ nasepna ahi hi.
1. Thu um lo mi khat in Zeisu Khazih ama’ Honpa banga a up lohna pen hotkhiatna a ngah theih loh nadinga khaktan mawhna hi, cih Khasiangtho in telsak hi. Tua mi a kilawmna, ama’ lungsima a puakzia, leh thu dang khatpeuh hi lo hi. Up loh mawhna in hotkhiatna a ngah loh nadingin khaktan hi (John 3:18).
2. Thu um lo mi khat Pasian’dikna theisak hi. Leitungah a om lai-in Khazih mahmah Pasian’dikna lim hi pah a; amah a omnawn loh ciangin Pasian’ dikna a pulaak dingin Khasiangtho kisawl hi. Hih banga a pulaakna ah Pasian in mite’ sep zawh loh zah dingin a dikna hong kal a, mihingte’ sepna peuhmah tawh hotkhiatna kingah ngei lo ding, cih hong lak hi. Tua banah, Khazih upna tawh dikna kingah thei hi, cih thu Pasian’ Khasiangtho in hong pulaaka, mi khat in Zeisu Khazih a up ciangin tua mi mi dikin kicamteh a, upna hangin diktansak-in om a, a mimal mahmah leh singlamteh tunga a sepna a dik Khazih sungah Pasian in sang hi (Rom. 1:16-17; 3:22; 4:5).
3. Hih leitung kumpipa Satan mahmah singlamteh tungah thu kikhen khina, tawntung gawtna thuak dina kikoihsa hi, cih thu pulaak hi. Hih thu in singlamteh tunga nasep kizo taktak-a, thukhenna kinei khin-in, Satan kizo khin-a, Khazih a um mi peuhmah in hotkhiatna ngah thei ta hi, cih thu ahi hi. Thu um lo mi khat in hotkhiatna a ngah nadingin hih thute a veka a tel kul cih hi lo a, tua mi in Zeisu Khazih a mi mahmah leh a nasepte tel sinsena a up theih nading ciang Khasiangtho in pulaak hi, cih thu ahi hi.
Thuciam Lui hun lai mahmah in zong Khasiangtho’ nasepna lo-in mi khat in um-in hotkhiatna a ngah theih loh mahbangin tanglai hun dangte in hih banga Khasiangtho’ nasepna pawlkhat om sam hi. Ahi zongin, Khazih si-a a thawhkik khit tu khanghun ciangin hih thute kitelzaw semsema, Khasiangtho mahmah leitung ah hong pai-a hong tenna zong thu um lote’ tungah hih banga a pulaak theih nading mah ahi hi.
Hih khanghun ading Pasian’ tupnate pawlpi kilaktohna rapture tawh hong kicin ciangin, hih leitunga Khasiangtho hong paina ‘ tupna khempeuh kicing dinga, Pentecost ni a hong pai bang teektekin hih leitung pan paikhia ding hi. Zeisu Khazih hih leitung ah hong pai-a a nasep ding khempeuh a zawh khit cianga vantung ah a ciah kik tawh kibang lian hi. Khazih bangmah-in, Khasiangtho zong mun khempeuh ah a omna kizom paisuak dinga, rapture khit ciang mahmah in zong Pentecost ni ma-a a sep bangin na sem lai ding hi.
Hih thute tawh kizui-in, tu khanghun pen, Khasiangtho nasep deuh hun kici thei a, Jew-te leh Gentile-te lak panin Khazih pumpi a piangsak ding thu um mi pawlkhat a sapkhiat laitak ahi hi. Rapture khit ciangin Khasiangtho in na sem lai dinga, Kum Tul Maaanna hun sung ah zong semin, tua hun ciangin tu khanghun-a Khasiangtho baptaizna kici pen sim loh Khasiangtho nasepna khempeuh om kim kha ding hi. Hotkhiatna i ngah nading leh leitung buppi ading a kiciang ding, a diakdiakin a um mite in hotkhiatna a ngah theih nadingin Khazih hong paina a kisap hamtang bangmah-in Khasiangtho hong paina pen a thupi mahmah, tu khanghuna Pasian’ nasepna ah a om loh a phamawh ahi hi.
Dotna
1. Pentecost ma-in leitung ah Khasiangtho bangci bangin om hiam?
2. Thuciam Lui sungah Khasiangtho nasepna thupi bangte kimu thei ahi hiam?
3. Thuciam Lui hun lai-a Khasiangtho thu um mite “tawh” a om khopna leh tu khanghuna thu um mite’ “sunga” a omna bangci-in kilamdang ahi hiam?
4. Khazih a gaina leh a suahna ah Khasiangtho in bang sem hiam?
5. Lungdamna thubute hun lai-a Khasiangtho nasepnate bang hiam?
6. A nungzuite’ Khazih in mut khin napi-in (John 20:22), bang hangin Khasiangtho hong pai nadingin Pentecost ni dong ngak kul hiam?
7. A nungzuite a ompih den ding a dang Huhpa a piak nading Khazih in a kamciamna ah Khasiangtho nasepna thak bangte kamciam ahi hiam?
8. Pentecost ni a Khasiangtho hong paina a bangci bang hi a, amah mun khempeuh a a omna tawh bangci bangin kizom ahi hiam?
9. Leitung buppi phawksak thu thumte bangte ahi hiam?
10. Pentecost ni-a Khasiangtho hong paina ah Khasiangtho’ nasep thupi bangte kingaihsun thei ahi hiam?
11. Tu khanghun in Pa leh Tapate’ tenna koi mun tak ahi hiam?
12. Tu khanghunin Khasiangtho tenna koi mun ahi hiam?
13. Rapture hun ciangin Khasiangtho nasepna bangci bangin kikhel ding ahi hiam?
14. Rapture khit ciangin Khasiangtho in hih leitung ah na a sem lai ding hiam?
15. Kum tul maanna hun sungin Khasiangtho’ nasepna bangci bang hi ding hiam?
16. Tu khanghuna Pasian’ deihna tawh kizomin Khasiangtho’ nasepna bangzah-in thupi ahi hiam?
16
Khasiangtho Pasian: A Suahthaksakna
(God the Holy Spirit: Hi Regeneration)
Upna tawh kinungta Christian nuntakna i cih khatvei suahthakna tawh a kipan ahih mahbangin hotkhiatna thu tawh kizomin suahthakna thu pen a bulpi mahmah khat ahi hi. Hih Khasiangtho nasepna bang hi a, Christian nuntak buppi tawh bangci bangin kizom cihthute mi dangte a pianthak nadinga thugenna leh kha lama picinna ah thupi mahmah hi.
A. Suahthakna I Cih Bang
Laisiangtho sungah “ suahthakna” cih kammal nihvei kimu thei hi. Matthew 19:28 ah kum tul maanna hun sunga leitung mahmah a kithaksuahsakna thu a kigena ah kizanga Christian-te’ hotkhiatna thu kigenna bel hi lo hi. Titus 3:5 ah bel, “Dikna nasepna hang hi lo, a lainatna hangin eite hong hona, suahthakna-a sawpsiangna leh Khasiangtho bawlthakna tawh hong hon hi” ci-in na gen hi. Hih Laisiangtho mun mah bulphuh-in theologian-te in “suahthakna” cih kammal pen nuntakna thak, a thaka suahna, kha lama thawhkikna, piansak thak, le, a huampi-in, Pasian’ tate i hihna tawh thu-ummite in i ngah nuntakna thak kigenna-in kizang hi. Pawlpi tangthu ah, hih kammal a kizatna maan den khol lo a, ahih hangin a maan-in tel thei lehang, thu ummi khat in Khazih a up hun liana a ngah nuntak tawntungna, kha sihna pana kha nuntakna a thakhat thu-a kikhelna a kigenna ahi hi.
B. Khasiangtho’ Suahthaksak
A pianzia mahmah-in, suahthakna pen Pasian’ nasep hi a hih thumaan thutak tawh kisai Laisiangtho in a genna zong kicing mahmah hi (John 1:13; 3:3,7; 5:12; Rom. 6:13; II Cor. 5:17; Eph. 2:5,10; 4:24; Tit. 3:5; James 1:18; I Pet. 2:9). John 1:13 sunga a genna ah,a suakthak mi peuhmah “sisan-a suak hi lo, ci leh sa’ deihna banga suak zong hi lo-in Pasian’ deihna banga suak ahi hi.” Mun tampi ah kha thawhkikna tawh kigenteh hi (John 5:21; Rom. 6:13; Eph. 2:5). Pasian’ piansak a hihna a kigenna-in piansakna tawh zong kigenteh hi (II Cor. 5:17; Eph. 2:10; 4:24).
Thu-ummi khat a suahthakna ah Thum gawm Pasian khat sunga mimal thumteng kihel hi. James 1:17 ah Pa leh suahthakna na lizom hi. Zeisu Khazih mahmah suahthakna ah a kihelna kimu hi (John 5:21; II Cor. 5:18; I John 5:12). Thum gawm Pasian khat sunga mimal thumte a kihel kimna Pasian’ nasepna dangte mah bangin, John 3:3-7 leh Tit. 3:5 sunga a gen bangin a suakkiksak taktak Khasiangtho hi deuh leh kilawm hi. Khazih mihinga a suahna ah Pasian pen a Pa suaka, Tapa’ nuntakna Khazih sungah omin, Khasiangtho in a gaisak veve tawh a kibang pianin kigen thei ding hi.
C. Suahthakna Tawh
Nuntak Tawntungna Kiguan
Suahthakna thu ah a laigilpen thu bel nidangin kha thu-a a sisa thu-ummi khat in tu-in nuntak tawntungna ngah, cih thu mah ahi hi. Gentehna nam zangin kigen hi. Nicodemus tawh a kihona ah Khazih in, “Hong kisuahkiksak pelmawh kul hi,” ahih kei leh, “Tunglam pan hong kisuahsak loh phamawh hi na ci hi. John 1:13 ah mihinga pianna tawh saikaak-in na gen hi. Gentehna nihna ah, kha lam thawhkikna bangin kigena, Khazih sunga thu-ummi khat pen “sihna pan a hingkik” ahi hi (Rom. 6:3). Ephesians 2:5 ah, “ eite mawhna sunga i sihna panin Khazih tawh” Pasian in hong hingkiksak hi ci-a, a cih nopna taktak, “Khazih tawh hong nungta khawmsak” a cihna ahi hi. Gentehna thumna ah, piansak thak cih kammal na kizanga, thu-immite in dikna leh sianthona taktak sungah Pasian tawh kibang dinga kipiangsak mi thak” a silh nadingin kihanthawn hi. II Corinthians 5:17 ah hih thu kitel mahmah hi: “Tua ahih manin Khazih sungah mi khatpeuh a om leh, amah piansak thak ahi hi: alui nate beimanga; na khempeuh athak a suak zo hi.” Hih gentehna nam thumte in Khazih upna hanga kingah nuntakna thak a kigenna vive ahi hi.
Suahthakna, kha lam thawhkikna, leh piansakna cihte a pianzia mahmah i et ciangin, suahthakna pen mihingte’ gamtat hoih tawh a kingah hi lo hi, cih kitel hi. Mihingte’ngaihsutna zong hi lo a, tuiphumna a kipan pawlpi thutante zuihna peuhmah tawh kingah lo hi. Mihingte’ upna tungtawna leitung pianzia khenga Pasian’ nasepna ahi hi.
Tua mahbangin, suahthakna pen tua nunga hong kizui thu-ummite in a nuntakna vua a tuahkhak uh thute tawh i khentel ding zong thupi hi. Suahthakna pen tha khat thu-a piang hi a, hotkhiatna tawh kikhenkhia thei lo hi. Hotkhiatna a ngah taktak mi khat in a pianthak khit ciangin kha lam tuahkhak thu pawlkhat bel nei taktak mah dinga, ahi zongin tuate suakthak taktak ahihna a kilatna hi a, a suahthakna pen bel hi lo hi. Thu khat ah, suahthakna i ngah teh ei leh ei mahmah in zong kithei thei a, i cih nop taktak bel i suhthakna hanga hong piang thute i sinkhakna a gen nuam i hi zaw hi.
D. Suahthakna Hanga Piangte
Suahthakna pen eite’ hotkhiatna buppi a kilamna bulpi ahi hi. Khazih sunga nuntakna thak lo-in, Khasiangtho tendenna, diktansakna, ahih kei leh a dang tuamtuamte, i ngah theih nading lampi om lo hi. Ahi zongin suahthakna a kilat pahlianna pawlkhat bel om hi.
Thu-ummi khat in upna tawh Khazih a san ciangin, amah a suakthak hi a, tua banga a suahthak ciangin pianzia thak ngah hi. Tua pen Laisiangtho in i “silh dinga” hong hanthot “mi thak” a cih pen hi a (Eph. 4:24), a cih nopna taktak bel, i nuntakna buppi tua pianzia thak kizosak ding a cihna ahi hi. Tua pianzia thak hangin, thu-ummi khat in a nuntakna, Pasian tawh kisai-a a lungsimpuak, leh mawhna tunga a gualzawh theihnate ah kikhelna lianpi pawlkhat tuak kha thei ding hi. Tua pianzia thak pen Pasian’ pianzia tawh a kibang hi a, mawhna a om loh hanga mihng’ pianzia taktak ahi mawhna a bawl khak ma-a Adam’ pianzia tawh kibang lo deuh hi. Tua pianzia thak in Pasian’ pianziate nei a, Pasian’ tawh kisai nate lunggulh pah hi. Khasiangtho lo-in ama’ thu-in bangmah a sep zawh loh hangin, nuntakna ah tupna thak hong guanin Pasian’ lungdamna ding tum nuam hi.
Suakthakna i cih pen a kithei thei tuahkhak thu ahih loh hangin, suahthakna tungtawna kingah nuntakna thak in thu-ummi khat nidanga a tuah ngei loh nate a sin khak theih nading hih theihna guan hi. Hun khat lai-in a mittaw pi hi a, tu-in khua mu thei ta hi. Hun khat lai-in a si hi a, tu-in kha thute ah nungta hi. Hun khat lai-in Pasian tawh kikhenin kipawkhopna nei lo hi; tu-in ahih leh Pasian tawh kipawlkhop theihna nei-in Khasiangtho nasepnate sang thei ta hi. Pasian’ tungah a ki-ap zawh zahzah leh Pasian’ hihtheihna a ngah zahzah-in, thu-ummi khat’ tuahkhak thute pen ama’ tunga ki-ap khatpeuh nuntakna ah leitung pianzia khenga Pasian’ sep theihna a kilatkhiatna lamdangpite hi ding hi.
Nuntakna tawntungna pen tawntung khamuanna bulpi ahi hi. Pawlkhatte in nuntak tawntungna i cih a kikhahsuah kik thei hi a thu-ummi khat a upna pan a ton kik leh a hohtkhiatna taan kik thei hi, ci-in a hilh uh hangin nuntak tawntungna leh suahthakna ngiat a pianzia in Pasian’ nasepsa a kikhel kik ding peuhmah ahih theih het lohna hong lak hi. A masapen-in, hih pen mihing nasep hi lo-in Pasian’ nasepna hi a, mihingte’ kilawmna khatpeuh’ tungah kinga peuhmah lo hi. Upna kisam hi, i cih hangin zong, upna pahphot pen hotkhiatna ngah nadinga hong kilawmsak nasep banga kingaihsun hi lo a, mihing khat a nuntakna ah Pasian in na a sep theih nadinga a konghonna bang hi zaw hi. Mihinga i pianna a kikhel kik theih loh mahbangin, kha lam-a suahthakna zong kikhelsuk kikhel to themthum thei lo hi; khatvei i suah khit nak leh, Pasian pen tua mi’ ading a Vantung Pa hi den ding cih khamuanna hong pia hi.
Tua mahbangin, Pasian’ nasepna tawh eite pianzia thak ah Pasian in hong phot nunsangin thawhkikna zong kikhel kik thei lemlum thei lo hi. Suahthakna i cih piansak thakna ahihna mahmah zong khatvei i ngah khit nak leh tawntunga a kizopsuakna a kilatna khat ahi hi. Hih thu tawh kizui-in, a tawntunga khamuanna thu pen hotkhiatna Pasian’ nasep ahia, mihing’ nasep, hehpihna hang kilkel ahia, mihingte’ sepna tungtawna kingah ahia, cih thu tungah kinga hi. Leitunga nu leh pate’ sung pana piang mi khat mahbangin thu-ummi mi thak khat Pasian’ ta ahihna tawh a hih ding bang hi lo-a a ginat lohna a om phial zongin, tua mi in nuntak tawntungna a ngah khitna peuhmah kikhel tuan zenzen lo hi. Tua banah, tu-a i neih nuntak tawntungna mahmah zong kha lam-a i tuahkhak thute ah akim a lang bek a kilang pan ahi hi. A cinga nopsakna taktak vantunga Pasian omna ah kingah pan ding hi.
Dotna
1. Suahthakna i cih bang ahi hiam?
2. Suahthakna thu tawh kisai Thuciam Thak sungah bang munte ah kimu thei a, tuate in a huampi-in bang thu hong hilh ahi hiam?
3. Thu-ummite’ suahthakna ah Thum gawm Pasian khat sunga mimal thumte bangci bangin kihel kim uh ahi hiam?
4. Suah kikna tawh a kigentehna ah suahthakna bangci bangin kigen ahi hiam?
5. Bang hangin suahthakna pen kha lam thawhkikna kici ahi hiam?
6. Bangci bangin thu-ummi khat Khazih sunga piansak thak ahih na pen suahthakna hang hi se ahi hiam?
7. Bang hangin mihing’ deihna tawh suahthakna piang thei peuhmah lo ahi hiam?
8. Bangci bangin suahthakna pen tuahkhakna tawh theih theih na khat hi lo ahi hiam?
9. Bangci bangin tuahkhak thute leh suahthakna kizom ahi hiam?
10. Bangci bangin pianzia thak pen suahthakna hanga kingah ahi hiam?
11. A piangthak mi khat in bang thute a thakin tuakkha ding ahi hiam?
12. Suahthakna leh tawntung khamuannate bangci bangin kizom ahi hiam?
17
Khasiangtho Pasian: A Tendenna leh A Ciaptehna
(God the Holy Spirit: His Indwelling and Sealing)
A. Tu Khanghun Pianzia Thak
Thuciam Lui sungah Khasiangtho mite tawh a omkhawmin a nuntakna thak uh a pia Pa leh kha lam-a a gualzawhna uh ahih den hangin, Thuciam Lui hun lai-a mite peuhmah tenden cih kimu lo hi. Hih thu tawh kisai Thuciam Lui in a gen het lohna leh John 14:17 sunga Zeisu Khazih in, “amah note tawh omkhawm-a note’ sungah om ding hi” ci-in Thuciam Lui hun lai-a a omzia leh tu khanghun a kilamdanna a genna ah kilang mahmah hi. Khasiangtho in thu-ummi peuhmah a tendenna pen tu khanghun’ pianzia tuam vilvel khat hi a, kum tul maanna hun sungah song om kik-in, tua sim loh hun dang khat beekah om ngei lo hi.
B. Thu-ummi Khempeuh A Tendenna
Christain-te khat leh khat khasiangtho vangliatna leh Khasiangtho gahte a gahkhiatna vuah a kibat kim loh hangin, Pentecost ni a kipanin Christian peuhmah Khasiangtho in tenden kim hi. Sawltakte’ Tangthu sungah tawlkhat sung a ziakaiina mun a om hangin (Sawltak. 8:14-17; 19:1-6), tuate a thu tuam hi bekin, hun khempeuh-a paizia ding hi lo-a, Sawltakte’ Tangthu pen hun kikhek hun ahih man hi bek hi. Khasiangtho in thu-ummite a tendenna pen Laisiangtho sung mun tampi ah kigen ahih manin Laisiangtho thuneihna a mang mi peuhmah in up loh theih ding hi lo hi (John 7:37-39; Sawltak. 11:17; Rom. 5:5; 8:9,11; I Cor. 2:12; 6:19-20; 12:13; II Cor. 5:5; Gal. 3:2; 4:6; I John 3:24; 4:13). Pentecost ma Thuciam Lui hun lai-in mi pawlkhat bek Khasiangtho in tendena, ahi zongin Pentecost khat ciangin Khasiangtho in thu-ummi khempeuh tenden ta hi, cih hih Laisiangtho munte in teltakin hong hilh hi.
Khasiangtho thu-ummi khempeuh tenden hi, cih thu Romans 8:9 in, “mi khatpeuh in Khazih’ kha a neih kei leh Khazih’a ahi kei hi” ci-a a genna tawh na kipsak hi. Tua mahbangin, Jude 19 ah thu-um lo mite “Khasiangtho nei lote” ci-in na gen hi. Pasian’ deihna bangin gamta lo-a Pasian’ sektatna a thuak thu-ummite nangawn zong a pumpite uh Khasiangtho tenna biakinn ahihna kimu thei hi. Paul in I Corinthians 6:19 ah hih thu bulphuh-in a sa-mi mahmah Corinthian-te Khasiangtho in a pumpi uh a tendenna hanga a kisiangthosakte ahih manun Pasian’ tunga mawhna a pelh nadingun na hanthawn hi.
Khasiangtho pen Pasian’ letsong ahihna zong tamveipi kigena, letsong i cih peuhmah a ngah mite in kilawmna khatpeuh a neih man vua kipia hi lo hi (John 7:37-39; Sawltak. 11:17; Rom. 5:5; I Cor. 2:12; II Cor. 5:5). Tua mahbangin, Topa tawh kalsuan khawma a nuntakna sangtaka a nungta dinga kisawl mite’ adingin Khasiangtho in a tendenna tungtawnin Pasian’ hihsak zawhna ngah uh hi.Siampite leh kumpite sathau kinilh-in amau’nasep sem dinga kisehkhiat mahbangin, Christian-te zong a pianthak hun lian mah-in Khasiangtho in sathau nilh-a, Khazih sunga nuntakna thak ah Khasiangtho tendenna tawh kituamkoih hi (II Cor. 1:21; I John 2:20,27). Tua banga sathau nilhna pen piangthak mi kim ading hi a, piangthak hun lian mah-a piang hi-in, Khasiangtho’tendenna tawh a kibang ahi hi. Pianthak khit hun khatpeuh cianga Khasiangtho in sathau hong nilh cih thu ahi a, Khasiangtho tawh i kidim ciang beka piang thei hehpihna dawl nihna nasep, cih bangte peuhmah Laisiangtho’ hong hilhna hi lo hi.
C. Khasiangtho Tendenna Tawh Kisai Buai Theihnate
Thu-ummi peuhmah Khasiangtho in tenden hi, cih thu pen Laisiangtho sunga a tel hak mun pawlkhat tungtawnin san hak a sa pawlkhat om thei hi. Thuciam Lui leh Lungdamna thubute’ sunga Laisiangtho mun thumte (I Sam. 16:14; Late 51:11; Lk.11:13) tungtawnin Khasiangtho a neisa mi khat in tua Pasian Khasiangtho tan kik thei hi, ci-a um pawlkhat om hi. David in Saul’ tung pan Khasiangtho a kilakkhiat bangin (I Sam. 16:14) ama’ tung pan a kilakkhiat loh nadinga a thungetna (Late 51:11) pen Thuciam Lui hun lai-a Khasiangtho nasep zia hi bek hi. Mi khempeuh Khasiangtho in tenden-in, tua mahbangin, Pasian in ama’ hoihsak banga a piak Khasiangtho ama’ thu mah-in lakhia kik ding, cih pen mi khempeuh’ tunga tung ding hi zenzen lo hi.
Sawltakte’ Tangthu sunga mun thum ah zong Khasiangtho in thu-ummi khempeuh tenden hi, cih thu telkhialh theih dingin om hi. Sawltakte’ Tangthu 5:32 ah Khasiangtho pen “ama’ thu a mangte Pasian in a piak” hi ci-in na gen hi. Ahih hangin, hih lai muna thumanna pen lungdamna thu manna hi a, pianthakna a gen hi pah hi. Pasian thu a mang khin lo thu-ummite nangawn in Khasiangtho a neih vevena uh Laisiangtho sungah kimu thei hi. Samaria khua a Philip’ tungtawna lungdamna thu a za mite in Khasiangtho a ngah pah lohna uh zong hih Khasiangtho nasepna thak leh Jerusalem khua a sawltakpite a kizopna hang ahi hi. Tua thu mah tawh kizui-in, tua mite’ tungah khut a kingak matengin Khasiangtho kipia nai lo hi (Sawltak. 8:17). Ahih hangin hih pen thu-ummi khempeuh tunga tung den ding ahih lohna pen khut ngakna kul se lo a Khasiangtho a ngah pah Cornelius pianthakna ah kilang hi. Sawltakte’ Tangthu 19:1-6 sunga mite bel Tuiphumpa John umnapi-a Zeisu Khazih a um ngei nai lo mite hi leh kilawm hi. Paul in tua mite’ tungah a khut a ngak ciangin Khasiangtho ngah uh a, ahih hangin hih mahmah zong a tawntunga kimang paizia hi lo-in a tuampian mun khat ahih manin hih bangin piang kikkik cih zong om lo hi. I John 2:20 leh 2:27 sunga sathau nilhna bel pianthak khit nunga Khasiangtho nasepna sangin Khasiangtho in thu-ummi khat a pianthak huna a tendenna hi zaw hi. Thuciam Thak sunga Khasiangtho satha nilhna khempeuh, Pentecost ma ahi a Pentecost khit ahi zongin, Khasiangtho’ nasep kipatna hi den hi (Lk. 4:18; Sawltak. 4:27; 10:38; II Cor. 1:21; I John 2:20,27). Tua hih manin hih thugil tawh kisai buaina khempeuh hih thu kigenna Lasiangtho munte limtaka i sincian ciangin siang pah hi.
D. Khasiangtho’ Tendenna Leh
Khasiangtho” Nasepna Dangte A Kilamdanna
Thu-ummi khat a pianthak hun lian mah-in Khasiangtho’ nasepna nam dang tuamtuam zong om ahih manin tua Khasiangtho nasepna tuamtuamte i khentel theih ding kisam hi. Tua mahbangin, Khasiangtho tendenna mahmah zong Khasiangtho’ suahthaksakna tawh a hun kibanga piang ahih hangin a kibang hi lo hi. Tua mahbangin, Khasiangtho’ suahthaksana leh tendenna zong hih thulu i gen khit cianga i gen ding Khasiangtho baptaizna tawh kibang lo hi. Mi khempeuh Khasiangtho in a tenden hangin mi khempeuh Khasiangtho tawh a kidim loh mahbangin Khasiangtho’ tendenna leh Khasiangtho tawh kidimnate a kibang hi lo hi. Tua banah, Khasiangtho’ tendenna pen khatvei bek pianga kicing hi a, Khasiangtho tawh kidimna bel thu-ummi khat’ nuntak sungin tamveipi a piang thei na ahi hi. Ahih hangin, Khasiangtho’ tendenna leh Khasiangtho’ sathau nilhna leh Khasiangtho ciaptehnate a kibang hi leuleu hi.
Khasiangtho’ tendenna ahih kei leh Khasiangtho’ sathau nilhna i cih thuhun Khasiangtho nasep zia ahi hi (John 14:17; Rom. 7:6; 8:9; I Cor. 6:19-20; II Cor. 1:21; 3:6; I John 2:20,27). Khasiangtho’ tendenna tungtawnin thu-ummi khat Pasian’ adingin kisiangthosak, ahih kei leh kituamkoih hi. Thuciam Lui hun lai-a sathau kinilhna in tuhuna Khasiangtho sathau kinilhna lim hi a, sathau mahmah zong Khasiangtho lim ahihna thu sagih ah kimu thei hi.
1. Kinilhna sathau tawh a kisukha na peuhmah a siangthosak ahi hi (Pai. 40:9-15). Tua mahbangin, tuhun ciangin Khasiangtho in siangthosak hi (Rom. 15:16; I Cor. 6:11; II Thess. 2:13; I Pet. 1:2).
2. Kamsangte sathau mah-in kisiangthosak-a (I Kumpite 9:16), tua mahbangin Khazih mahmah zong Khasiangtho tungtawna kamsang hi-in (Isa. 61:1; Lk. 4:18), thu-ummite zong Khasiangtho hangin teci pangte ahi hi (Sawltak. 1:8).
3. Siampite sathau in kisiangthosak-a (Pai. 40:15), tua mahbangin Khazih in zong Khasiangtho tungtawnin biakna pia-in (Heb.9:14), thu-ummite zong Khasiangtho mah in siangthosak hi (Rom. 8:26; 12:1; Eph. 5:18-20).
4. Kumpite zong sathau in kisiangthosak-a (I Sam.16:12-13), tua mahbangin Khazih (Late 45:7) leh thu-ummite zong Khasiangtho hang mah-in kumpi-a mang ding ahi hi.
5. Sathau tawh kinilhna pen damna ding hi a (Lk. 10:34), Khasiangtho hanga kha lam damna hong hilh nopna ahi hi.
6. Sathau in mite’ mai nelsak a, lungdamna sathau (Late 45:7) leh sathau thak (Late 92:10) kisam hi. Khasiangtho a gah pen lungdamna ahi hi (Gal. 5:22).
7. Biakbuk a kilamna ah meivak ading sathau a ki tuamgen hi (Pai. 25:6). Tua sathau in Khasiangtho lim hi a, a meivak pen thu-ummite, a tangkhia khuavak pen a khuavak banga tangkhia Khazih lim ahi hi. Tua meivak sungah sathau a om den a kul mahbangin, thu-ummite zong Khasiangtho sungah a kalsuan den ding ahi hi (Gal. 5:16). Meivak a kuan nadingin a khantan bangmah a om loh ding a kisap mahbangin thu-ummite in Khasiangtho a nan loh ding uh ahi hi (IThess. 5:19). Meivak kipuahsiang dena a om bang mahbangin thu-ummite azong mawhna pulaakna tawh kisiansuah den ding ahi hi (I John 1:9).
Sathau siangtho (Pai. 30:22-25) pen na nam li tawh kigawm ahi hi. Tuate in Khazih’ hihnate hong lak hi. Tuate in thu-ummi khat Khazih’ nuntakna leh Khazih pianziate in a luahna hong lak hi. Tua sathau peuhmah mihing ci le sa tawh kisai-in kizang thei lo hi (John 3:6; Gal. 5:17). A kibang pian hiamhiam dingin zong kiciing thei lo a, tua pen in nuntakna taktak ahi Khazih kilatkhiatna sim loh na dang khatpeuh Pasian in sang lo ding, cih hong lak hi (Phil. 1:21). Biakbuk sunga vanzat khempeuh sathau kizut-in Pasian’ adingin kituamkoih dinga, tua in thu-ummite’ ki-apna en a buppi-a ki-apna ahihna hong lak hi ( Rom. 12:1,2).
E. Khasiangtho’ Ciaptehna
Khasiangtho’ tendenna pen Khasiangtho’ ciaptehna ahihna Thuciam Thak sungah mun thum in hong hilh hi (II Cor. 1:22; Eph. 1:13; 4:30). Hih Khasiangtho’ ciaptehna pen Pasian’ nasepna hi khin kiuhkeuh hi. Christian peuhmah Khasiangtho in ciamteh khin ahih manin khatvei beek Khasiangtho’ ciaptehna na ngah nadingun hanciam un, cih lam-a sawlna peuhmah om ngei lo hi. Tua ahih manin Khasiangtho’ ciaptehna pen Khasiangtho’ tendenna mahbangin thu-ummi khempeuh ading hi a, pianthak huna piang ahi hi.
King James Version a Ephesians 1:13 a kiteina tungtawnin telkhialhna pawlkhat om thei hi. Tua lai-ah, “ Na up khit uh ciangin tua kamciam Khasiangtho-in hong kiciamteh khin zo hi” ci hi. A taktakin, “Um khin na hih manun, Khasiangtho-in hong kiciamteh hi” cih ding hi zaw hi. Kam dang khat-in gen lehang, upna leh tua Khasiangtho ngahna pen a hun kibang liana piang ahi hi. Tua ahih manin, hih pen a nunglam cianga hehpihna’ nasep khatpeuh, ahih kei leh khamitna hanga pahtaakman-a hong kipia na khatpeuh hi lo hi.Ephesian khua a Christian-te, “Tatkhiat ni donga hong kiciaptehna Khasiangtho dahsak kei un” ci-in kihanthawn hi. Mawh kha phial-in Khasiangtho dahsak kha phial ta leh uh, tatkhiat ni dong mah-a kiciamteh hi a, tua pen, pumpi thak ngah-a a mawh theih nawnloh ding uh thawhkik ni ahih kei leh a hing tanga kikhel ni a genna ahi hi.
Khasiangtho tendenna mahbangin, Khasiangtho’ ciaptehna zong tuahkhak experience khatpeuh hi lo a, upna tawh san ding thu ahi hi. Khasiangtho’ciaptehna pen thu-ummi khat’ hohtkhiatna ah a thupi lua mahmah hi a, khamuanna, a muan huai-a a kikepna, leh Pasian’neihsa ahihna a lak ahi hi. Tua banah, hotkhiatna a ngah nadinga a kisam khempeuh kisem khin cih zong lak hi. Christian-te a pumpi uh kitankhia a minthanna a tun ni dongun Khasiangtho-in kiciamteh hi. Hih thu khempeuh a huampi-in en lehang, Khasiangtho in hong tendena hong ompihna pen hong ciaptehna ahih manin hih thu a tel thu-ummi khat ciat adingin khamuanna leh kihehnepna lianpi ahi hi.
Dotna
1. Bang thuteng bulphuh-in Khasiangtho in thu-ummi khempeuh a tendenna pen tu khanghun a tuampianna khat hi,ci-in gen thei i hi hiam?
2. Thuciam Thak sungah bang munteng in in tu-ummi peuhmah Khasiangtho in tenden hi, ci-in hong hilh ahi hiam?
3. Bang hangin Khasiangtho’ tendenna pen thu-ummi khat kha lam nuntakna sang a neih nadingin kisam ahi hiam?
4. Khasiangtho’ sathau nilhna i cih bang ahi hiam?
5. I Samuel 16:14, Late 51:11, leh Luke 11:13 te ah Khasiangtho’ tendenna tawh kisai buai theih nading thu om ahi hiam?
6. Sawltakte’ Tangthu 5:32 leh thu-ummi khempeuh Khasiangtho in a tendenna bangci bangin hilhcian thei ding na hi hiam?
7. Sawltakte’ Tangthu 8:17 bang hangin Khasiangtho kipia pah lo ahi hiam?
8. Khasiangtho in thu-ummi khempeuh a tendenna thu tawh kisai-in Sawltakte’ Tangthu 19:1-6 bangci bangin hilhcian thei ding na hi hiam?
9. Khasiangtho’ tendenna leh suahthakna bangci bangin kilamdang ahi hiam?
10. Khasiangtho’ tendenna leh Khasiangtho’ baptaizna bangci bangin kilamdang ahi hiam?
11. Khasiangtho’ tendenna leh Khasiangtho tawh kidimna bangci bangin kilamdang ahi hiam?
12. Bangci bangin Thuciam Lui hun lai-a kizang sathau in Khasiangtho lim hi thei ahi hiam?
13. Thuciam Lui hun lai-a sathau siangtho sunga kihel na nam lite a khiatna bang ahi hiam?
14. Khasiangtho’ tendenna leh Khasiangtho’ ciaptehnate bangci bangin kizom ahi hiam?
15. Ephesians 1:13 khiatna taktak hilhcian in.
16. Khasiangtho’ ciaptehna leh khlam nuntakna bangci bangin kizom ahi hiam?
17. Khasiangtho’ ciaptehna leh a tawntunga muan huai taka hong kikepna bangci bangin kizom ahi hiam?
18
Khasiangtho Pasian: A Baptaizna
(God the Holy Spirit: His Baptism)
A. Khasiangtho Baptaizana A Khiatna
Khasiangtho tawh kisai thugilte lakah hih Khasiangtho baptaizna zah-a buai a a piangsak thu dang om lo kha ding hi. Tua banga a kibuai theihna pen hih Khasiangtho baptaizna pen suahthakna, tendenna leh ciaptehna cih bang Khasiangtho’ nasepna dangte tawh a pian hun a kibat man ahi hi. Tua banah, khatveivei Khasiangtho baptaizna leh Khasiangtho tawh kidimnate a pian hun kituak thei sawnsawn ahih man zong ahi hi. Tua thu hang mah-in Laisiangtho hilh sia pawlkhat in hih tegel a kibang hi, ci-in gen kha uh hi. Ahih hangin, Khasiangtho baptaizna thu a kigenna Laisiangtho munte limtaka i etcian ciangin tua bang buainate siang pah leuleu hi. A veka gawmin, Thuciam Thak sungah Khasiangtho baptaizna thu a kigenna Laisiangtho mun 11 om hi (Matt. 3:11Mk. 1:8; Lk. 3:16; John 1:33; Sawltak. 1:5; 11:16; Rom. 6:1-4; I Cor. 12:13; Gal. 3:27; Eph. 4:5; Col. 2:12).
B. Pentecost Ma-a Khasiangtho Baptaizna
Lungdamna Thubu lite sunga Laisiangtho munte leh Sawltakte’ Tangthu 1:5 limtaka i etphat ciangin, Khasiangtho baptaizna pen a piang ngei nai lo mailam huna thupiang ding banga a kingaihsutna kimu thei hi. Thuciam Lui sungah Khasiangtho baptaizna thu peuhmah kigen lo a, Lungdamna thubu lite leh Sawltakte’ Tangthu 1:5 te ah mailam-a thupiang ding ahihna na kigen hi. Lungdamna thubute sungah Khasiangtho baptaizna i cih Khazih in Khasiangtho zanga a nasep khat ahihna kigena, gentehna-in, Matthew 3;11 bangah Tuiphumpa John in Khazih in, “ Khasiangtho leh mei-in hong baptaiz ding hi” cipin na genkhol hi. “Mei tawh baptaiz” ding a cih bel Khazih hong pai kik nading leh tua hun cianga thukhennate a genna hi leh kilawm-a Luke 3:16 ah zong tua bangmah-in na gena, ahi zongin Mark 1:8 leh John 1:33 te ah bel mei thu kihel lo leuleu hi. Khatveivei Matthew 3:11, Luke 3:16, leh John 1:33 te a i muh bangin Khasiangtho zanga kisem ding ahihna Greek preposition en zangin kigen thei hi. Tua preposition a kizanga a kizang kei zongin Khazih in Khasiangtho zanga baptaiz ding ahihna bel kitel hi. Pawlkhatte in hih munte a Khasiangtho baptaizna leh Sawltakte’ Tangthu leh laikhak bute sunga Khasiangtho baptaizna a kibang lo bangkhat-in ngaihsun zenzen uh a, ahi zongin Thuciam Thak sung buppi ah Khasiangtho baptaizna thu a kigenna peuhmah a kibang kim hi zaw leh kilawm hi. Hih thu kigenna khempeuh ah a baptaiz pen Khasianghto hi den hi. Hih thu tawh kisai a maan denkeii thu Khazih mahmah in Tuiphumpa John tawh na genkaaka, vantung a kahtoh khit cianga Khasiangtho baptaizna tawh a kilamdanna na gen hi. Khazih in, “John in tui-in hong baptaiz hi; ahih hangin ni tawmkhat khit ciangin Khasiangtho-in na kibaptaiz ding uh hi” (Sawltak. 1:5).
C. Tu Khanghunin Christian Khempeuh
Khasiangtho-in Kibaptaiz
Khasiangtho baptaizna a pianzia leh a pian hun tawh kisai buaina tampi a om manin thu-ummite a pianthak hun lianin Khazih’ pumpi sungah Khasianghto in kibaptaiz hi, cih thu kimu thei kim lo hi. Khasiangtho baptiazna tawh kisai-in Thuciam Thak sunga a laigil pen mun ahi I Corinthians 12:13 in hih thu hong hilh hi, tua lai ah, “Bang hang hiam cih leh, eite Jew-te i hi a Gentile-te i hi zongin, sila i hi a mi suakta i hi zongin Kha khat in pumpi khat sungah i vekpi-in hong baptaiz a, eite i vekpi-in Kha khat sungah hong kidawnsak hi” ci-in siangtakin hong hilh hi. Hih mun ah, Greek preposition en kizanga, a kiteina ah zong, Kha khat “in” ci-in maan takin kitei a, khutzat vanzatte genna instrumental use ahi hi. Hih banga a kizat zia Luke 4:1 a gamlak ah “Khazih Khasiangtho in makaih” ci-a a genna, I Cortianthians 6:2 a note “in” a cihna mun, Colossians 1:16 a amah “in” a cihna munte leh Jude 1 a, “Pa Pasian in” a cihna munte a a kizatna kimu thei hi. Mihingte genna in hih prepositiom kammal kizang lo hi, ci-a genna oma tua bang ahih lohna kilang pah hi. Hih thu mah tawh kizui-in, I Corinthians 12:13 in hong hilh mahbangin, Khasiangtho baptaizna tungtawnin Khasiangtho tawh kizopna thak i neih teii hangin, a taktakin Khasiangtho sunga hong ki thunna kigen nuam hi lo-in Khazih’ pumpi sunga hong kithunna kigen nuam hi zaw hi.
“Eite khempeuh” cih kammal in Christian khempeuh a gen hi a,mi khempeuh hi lo-in, tua mahbangin Christian veve laka mi pawlkhat bek a gen zong hi lo hi. Thu-ummi khat a pianthak hun lianin Khasiangtho in Khazih’ pumpi sungah baptaiz hi, cihna ahi hi. Ephesians 4:5 in “Topa khat, upna khat, baptaizna khat” ci-a a genna zong hih thu hang mah ahi hi. Tui-a kiphumna ah zat zia tuamtuam nam tampi a om hangin Khasiangtho baptaizna khat bek om hi. Thu-ummite Khasiangtho tawh a kidim ding uh kihanthawn napi-a Khasiangtho-a baptaizna a zon ding uh sawlna peuhmah a om lohna pen Christian khempeuh in hih Khasiangtho baptaizna ngah kim khin ahihna a kilatna ahi hi (Eph. 5:18).
D. Khazih’ Pumpi Sunga Kibaptaizna
Khasiangtho baptaizna tungtawnin na nih kizo hi. A masa pen bel, thu-ummite Khazih’ pumpi sungah ki baptaiz, ahih kei leh kikoih hi; hih tawh kizom bel Khazih sung mahmah a hong kibaptaizna ahi hi. Khasiangtho baptaizna hanga a hun kituaka kingah hih nihte thupi mahmah hi.
Khasiangtho baptaizna tungtawnin tu khanghuna thu-um mi khempeuh tawh pum khat a suak dingin Khazih’ pumpi sungah hong kikoih hi. Hih lai ah baptaizna’ khiatna taktak pen a sunga kikoihna, kipatkhiatna, a om tawntung ding kizopna thak kipiakna cih thu ahi hi. Hih thu tawh kizui-in Khasiangtho baptaizna in Laisiangtho sunga hong kihilh Khazih’ pumpi tawh kisai thugilte leh thu-ummite hong kizomsak hi.
Khasiangtho baptaizna tawh piangkhia a thu-ummi a kibehlapna zui-a kibehlap toto thu-ummite tawh kilam pumpi tawh kisai-in Laisiangtho in gen mun mahmah hi (Sawltak. 2:47; I Cor. 6:15;12:12-14; Eph. 2:16; 4:4,5; 5:30-32; Col. 1:24; 2:19). Hih pumpi’ lutang Khazih hi a, lam lak den hi ( ICor. 11:3; Eph. 22-23; 5:23-24; Col. 1:18). Tua banga Khazih in a lam pumpi Khazih mah in vakin don hi (Eph. 5:29; Phil. 4:13; Col. 2:19). Tua pumpi tawh kisai-a Khazih’ nasep khat bel minthanna ah a tut theih nading kiginkholhna-in a siansuah denna ahi hi ( Eph. 5:25-27).
Khazih pumpi sunga kihel ahihna tawh thu-ummi khat ciat letsong ahih kei leh Khazih’ pumpi sunga nasepna kipia hi (Rom. 12:3-8; I Cor. 12:27-28; Eph. 4:7-16). Khazih’ pumpi sungah Khasiangtho in a koihna hangin minam, ninam ngeina, leh piankhiatnate kideidan het lo a kipumkhatna leh thu-ummi khat ciat in ama’ hihna bangbang leh a letsong ngah bangin Pasian’ na a sep theih nading hamphatna ngah hi. Tua pumpi a pumpi-in, “kizom dimdiam” hi (Eph. 4:16); a cih nopna ah, pumpi sunga mite a kilamdan uh hangin tua pumpi pen pumpi khat ahihna tawh limtakin kigeel-a, hoihtaka kigawm ahi hi.
E. Khazih’ Sunga Kibaptaizna
Thu-ummi peuhmah Khazih’ pumpi sunga thu-ummi dangte tawh a kizopna banah, tua banga baptaizna a ngah mi peuhmah Khazih’ sunga om mi, ci-in dinmun thak kipia hi. John 14:20 ah Zeisu Khazih in a sih ma a zan nitakin, “Tua ni ciangin kei ka Pa’ sungah omin, kei sungah note oma, note’ sungah keimah ka om lam na thei ding uh hi” ci-a a genkholhna ah hih thu mah kilam-en khol hi. “Kei sungah note” cih kammal in mailam huna piang ding Khasiangtho baptaizna a genkhol ahi hi.
Thu-ummite Khazih’ sungah om ahih manin, Khazih in a sihna, a thawhkikna, leh a minthanna a a septe amau’ sep suak pah hi. Hih thu Romans 6:1-4 sungah kigena, tua lai mun ah thu-ummite Zeisu Khazih leh a sihna sungah kibaptaiz a, a sihna sungah a kibaptaiz leh Khazih tawh kivui khawmin thokik khawm hi, ci hi. Hih lai muna a gente tui-a kiphumna-in kila thei dena, bangbang ahi zongin Khasiangtho nasepna a kigenna mah hi a, tui-a kiphumna mahmah in zong tua Khasiangtho’ nasepna lo-in khiatna nei lo ding hi. Hih tawh kibang khat Colossians 2:12 ah kimu hi. Khasiangtho baptaizna tungtawna Khazih tawh pum khat i suahna pen Pasian in tu leh a tawntunga ding thu-ummite’ adinga a sepsakna khempeuh’ bulpi ahi hi.
Thu-ummite Khazih’ sungah a om manin a lutang leh a pumpi in a neihkhop Khazih’ nuntakna nei pah hi. Thu-ummite’ lungsim in a pumpi na makaih mahbangin pumpi’ lutang ahihna tawh Khazih in a pumpi makaih hi.
F. Khasiangtho Baptaizna leh
Kha Thu-a Tuahkhak Thute A Kizopna
Thu-ummi peuhmah a pianthak hun lianin Khasiangtho in baptaiz hi, cih thu tawh kisai-in tua baptaizna pen Pasian’ nasep hi a upna tawh san ding ahihna kitel pah hi. A nunglam-a kha thu-a tuahkhak thu tuamtuamte in hih Khasiangtho baptaizna a kipsakna mun a om phial zongin, tua baptaizna ngiat bel tuahkhak sinkhakna tawh a kithei thei ding hi lo hi. Thu-ummi khempeuh kibaptaiz-in Khazih’ sunga i dinmun tawh kizom laimawk ahih manin, hih Khasiangtho baptaizna pen thakhat thu-a piang Pasian’ nasepna hi a, pianthak khit hun khat peuh-a zon mawkmawk ding hi lo hi.
Pawlpi masate’ hun lai-a kamtuam pauna tawh a kilat bangin
Christian-te in zong hanciama zon ding hi, ci-a kihilh peuh a om sawnsawn ciangin buaina tampi piangsak hi. Sawltakte’ Tangthu sung ah thu-ummite in Khasiangtho baptaizna a ngah hun-un kampuama a pauna uh thumvei bang a om zenzen hangin (2,10, leh 19), tua banga a piangte a tuampian vilvel hi a,
Sawltakte’ Tangthu pen hun kikhek hun ahih man ahi hi. Hotkhiatna a pianna mun dang khempeuh ah, Khasiangtho baptaizna tawh a tonkhawm kamtuama pauna cih bang om het lo hi.
Tua banah, pawlpi masate hun lai-in zong thu-ummi khempeuh Khasiangtho in a baptaiz hangin, thu-ummi khempeuh kamtuamin pau het lo uh hi. Tua hi a, thu-ummi khat in a nun takna ah Pasian’ nasepna tuam bangkhat-in Khasiangtho baptaizna a zon nadingin a bulphuh theih ding Laisiangtho om lo hi. Khasiangtho tawh kidimna nangawn kampau-a pana tawh kilangkhia lo a, Galatians 5:22,23 a a gen bangin Khasiangtho gahte-in kilangkhia zaw hi. A taktakin Corinth khua thu-ummite Khasiangtho tawh kidim het lo pi-a kamtuam-a paupau uh hi zaw hi.
Khasiangtho baptaizna nih oma, khat pen Sawltakte’ Tangthu 2 sunga hi-in, a khat pen I Corinthians 12:13 hi, cih hih tawh kibang pian khialhna dang khat zong om lai hi. Sawltakte’ Tangthu 10-11 sunga Cornelius’ kikhelna leh awltakte’ Tangthu 2 i etkaak ciangin Gentile mi ahi Cornelius’ tunga piang leh Pentecost ni a nungzuite’tunga piangte a kibang liinlian ahihna kimu hi. Sawltakte’ Tangthu 11:15-17 ah, “Thu gen a kipat takin, a cil-a eite’ tunga hong tung bangin amaute’ tungah Khasiangtho tung hi. Tua ciangin Topa in, John in tui-in ong baptaiz hi: ahih hangin note Khasiangtho in hong kibaptaiz ding hi, ci-a a gen ka phawk kik hi. Tua hi a, Topa Zeisu a um eite ong piak tawh a kibang letsong, Pasian in amaute pia ahih leh Pasian a nang zo dingin kei kua hi mawk ka hi hiam?” ci-in Peter in na gen hi. Khasiangtho baptaizna in thu-ummite Khazih’ pumpi sungah koih ahih mahbangin hih pen Sawltakte’ Tangthu 2 a kipan tuhun dong a kibang paisuak ahi hi.
Tua ahih manin, Khasiangtho baptaizna i cih Khazih leh thu-ummi dangte tawh kipawlkhopna thak sungah hong koih-in Khazih’ sunga dinmun thak hong pia a, Khazih’ pumpi sunga kizopna thak hong neisak Khasiangtho’ nasepna ahih manin thupi lua mahmah hi. Diktansakna leh thu-ummite minthanna ah kicinga hong tun ding Pasian’ nasepna khempeuh’ adingin a bulpi ahi hi.
Dotna
1. Khasiangtho baptaizna leh Khasiangtho’ nasepna veve ahi suahthakna, tendenna, leh ciaptehnate a kilamdanna gen in.
2. Khasiangtho baptaizna leh Khasiangtho tawh kidimna a bat lohna gen in.
3. Khasiangtho baptaizna leh a dang Khasiangtho nasepnate kitelkhial niloh ahi hiam?
4. Lungdamna thubu lite leh Sawltakte’ Tangthu 1 sungah Khasiangtho baptaizna pen mailama thupiang ding banga a kigen denna in bang khiatna thupi nei ahi hiam?
5. Tu khanghunin thu-ummi khempeuh Khasiangtho-in kibaptaiz khin cih bangci bangin lak thei ding na hi hiam?
6. Bang hangin thu-ummite Khsiangtho baptaizna a zong dingin kihanthawn ngei lo ahi hiam?
7.Khazih’ pumpi sungah kibaptaiz i cih ciangin bang a gen nuam i hi hiam?
8. Khazih pumpi ci-a gentehna kammal a kizatna ah Khazih in pawlpi makaih cih thu bangci bangin kilang ahi hiam?
9. Khazih’ pumpi ci-a gentehna in thu-um mimal tuamtuamte’ tunga kipia letsong tuamtuamte bangci bangin lakkhia ahi hiam?
10. Bang thutak thupite Khazih’ sunga Khasiangtho baptaizna hangin piang ahi hiam?
11. A sihna, a thawhkikna, leh a minthanna ah Khazih tawh i kibatnate leh Khazih’ sunga kibaptaizna bangci bangin kizom ahi hiam?
12. Amah tawh nuntak tawntungna i neih khopna bangci bangin Khazih’ sunga kibaptaizna in hong telsak ahi hiam?
13. Bang hangin Khasiangtho baptaizna pen kha lama tuahkhakna thawh kithei thei na khat hi lo ahi hiam?
14. Khasiangtho-a i kibaptaiz nadingin kamtuam-in a pau kul hiam?
15.Khasiangtho tawh i kidim nadingin kamtuam-in a pau kul hiam?
16. Sawltakte’ Tangthu 2 sunga Khasiangtho baptaizna leh I Corinthians 12:13 sunga Khasiangtho baptaizna kibang lo hi, ci-a kihilhna bang hangin khial ahi hiam?
17. Eite’ hotkhiatna tawh kizomin Khasiangtho baptaizna a thupina a tomkim-in gen in.
Laigelh : Rev.Dr. Zam Khat Kham
